Աստղիկ Սաֆարյանի ձայնասկավառակի շնորհանդեսը, հայտնի հյուրերը, երեկոյի դրեսկոդն ու հետաքրքիր պահերը

15 տարի բեմում․ երգչուհի Աստղիկ Սաֆարյանն իր գործունեության 15-ամյակի առթիվ  ներկայացրեց իր չորրորդ ձայնասկավառակն ու փոքրիկ համերգ ունեցավ, որի ժամանակ ներկայացրեց ոչ միայն սկավառակի երգերը, այլև իր գործունեության ընթացքում հիթ դարձած կատարումները։ Երեկոյին ներկա էին նրա ընկերներն ու գործընկերները։

Tert.am Life–ը ներկայացնում է միջոցառման հետաքրքիր դրվագներն ու մանրամասները։

Երգչուհին օրվա համար դրես–կոդ էր սահմանել՝ սպիտակ և կարմիր, իսկ ինքն արծաթագույն զգեստով էր։ Աստղիկը շատ լավ հասկանում է, որ ժամանակակից աշխարհում ձայնասկավառակի թողարկումը փոքր–ինչ հնացած է, բայց որոշել է հոսանքին հակառակ գնալ և պահել երգչի համար կարևոր այս մշակույթը։ Ժամանակակից լուծումն էլ գտել է քրոջ՝ Համեստի մտահղացմամբ՝ այն թողարկելով ոչ թե սկավառակի, այլ USB  կրիչի միջոցով։ Ալբոմը հասանելի է նաև թվային բոլոր հարթակներում։

Բացի այդ, երգչուհին այսպիսով կոչ է անում չընկճվել և շարունակել աշխատել։ «Նախորդ տարին ծանր էր բոլորիս համար։ Ես փորձում եմ այսպիսով նաև ոգեշնչել բոլորին, որ մենք պետք է շարունակենք աշխատել։ Ձայնասկավառակն անվանել եմ «Դու ուժեղ ես», և դա պատահական անվանում չէ։ Ունեմ նաև համանուն երգ։ Կարծում եմ՝ ուժեղ լինելն այս շրջանում հենց այն է, ինչի կարիքն իսկապես ունենք»,- ասաց  Աստղիկը։

15 տարվա գործունեության ընթացքում Աստղիկը տարբեր փուլեր է հաղթահարել։ Երգչուհին մտաբերեց, որ 2007 թվականին նույն օրը ստացավ «Տարվա հայտնություն» մրցանակը։ Ասում է՝ գուցե կարող էր շատ ավելին սպասել ու անել, քանի որ ունեցել է շատ առաջարկներ, բայց չի փոշմանում, որ չի հակասել իր կերպարին։

«Մրցանակը ստացել եմ 14 տարի առաջ, այսօր արդեն իմ չորրորդ  ձայնասկավառակն եմ թողարկում։ Թեկուզ դանդաղ, բայց փորձել եմ մաքուր քայլերով առաջ գնալ։ Եվ այսօր ուրախ եմ, որ ներկայացրել եմ լավ աշխատանք ու փորձել եմ պահել իմ կերպարը։ Ես երբեք այս բնագավառը չեմ ընկալել որպես շոու բիզնես, ընկալել եմ որպես երգարվեստ։ Ես շատ առաջարկներ եմ ունեցել թռիչքային առաջ գնալու համար, սակայն գերադասել եմ հրաժարվել, քանի որ դա վնասելու էր իմ կերպարին, իմ արվեստին»,– ասաց նա՝ պարզաբանելով, որ խոսքը ոչ միայն Հայաստանում պահանջարկ վայելող 6/8 ձևաչափի երաժշտություն ներկայացնելու, այլև արտերկրից առաջարկների մասին է։

Ձայնասկավառակում ընդգրկված է տասնմեկ երգ, չորսն արդեն հայտնի են, մյուսները նոր են։ «Երգերի մեծ մասի հեղինակը ես եմ։ Ներկայացրել եմ նաև Կոնստանտին Օրբելյանի, Առնո Բաբաջանյանի ստեղծագործություններից նորացված՝ երիտասարդական, պարային տարբերակներով։ Փորձել ենք ավելի պարային, հայկական էթնո գործիքներով ու ավելի ժամանակակից մատուցմամբ ներկայացնել, որպեսզի նաև երիտասարդներին մոտեցնենք մեր արվեստին,- ասաց երգչուհին, ապա պատմեց, որ վերջերս կարևոր խորհուրդ է ստացել, որը հաշվի է առել ալբոմը թողարկելուց,– Առիթի էի հրավիրված, երգերն էինք ընտրում։ Ընկերներիցս մեկն ինձ ասաց, որ երգերը լավն են, բայց բոլորը վեճ–խոսակցություն են պարունակում, քանի որ իմ երգերը մոտեցնում եմ ռոքային ժանրին։ Ես ընդունեցի դա, շատ ճիշտ խորհուրդ էր։ Այս ալբոմը շատ դրական միտումներով է, դա ինձ շատ է ուրախացնում»։

Լուսանկարները՝ Հրանտ Մարինոսյանի