«Մհեր Մկրտչյանի մոտ մի քանի քասթինգի մասնակցել էի, բայց առաջին անգամ ինձ ընտրեց». Ռոզի Ավետիսովան՝ «Իշխանություն» ֆիլմում իր դերի և դադարներ չսիրելու մասին

Դերասանուհի Ռոզի Ավետիսովայի մասնակցությամբ «Իշխանություն» ֆիլմն օրերս մեծ էկրաններ բարձրացավ: Tert.am Life-ի հետ զրույցում Ռոզին պատմել է մի քանի քասթինգից հետո ընտրվելու, նկարահանումներին նախապատրաստվելու, երկար դադարներ չսիրելու և կերպարներին չկապվելու մասին:

Ռոզիի խոսքով՝ ռեժիսոր Մհեր Մկրտչյանի մոտ մի քանի անգամ քասթինգի մասնակցել է, բայց երբեք իր դերը չի հաստատվել: «Այս անգամ մասնակցեցի և դերս հաստատվեց։ Համագործակցությունը սպասված էր և ցանկալի, այդ ցանկությունը երկկողմանի էր: Քասթինգին մասնակցող մյուս դերասանուհիներն ավելի երիտասարդ էին, զարմացա, որ ինձ հաստատեցին, բայց և ուրախացա: Ինձ ընտրելով՝ կերպարն ինչ-ինչ առումներով փոփոխությունների ենթարկվեց, արդյունքը կտեսնեք էկրաններին: Այս համագործակցությունը հիմնված էր առողջ փոխհարաբերությունների վրա»,- պատմեց նա:

Ըստ դերասանուհու՝ նկարահանումներից առաջ նախապատրաստվել են, զրուցել ռեժիսորի հետ: «Այս գործընթացը պարտադիր է, որովհետև պետք է հասկանաս՝ ի՞նչ ես անում, կերպարիդ գիծն ուր է գնում, ինչպես է մտածում, ինչ գույն ունի: Թվում է՝ այս գործընթացն էկրանին չի երևում, բայց երբ այդ ամենի միջով անցնում ես, կերպարդ ավելի հյութալի է դառնում,- ասաց նա և հավելեց, որ ֆիլմի դերասանական անձնակազմի մի մասի հետ նախկինում աշխատել էր,-Մյուս մասի հետ չէի աշխատել, բայց կազմը շատ լավն էր, Մհերն էլ այնպիսի մթնոլորտ էր ստեղծում, որպեսզի դերասանները միմյանց հետ մաքսիմալ ընկերական շփում ունենան»:

Ռոզին ընդգծեց, որ երկար դադարներ չի սիրում, աշխատում է նախագծերի միջև երկար ժամանակ չթողնել: «Չեմ կարողանում երկար դադարներ ունենալ, որովհետև առանց նկարահանումների ապրելը բարդ է: Բացի այն, որ դերասանուհի լինելն իմ մասնագիտությունն է, այն նաև երջանկությանս բանաձևերից մեկն է, որից երկար ժամանակով հրաժարվել չեմ կարող: Ինձ համար կարևոր է անընդհատ այդ գործընթացի, աշխատանքային վիճակի մեջ լինելը: «Իշխանություն» ֆիլմից հետո նկարահանվեցի «Սարի աղջիկ» հեռուստասերիալում, մոտ կես տարի է՝ այս նախագծում եմ, հիմա նկարահանումներն ավարտին են մոտենում»,- նշեց նա:

Դերասանուհին շեշտեց, որ նախագծերից հեշտ է բաժանվում՝ նոր նախագծերի սպասումներով: «Ամեն նախագծի ավարտ իր հետ նոր սկիզբ, աշխատանքային փորձ է բերում: Չեմ կառչում կերպարից, նախագծից, երբեք չեմ կապվել որևէ կերպարի հետ, ինձ համար նախագիծն ավարտվում է և վերջ: Կցանկանամ մի օր ունենալ կերպար, որից դժվար կբաժանվեմ»,- ասաց դերասանուհին:

Ռոզին նաև հավելեց, որ ներկայացումներում իր զբաղվածությունը ևս մեծ է. «Նոյեմբերի վերջին եղավ «Սեր» ներկայացման պրեմիերան, որը բեմադրել էր Սուրեն Սաֆարյանը, դեռ խաղում ենք: Խաղում ենք ես և Սուրենը, հուզիչ պատմություն է: Ցավոք, Հայաստանում մելոդրամա ժանրը անտեսվում է, քիչ են ներկայացումներ բեմադրվում: «Սերն» 90-ականների մասին մելոդրամա է, գործողությունները կատարվում են 92-ականներին, հետո գալիս մեր օրեր: Սիրային պատմության հերոսներն իրականում էլ կան, ովքեր հետպատերազմյան շրջանում գնացին երկրից, կորցրին իրենց սերը: Կա ևս մի քանի ներկայացում, որոնք պատրաստ կլինեն մայիս-հունիս ամիսներին, դրանց մասին դեռ վաղ է խոսել»,- եզրափակեց նա: