«Մտածում էի՝ հանկարծ երեխայիս որևէ վնաս չլինի». Ռուզաննա Մանուչարյանը՝ հղիության ընթացքում կորոնավիրուսով վարակվելու հետևանքների, դստեր անվան ընտրության և երեխային 40 օր որևէ մեկին ցույց չտալու մասին

Դերասան-ամուսիններ Վահան Միրաքյանն ու Ռուզաննա Մանուչարյանը մարտին ծնողներ դարձան: Իրենց դստերը նրանք Վիկտորիա են անվանակոչել: Այո, հենց Վիկտորիա, ոչ թե՝ Վիկտորյա, ինչպես ենթադրում է անվան հայերեն գրությունը: Մայրիկի խոսքով՝ իր ցանկությունն է եղել դստեր անունն այդ տարբերակով գրելը:

Փոքրիկն օրերս դարձել է 40 օրական, ինչի առթիվ արարողությունը կայացել է Սուրբ Սարգիս եկեղեցում: Tert.am Life-ի հետ զրույցում Ռուզաննան խոսել է երեխայի դեմքը ցույց չտալու, 40-օրականի արարողության, իր ապրումների, վախերի և իրենց ընտանիքում տեղի ունեցած փոփոխությունների մասին:

Փոքրիկ Վիկտորիան օրերս դարձել է 40 օրական, ինչի առթիվ ծնողները օրհնություն են ստացել եկեղեցում: «Տեղյակ չէինք, որ եկեղեցում երեխային քառասունքից հանելու հատուկ արարողություն կա, բայց ուզում էինք այդ օրը գնալ, աղոթել: Հետո մեր ընկերները, որոնք վերջերս էին բալիկ ունեցել, պատմեցին, որ հատուկ արարողակարգ կա: Գնացինք Սուրբ Սարգիս եկեղեցի, այդ եկեղեցին ամուսնուս համար յուրահատուկ է, ստացանք Տեր Շահեի օրհնությունը: Հետո եկանք ու տանն էլ փոքրիկ արարողություն արեցինք՝ Վիկտորիան վարդի թերթիկներով լոգանք ընդունեց, երեկոյան էլ հյուրեր ունեցանք: Երեխան ամբողջ օրն իրեն շատ լավ դրսևորեց, հանգիստ էր, առհասարակ, իր բնավորության գծերն արդեն զգում ենք: Պահանջկոտ, շատ մաքրասեր երեխա է, հենց մի փոքր շոգում է, պետք է հագուստն, անպայման, փոխենք: Նաև շատ հասկացող բալիկ է, գիշերները հանգիստ քնում է, եթե իրեն ոչինչ չի խանգարում»,- ասաց նա:

Զույգը 40 օր երեխային ցույց չի տվել շրջապատին, հիմա էլ չեն շտապում նրա դեմքը ցույց տալ։ Ըստ Ռուզաննայի, նույնիսկ չգիտի, թե դա ինչով է պայմանավորված:

Մայրիկը նկատեց, որ բառեր չի գտնում իր զգացողությունները նկարագրելու համար: «Երեկ մի բան եմ նկատել. 40 օր մեր բալիկին ոչ ոք չէր տեսել, կողքից արձագանքներ չէինք ստացել, բայց երբ 40 օրականի օրը մարդիկ եկան, սկսեցին կոմպլիմենտներ ասել, տպավորություն էր, որ այդ ամենն ինձ են ասում: Շատ հետաքրքիր զգացողություն էր,- ասաց նա և հավելեց, որ երեխայի ծննդից հետո հավելյալ պատասխանատվության զգացում չունի,- Այն մարդկանցից եմ, որը ցանկացած հարցի պատասխանատվությամբ է վերաբերում: Նույնիսկ հղիության շրջանից սկսած ինձ մոտ պատասխանատվության մեծ զգացում կար, նույնն էլ Վահանի դեպքում էր: Դա է պատճառը, որ մեզ մոտ երեխայի ծննդից հետո առանձնապես ոչինչ չփոխվեց: Բայց այլ փոփոխություններ, բնականաբար, կան: Նախքան երեխայի ծնունդն այս եղանակին կարող էի արդեն թեթև հագուստով դուրս գալ, չմտածել մրսելու մասին, հիմա ուշադիր եմ նաև իմ անձի նկատմամբ, որպեսզի ուժ ունենամ ու կարողանամ երեխայիս հասցնել իր նպատակներին»:

Դերասանուհին ընդգծեց, որ իր ու ամուսնու հարաբերություններում ևս փոփոխություններ կան: «Իհարկե, միշտ էլ սիրել ենք իրար, բայց երեխան այլ կապվածություն է ստեղծում, ավելի եք հարազատանում:  Երեխան գունավորել է մեր կյանքը, Վահանն էլ այնքան հոգատար հայր է: Հիմա ամեն ինչին թեթև՝ վարդագույն ակնոցով է նայում: Երբ գալիս է տուն, գրկում և համբուրում է դստերը, աշխարհն  իրենն է դառնում: Երեկ նույնիսկ թատրոն էինք գնացել Վահանի մոտ, որտեղ մեզ շատ լավ ընդունեցին»,- ասաց նա: 

Մայրիկը շեշտեց, որ, որքան էլ բարդություններ են լինում, իր համար այս շրջանը հաճելի է: «Հիմա թատրոնում չեմ խաղում, տևական ժամանակ դեռ չեմ խաղա, բայց չեմ նեղսրտում, գիտակցում եմ, որ դա ևս ժամանակավոր է: Երբ մտքիցդ հանում ես, որ այդ ամենը բեռ է, ամեն ինչ հաճույք է դառնում: Գիշերը չքնելը ևս գույն է, ես ծննդաբերության ընթացքում նույնիսկ ծիծաղել եմ, պետք է հասկանալ, որ այդ ցավը ժամանակավոր է: Կարելի է ասել՝ «տառապել եմ», բայց վայելել եմ ժամանակս փոքրիկիս հետ: Ամուսնուս վերաբերմունքը ևս շատ է օգնել, նա ամեն պահի կողքիս է, փորձում է երեխայի խնամքի հարցում օգնել: Ունեմ ծանոթ աղջիկներ, որոնք հետծննդաբերական շրջանը, իսկապես, բարդ են հաղթահարել: Իրականում, ծննդաբերությունս ևս թեթև չի եղել, առհասարակ ծննդաբերությունը թեթև չի լինում, միշտ էլ ուժեղ ցավեր են լինում: Շատ էի լսել, որ երեխային գրկելուց հետո բոլոր ցավերի մասին մոռանում ես և ուզում էի հասկանալ՝ արդյոք դա ճի՞շտ է: Պետք է ասեմ, որ ճիշտ էր, ծննդաբերության ժամանակ կտրվում ես աշխարհից ու հետ ես գալիս, երբ բալիկիդ գրկում ես: Երեխայիս գրկելուց հետո զարմացած էի՝ ինչպե՞ս կարող եմ ցավ չզգալ, կախարդական վայրկյաններ են,– ասաց նա ու հավելեց, որ խնամքի հարցում իրեն օգնում է մայրը,– նա նախքան ծննդաբերությունս եկավ, որպեսզի կողքիս լինի: Շատ են հարցնում, թե ինչո՞ւ սկեսուրս, սկեսրայրս չկան իմ էջում, ամեն անգամ այդ հարցը ցավեցնում է մեզ, որովհետև Վահանի ծնողները մահացել են»:

Ռուզաննան խոստովանեց, որ նախքան ծննդաբերությունը վախեր ուներ: «Այս մասին նույնիսկ ընտանիքիս անդամները չգիտեն, բայց հղիության շրջանում կորոնավիրուսով վարակվելուց հետո շատ վախեր ունեի, մտածում էի՝ հանկարծ երեխայիս որևէ վնաս չլինի: Չնայած բժիշկս անընդհատ ասում էր, որ որևէ խնդիր չկա՝ վախերը չէին անցնում: Փառք Աստծո, ամեն ինչ լավ է, վիրուսը բալիկիս վրա որևէ ազդեցություն չունեցավ: Առհասարակ, հղիները խոցելի խումբ են համարվում: Ուզում եմ հղիներին ասել, որ չպետք է վախենալ, եթե արդեն վարակվել են, թող ուժեղ լինեն ու հաղթահարեն այդ շրջանը»,- նշեց նա: