Դիանա Տոռեսի 32-ամյակը, տեսահոլովակի շնորհանդեսն ու 3 հարկանի տորթը

Դերասանուհի Դիանա Տոռեսն իր 32-ամյակի օրը ներկայացրեց առաջին տեսահոլովակը, որը նրա համար մանկության երազանքի իրականցում էր։ Տարեդարձից և պրեմիերայից օրեր անց Դիանան կազմակերպել է տեսահոլովակի շնորհանդեսն ու իր տարեդարձի միջոցառումը։

Tert.am Life–ը ներկա է եղել միջոցառմանն ու ներկայացնում է հետաքրքիր դրվագները։

Օրվա համար նա 3 հարկանի տորթ էր պատվիրել՝ զարդարված բնական ծաղիկներով, ասում է՝ դիզայնն ինքն էր որոշել, համի հարցում էլ ընկերուհին է օգնել։

Դիանան նկատեց, որ սա իր կյանքի երրորդ ամենաերջանիկ օրն էր, առաջինը տեսահոլովակի նկարահանման օրն էր, երկրորդը՝ պրեմիերայի։

«Սա կոմերցիոն աշխատանք չէ, սակայն հաջորդը կլինի կոմերցիոն, որպեսզի ես էլ գումար աշխատեմ։ Թե չէ հիմա միայն ծախսում եմ,– ասաց նա ու հավելեց, որ երգն իր հետ չի ասոցացվում։ –Իմ կյանքում չի եղել այնպես, որ ինձ չսիրեն, ուրիշին սիրեն։ Երգն իմ մասին չէ, բայց շատ գեղեցիկ է։ Հեղինակը Վլադիմիր Պողոսյանն է։ Կարծում եմ՝ երգը ստացված է։ Գուցե հայերի համար անսովոր տեսահոլովակ է, բայց ես ոգեշնչվել եմ իմ ամենասիրելի երգչուհիներից՝ Ավրիլ Լավինից, Ռիհաննայից։ Անկեղծ ասում եմ, որ ոգեշնչվել եմ իմ սիրելի աստղերից»։

Դիանայի խոսքով՝ սա դեռ սկիզբն է, այս ասպարեզում իր գործունեությունը շարունակական է լինելու։ Ինչ վերաբերում է քննադատություններին՝ ասում է՝ բոլորին էլ քննադատում են։

Նրանից հետաքրքրվեցինք՝ արդյոք քննադատությունների մեջ առողջ կարծիքներ չի գտել․ «Երգը շատ եմ սիրել, բայց իմ երգածի մեջ թերություններ կան, քանի որ մեկ օրում է արվել ամեն ինչ։ Ես ոչ վոկալ եմ պարապել, ոչ  պատրաստվել եմ։ Ափսոսում եմ, որ շտապեցի, բայց ոչինչ, ես այդ երգը դեռ շատ եմ երգելու։ Մարդու ձայնը տարեցտարի փոխվում է։ Հուսով եմ՝  համերգների ժամանակ ձայնս արդեն կարգի բերած կլինեմ։ Այնպես չէ, որ ինձ դուր չի եկել աշխատանքը, շատ է դուր եկել, պարզապես կան մարդիկ, որոնց քննադատություններից կոմպլեքսավորվել եմ»։

Ինչ վերաբերում է դերասանի և երգչուհու աշխատանքներից մեկն ընտրելուն՝ նա ասաց, որ պատրաստվում է զուգահեռ զբաղվել երկու աշխատանքով էլ։

«Սելենա Գոմեսը, Արիանա Գրանդեն ինչպե՞ս են ներկայանում և՛ որպես դերասանուհի, և՛ երգչուհի։ Ես էլ իրենց նման։ Ինձ որպես դերասանուհի կտեսնեմ այն դեպքում, երբ «Կինստագրամին» համարժեք, որևէ նախագիծ լինի։ Չեմ նկարահանվի հասարակ, ողբ սերիալներում, դա իմը չէ։ Կնկարահանվեմ «Կլոն» հեռուստասերիալի կարգի սերիալում, սիթքոմերում, կարճամետրաժ ֆիլմում»,– ասաց նա։ Դիտարկմանը, որ ինքը Հայաստանի շուկայի մասին է խոսում, բացի այդ, այդ մակարդակի համար շատ ավելի մեծ պատրաստվածություն, մասնագիտական կրթություն և հմտություն է պետք, նա պատասխանեց․ «Իհարկե բայց ես ինձ վրա կաշխատեմ։ Ես Բժշկական կրթություն ունեմ, ի՞նչ վատ է»։ Հստակեցման, որ խոսքը դերասանական կրթության մասին է, պատասխանվեց․ «Գրքեր կկարդամ»։

Լուսանկարները՝ Էլեն Գասպարյանի