«Եթերում մեծ եմ երևում». «Սարի աղջիկ» սերիալից Աիդա Կարապետյանը՝ ոճային փոփոխության, խաղի, տեսքի հետ կապված քննադատությունների և խաղընկերներից ամաչելու մասին

Աիդա Կարապետյանի համար «Սարի աղջիկ» հեռուստասերիալը դեբյուտային էր: Չունենալով նկարահանվելու փորձ՝ 18-ամյա Աիդան քասթինգի միջոցով ընտրվեց գլխավոր հերոսուհու՝ Լուսեի կերպարի համար:

Tert.am Life-ի հետ զրույցում Աիդան խոսել է սերիալի ավարտի, ընտանիքի անդամների՝ իր ընտրած մասնագիտության հետ համակերպվելու, խաղընկերներից ամաչելու, խաղի, տեսքի հետ կապված քննադատությունների և եթերում մեծ երևալու մասին:

Երիտասարդ դերասանուհու խոսքով՝ տխուր է, որ հեռուստասերիալն ավարտվում է, բաժանումը բարդ է: «Նախագիծն ինձ այս ասպարեզում փորձ տվեց, շատ բաներ սովորեցի, ունեցա նոր շրջապատ, շատ լավ ընկերներ, որովհետև առավոտից երեկո գործընկերներիս հետ էի: Շատ լավ է, երբ այդ միջավայրը լավն է լինում ու հաճույք ես ստանում մարդկանց հետ աշխատանքից: Երբ նոր էի նկարահանվում, խոսակցություններ կային, որ պապիկիս՝ ՀՀ մշակույթի վաստակավոր գործիչ, պարուսույց Գագիկ Կարապետյանի միջոցով էի ընտրվել, բայց դա այդպես չէր, ինչի մասին ասացի հարցազրույցումս: Դրանից հետո մարդիկ հասկացան, որ արդար եմ ընտրվել ու խոսակցությունները դադարեցին»,- ասաց նա:

Ըստ Աիդայի՝ ընտանիքի անդամները դեմ էին, որ նկարահանվեր, բայց հիմա համակերպվել են: «Մայրս սիրով դիտում է, ինձ հետ հավասար լացում: Ընտանիքս ինձ ոգևորում է, դեմ չեն, որ այս ուղին շարունակեմ: Հիմա ուզում եմ ավարտել ուսումս պարի ասպարեզում, պարը չեմ թողել, ամեն օր պարում եմ: Կարողանում եմ ժամանակ հատկացնել և՛ նկարահանումներին, և՛ պարին: Ճիշտ է, մի փոքր հոգնում եմ, բայց ստացվում է: Երկուսն էլ իմ կյանքում մեծ տեղ ունեն, երկուսն էլ շատ եմ սիրում, որն էլ հիմա թողնեմ, հաստատ շատ կկարոտեմ: Այդ պատճառով էլ փորձում եմ այնպես անել, որ կարողանամ համատեղել, ոչ մեկի պակասը չզգամ»,- նշեց նա:  

Աիդան նկատեց, որ նկարահանումների սկզբնական շրջանում որոշակի բարդույթներ է ունեցել: «Սկզբում խաղընկերներիցս բարդույթավորվում էի, ամաչում էի նայել նրանց աչքերին, բայց հետո նրանց ու իմ աշխատանքի շնորհիվ հաղթահարեցի այդ բարդույթը: Նաև չէի ուզում, որ իմ պատճառով դերասանները մեկ տեսարանում նկարահանվեն մի քանի անգամ, ինչից ավելի էի լարվում, բայց դա անցավ: Բնական է, փորձ չունեի, չէի հասկանում, թե շուրջս ինչ է կատարվում: Ընթացքում սովորելու հետ մեկտեղ վախերն ու բարդույթներն անցան»,- պատմեց Աիդան:

Դերասանուհին շեշտեց, որ երբեք հայտնիության չի ձգտել, հիմա էլ հատուկ ոչինչ չեմ անում, որ իր մասին շատ խոսեն: «Ուղղակի սիրում եմ դերասանական արվեստը, դա միայն հեռուստասերիալներով չի սահմանափակվում, ուզում եմ նաև թատրոնում խաղալ: Հայտնիության միակ լավ կողմն այն է, երբ մարդկանցից դրական էներգիա ես ստանում: Իսկ վատ կողմերից են խոսակցությունները, վատ մեկնաբանությունները: Դրանցից նեղսրտում եմ, որովհետև իմ անձի շուրջ են, չի կարող այդ ամենն ինձ համար միևնույն լինել: Եղել են քննադատություններ խաղիս, տեսքիս հետ կապված: Առողջ քննադատություններին նորմալ եմ վերաբերում, խորհուրդներին ևս, որովհետև դրանց միջոցով իմանում եմ թերություններիս մասին, հետո շտկում դրանք: Այս ամենը ուղղակի չպետք է հասնի վիրավորանքի: Նախկինում ավելի շատ էի նեղսրտում, քան հիմա, ավելի ճիշտ, հիմա փորձում եմ այնպես անել, որ չնեղսրտեմ»,- ասաց նա:

Վերջերս Աիդան առաջին անգամ կարճ սանրվածք է արել: Ընդգծեց, որ դա անելու ցանկություն չուներ, բայց մազերը որակազրկվել էին, պետք է կտրեր: «Արեցի այդ քայլն առողջ մազեր ունենալու համար, բայց առաջին օրը չէի հավանում: Հետո մազերս սկսեցին ինձ դուր գալ, բայց հիմա սպասում եմ, թե երբ պետք է երկարեն: երբեք այսքան կարճ չեն եղել, ինձ երկար մազերն են դուր գալիս,- ասաց նա և հավելեց, որ հեռուստասերիալում այլ ոճում է հանդես գալիս, ընդգծված դիմահարդարում ունի,- Մարմնավորում եմ տարիքով ինձնից մեծ աղջկա, այդ տարբերությունը պետք է երևա, եթերում մեծ եմ երևում, ինչը գալիս է դիմահարդարումից, հագուստից: Վառ դիմահարդարում ենք անում, որ ստանանք կերպարը: Գալիս եմ տուն, մաքրում դիմահարդարումը, որ այդ նյութերը դեմքիս երկար չմնան: Ես գրեթե չեմ դիմահարդարվում, այդ պատճառով սկզբում չէի հարմարվում: Հիմա դա էլ է սովորական դարձել, աշխատանքիս մի մասն է»: