«Ընտանեկան ու սիրային հարցերում քիչ եմ զիջում, մեծ մասամբ կինս է առաջին քայլն անում»․ Ժակը՝ կնոջ և դուստրերի հետ հարաբերությունների, նեղացկոտ լինելու և ավագ դստեր պարփակվածության մասին

Հաղորդվար Ժակն ու կինը՝ Էվելինան, ամուսնացած են 2004 թվականից։ Զույգն ունի երկու դուստր՝ 16-ամյա Սիլվիան և 4,5 տարեկան Ժակլինը։  Tert.am Life-ի հետ զրույցում Ժակը խոսել է կնոջ հետ հարաբերությունների, նեղացկոտ լինելու և երեխաների մասին։

Ըստ նրա՝ այսքան տարի ընտանիքն ամուր հիմքերի վրա պահելը բարդ չէ, եթե երկու մարդ նույն ցանկություններն ունեն և նույն ուղղությամբ են շարժվում։ «Իհարկե, ինչպես բոլոր ընտանիքներում, մերում ևս դժվարություններ լինում են, բայց միասին կյանքն ապրելու ցանկությունը մեզ մոտ դոմինանտ է։ Այդ ցանկությանը խանգարող խնդիրներ դեռ չեն եղել։ Մեր խնդիրները հաղթահարելուն օգնում է մեր տեսակը, որովհետև կոնֆլիկտային մարդիկ չենք, դեպի լուծում ենք գնում, իրավիճակները հարթում։ Ես ընտանեկան ու սիրային հարցերում քիչ եմ զիջում, բայց կողքիս այնպիսի մարդ է, որը ճնշող մեծամասնությամբ առաջին քայլն է անում»,- ասաց նա։

Ժակի խոսքով՝ համաստեղությամբ կույս է, շատերն ասում են, որ բարդ բնավորությունը դրա հետ է կապված։

«Կարող եմ նկատել խնդիրը, միտումնավոր չմատնանշել, սպասել, որ չլուծեն, ես էլ ասեմ՝ տեսաք, այս խնդիրն էր, իսկ դուք չլուծեցիք։ Դա բացասական հատկանիշ է։ Նաև նեղացկոտ եմ, ուզում եմ իմ մտածածն ու պատկերացրածը շրջապատի մարդիկ ենթադրեն առանց իմ ասելու։ Այսքան տարվա ընթացքում բնավորությունս չի փոխվել, ուղղակի սկսել ենք իրար ավելի լավ ճանաչել ու հասկանալ։ Ես ու կինս որպես մարդիկ իրար նման ենք, բայց կինս իր մեջ շատ կյանք ունի, որով բոլորիս ապրեցնում է։ Հետաքրքիր է, որ աշխատանքի բերումով մարդիկ կարծում են, որ ես էլ եմ կենսախինդ, բայց գործի բնույթով եմ այդպիսին, գործից դուրս էներգիա չեմ ունենում, ինձ դա տալիս են հարազատ մարդիկ։ Ինձ բախտ է վիճակվել ունենալ այդպիսի կին ու երեխաներ»,- նշեց նա։

Հաղորդավարի ավագ դուստրը՝ Սիլվին, 16 տարեկան է։ Ժակի կարծիքով՝ վախենալու աստիճան իրեն է նման։ «Սիլվին պարփակված է, սիրում է նկարել, ստեղծագործել, իր ընկալումները խորն են։ Պարփակվածությունը եղել է փոքր տարիքից, կապված է ավելի շատ բնավորության, ոչ թե դեռահասության շրջանի հետ։ Փորձում եմ նրան տալ այն բանալիները, որոնք ինձ են օգնել ժամանակին։ Հանգիստ եմ, որ լավ մարդ է, բայց անհանգիստ եմ, որ իր ներսում դեռ փոթորիկներ են, չի կողմնորոշվում մասնագիտության հարցում։ Դե, շտապել պետք չէ։ Անընդհատ քննարկումների մեջ ենք, փորձում է այնպես անել, որ զբաղվի իր սիրելի մասնագիտությամբ և գումար վաստակի»,- պատմեց Ժակը։

Հաղորդավարը նկատեց, որ կրտսեր դուստրը՝ 4,5 տարեկան Ժակլինը, ավագ դստեր հակապատկերն է։ «Սիրում է շփվել, ուշադրության կենտրոնում լինել, մարդամոտ է։ Սիլվիան ևս շփվում է, բայց պետք է վստահ լինի, որ դիմացինը «վտանգավոր» չէ իր համար։ Սիլվիկն ինձ է նման, Ժակլինը կնոջս։ Ժակլինը նույնիսկ մեր բարեկամների ուրախությունն է, մարդիկ կան, որ լուսանկարները նայելով արդեն նրա երկրպագուն են։ Կրակոտ երեխա է, երաժշտություն է սիրում, ցուցադրական արվեստի ներկայացուցիչ եմ տեսնում իր մեջ։ Որտեղ հայտնվում է, իր մեծ ու սև աչքերով ուրախություն է բերում»,- ընդգծեց հայրիկը։

Ժակը նաև շեշտեց, որ դուստրերի հարաբերությունները միմյանց հետ շատ լավ են։ «Հետաքրքիր է, որ ես որպես հայր երկուսի դեպքում էլ զիջող եմ, Սիլվիկը կարող է քույրիկի հետ ավելի խիստ լինել, դե, տարիքային տարբերությունը բավականին մեծ է։ Լուրջ վիճաբանություններ դեռ չեն ունենում, բայց հաջողացնում են փոքրիկ վեճեր ունենալ, ամեն դեպքում, Սիլվիկը ևս դեռ երեխա է»,- եզրափակեց նա։