«Այդ եկեղեցում նաև ես եմ մկրտվել»․ Վարդան Հովսեփյանի որդու մկրտությունն իր 38-ամյակի օրը և կնքահոր ընտրությունը

Դերասան Վարդան Հովսեփյանի ու կինը՝ Կարինեն, օրերս՝ Վարդանի 38-ամյակի օրը, մկրտել են իրենց որդուն՝ Մաքսին, որը սեպտեմբերին կդառնա 3 տարեկան։ Tert.am Life-ի հետ զրույցում Վարդանը պատմել է մկրտության օրվա, կնքահոր ընտրության մասին։

Վարդանի խոսքով՝ Մաքսի կնքահայրը Ամերիկայի Միացյալ Նահանգներից պետք է Հայաստան գար և այստեղ էր լինելու հունիսին։ «Քանի որ ես էլ հունիսին եմ ծնվել, որոշեցինք երկու առիթը մեկ օրում անել։ Կնքահայրը վաղուց ընտրված չի եղել, ես ու կինս մտածում էինք, որ մեր երկրորդ որդու ծննդից հետո կմկրտենք երեխաներին (Զույգի երկրորդ երեխան կծնվի մոտ երկու ամսից, խմբ․ )։ Կնքահայրն ինքն առաջարկեց Մաքսի կնքահայրը լինել, ես էլ մեծ ուրախությամբ ընդունեցի առաջարկը։ Չեմ սիրում, երբ դու ես կնքահորն ընտրում, մանավանդ, երբ դա ոչ ոք չի մերժում։ Երբ կնքահայրն է առաջարկում, Աստծո օրհնությունն է։ Նա ընկերս է՝ Հարութ Բոգարյանը»,- ասաց նա։

Դերասանը պատմեց, որ մկրտությունը տեղի է ունեցել Մուղնու Սուրբ Գևորգ եկեղեցում։ «Այդտեղ մկրտվել եմ նաև ես, տեղի է ունեցել իմ ու կնոջս պսակադրությունը, Մաքսի 40 օրականի արարողակարգը։ Սուրբ Գևորգը դարձավ մեր ընտանեկան եկեղեցին, և քահանան որդուս մկրտության անունն էլ Գևորգ դրեց։ Մաքսը մկրտության ժամանակ իրեն շատ լավ պահեց, նույնիսկ նշխարը ստանալու ժամանակ էլ խելոք հետևում էր քահանային։ Միայն թե եկեղեցու մոմերն էր փչում, իհարկե, ես հետո բոլորը նորից վառեցի։ Նախապես զրուցել էինք իր հետ, բացատրել թե ուր ենք գնում և ինչի համար։ Ասել էինք, որ օրվա ամենակարևոր մարդն ինքն է լինելու»,- նշեց դերասանը։

Ըստ Վարդանի՝ խնջույք են կազմակերպել, որի սկզբում նախ մեկ րոպե լռությամբ հարգել են պատերազմում զոհված տղաների հիշատակը։ «Մեր մայրերին ուզում եմ ասել, որ պինդ լինեն,- ասաց նա և հավելեց, որ շնորհակալ է իր հյուրերին, որոնք մկրտության օրն իրեն հարգել և եկել էին,- Հյուրերը մի պահ մոռացել էին, որ իմ ծննդյան օրն է, այդպես էլ պետք է լիներ, որդիս պետք է առաջին պլանում լիներ։ Մենք քրիստոնյա ենք, պետք է բոլորս մկրտվենք ու ստանանք Աստծո օրհնությունը, ուրախ եմ, որ տղաս ստացավ այդ օրհնությունը»։

Դերասանը նկատեց, որ երջանիկ է։ «Ունեմ լավ ընտանիք, աշխատանք, մասնագիտություն, սիրված եմ հասարակության մի մասի կողմից։ Երջանկությունն էլ ո՞րն է, շատ գումա՞րը, իհարկե ոչ։ Դա, երբեմն, նույնիսկ պատուհաս է։ Հիմա իմ նպատակները կապված են երեխաներիս, նրանց կրթության ու ապագայի հետ։ Ուզում եմ նաև մասնագիտությանս մեջ ավելի աճել»,- ընդգծեց նա։

Վարդանն այս տարի դարձել է 38 տարեկան։ Շեշտեց, որ ընկերները չեն թողնում մեծանա։ «Ինձնից ավելի մեծ շատ ընկերներ ունեմ, որոնք շատ երիտասարդ են, իրենց էներգիան չի սպառվում։ Եթե 50-նն անց ընկերներս էներգիայով լի են, կյանքը սիրում են, ես, 38 տարեկան լինելով, ինչպես կարող եմ չսիրել։ Պետք է ամեն օրն ապրել սիրով ու էներգիայով լի, որ կյանքը հետաքրքիր լինի»,- եզրափակեց նա։