«Փոքր ժամանակ շատ բարդույթներ ունեի». Սրբուհի Ավանեսյանը՝ տունը վերանորոգելու համար 14 տարեկանում մատուցողուհի աշխատելու, Հնդկաստանում ունեցած աշխատանքի և սերիալներում չնկարահանվելու որոշման մասին

Երիտասարդ դերասանուհի, մոդել Սրբուհի Ավանեսյանը եթերում հաճախ չի երևում, բայց աշխատել սկսել է 14 տարեկանից: Tert.am Life-ի հետ զրույցում նա պատմել է տունը վերանորոգելու համար մատուցողուհի աշխատելու, իր բարդույթների, Հնդկաստանում աշխատելու և սերիալներում չնկարահանվելու որոշման մասին: 

Սրբուհու խոսքով՝ առաջին աշխատանքը 14 տարեկանում է արել, մանկական սրճարաններից մեկում աշխատել է որպես մատուցողուհի:

«Սկսեցի աշխատել ամառային արձակուրդներին, իսկ հետո առավոտյան դպրոց էի հաճախում, օրվա երկրորդ կեսին՝ աշխատանքի: Այդ տարիքից որոշեցի աշխատել, որովհետև մենք տուն էինք գնել, ուզում էի մայրիկիս օգնել տան վերանորոգման հարցում: Սրճարանի ամենափոքր աշխատողն էի, բայց այնքան լավ էի աշխատում, որ առաջարկեցին մենեջեր դառնալ: Չհամաձայնեցի, որովհետև ինձնից ավելի մեծ աշխատողներ կային, ես ամենափոքրն էի, նորմալ չէր լինի: Մայրս դեմ չէր, որ աշխատեի, նույնիսկ կողմ էր, իրեն լավ էր զգում, որ այդ տարիքում մտածում եմ իրեն օգնելու մասին»,- ասաց նա:

Ըստ դերասանուհու՝ նաև հոգնում էր, բայց նպատակ ուներ, որն իրեն ուժ էր տալիս: «Նպատակս կատարվեց, ունեցանք այն տունը, որի մասին երազում էինք: Հիշում եմ, որ 150.000 դրամ գումար էի հավաքել ու տվեցի մայրիկիս, այդ ժամանակ դա ինձ մեծ գումար էր թվում: Այդ աշխատանքի շնորհիվ ինքնավստահություն ձեռք բերեցի, ժամանակից շուտ մեծացա: Երբ 14 տարեկանում աշխատում ես, հասկանում ես կյանքի լրջությունը, փափուկ բարձերի մեջ չես մեծանում: Փոքրուց իմ մեջ պատասխանատվության զգացում կար իմ կյանքի, ընտանիքիս, ընկերներիս հանդեպ: Դա ինձ դեպի կայունացում էր տանում, պատրաստում կյանքին»,- նշեց նա:

Սրբուհին պատմեց, որ մատուցողուհի աշխատելուց հետո 16 տարեկանից տարբեր սուպերմարկետներում ակցիաներ է իրականացրել: «Քանի որ մինչև այդ որպես մատուցող էի աշխատել, շփում ունեցել տարբեր բնավորության տեր մարդկանց հետ, գիտեի, թե ում պետք է վաճառեմ տվյալ ապրանքը: Բարդությունների չեմ հանդիպել, մատուցողի աշխատանքն ինձ շատ է օգնել»,- նշեց Սրբուհին:

Դերասանուհին ասաց, որ այդ աշխատանքից հետո սկսել է մոդելինգով զբաղվել: «Ես փոքր ժամանակ շատ բարդույթներ ունեի, մայրս ինձ տարավ մոդելային մրցույթի, որպեսզի ապացուցի, որ ես լավն եմ: Մենակ եմ մեծացել, մայրս միշտ աշխատանքի է եղել, բակում, դպրոցում, շենքում ավելի շատ տղաների շրջանում ընկերներ ունեի, քան աղջիկների: Այդ ամենն ինձ փակել էր իմ մեջ, բարդույթներ առաջացրել: Գնացի մրցույթին, 100-ից անցա 14–ի մեջ: Դա ինչ-որ չափով բարձրացրեց ինքնագնահատականս, հասկանում էի, որ ես էլ եմ մոդել»,- պատմեց նա:

Սրբուհին նշեց, որ այդ մրցույթից հետո սկսել է մոդելինգով զբաղվել, 20 տարեկանում գնացել է Հնդկաստան՝ որպես մոդել աշխատելու: «Ընկերներիցս մեկը գնացել էր, ինձ էլ առաջարկեց: Մոտ մեկ տարի դեսպանատան հետ կապված խնդիր կար, չէր ստացվում մեկնել, բայց, ի վերջո, գնացի: 3 ամիս բնակվել եմ Հնդկաստանում, առաջին անգամ էի ինքնաթիռ նստում, մեկնում այլ երկիր: Կյանքիս լավագույն ամիսներն էին, ես էի ամեն ինչ բալանսավորում, սովորական առևտուրն էլ ինքնուրույն էի անում, ինձ համար պատրաստում: Զանգում էի մայրիկիս ու բաղադրատոմսեր հարցնում, որպեսզի ինձ համար ինչ–որ բան պատրաստեմ»,- հիշեց նա:

Դերասանուհին նաև պատմեց, որ դրանից հետո եկել է Հայաստան Ամանորը մայրիկի հետ նշելու համար: այդ շրջանում ստացած առաջարկը նրան պահել է Հայաստանում։

«Ինձ հրավիրեցին հեռուստասերիալում երրորդական կերպար խաղալու, երեք ամիս պետք է նկարահանվեի: Դրանից հետո պետք է մեկնեի Հայաստանից, քանի որ առաջարկ ունեի, բայց ստացվեց այնպես, որ ես դարձա գլխավոր հերոսուհի, նկարահանվեցի մեկ տարի: Հետո առաջարկեցին նկարահանվել «Սիրուն Սոնա» հեռուստասերիալում, դրանից հետո նկարահանվեցի «Սարի աղջիկ» սերիալում,– ասաց նա ու պատմեց, որ այժմ  աշխատում է «լաունջ բարերից» մեկում՝ որպես մենեջեր: –Այնպես չէ, որ միայն ֆինանսական կողմի համար եմ աշխատում որպես մենեջեր, ուղղակի չեմ ուզում հեռուստասերիալներում նկարահանվել: Սիրով կնկարահանվեմ գեղարվեստական ֆիլմերում, 16-25 մասանոց նախագծերում, բայց հոգնել եմ սերիալներից»: