«Եվա Բաղդասարյանը կադրն ավելի գեղեցկացրեց». Անդոն՝ նոր տեսահոլովակի հերոսների, իր կերպարի և Ռաֆայել Երանոսյանի հետ հարաբերությունների մասին

Դերասան Անդրանիկ Հարությունյանն օգոստոսի 1-ին լսարանի դատին կհանձնի իր նոր՝ «Տոթ ա» կոչվող երգի հիման վրա նկարահանված տեսահոլովակը: Tert.am Life-ի հետ զրույցում նա խոսել է նոր տեսահոլովակի, գլխավոր հերոսուհու և դերասան Ռաֆայել Երանոսյանի հետ հարաբերությունների մասին:

Երգի երաժշտության և խոսքերի հեղինակը Միսակ Ոսկանյանն է, գործիքավորումն արել են Մարտին Միրզոյանն ու Արամ Կիրակոսյանը:

«Ռիթմիկ, ամառային, պարային երգ է, վաղուցվա պատմություն չունի: Որոշել եմ «Բա չիմացա՞ք» ալբոմ ունենալ, որի մեջ կլինի նաև «Տոթ ա» երգը: Չեմ կարծում, որ երգն ուշացած է ամառվա համար, որովհետև «Լեդի Քոբուլեթի» երգի հիման վրա նկարահանված տեսահոլովակի պրեմիերան ևս օգոստոսի 1-ին է եղել: Դա չէր ազդել երգի հաջողության վրա, կապ չունի, որ ամռան ավարտին մեկ ամիս էր մնացել: Այս տեսահոլովակի հետ կապված վախեր չունեմ, բայց նախորդ՝ «Բա չիմացա՞ք» տեսահոլովակի հետ կապված ունեի, որովհետև քարոզարշավ էր, ֆուտբոլ, որոնք խանգարեցին տեսահոլովակի տարածվելուն: Հիմա նման հանգամանքներ չկան»,- ասաց նա:

Տեսահոլովակի ռեժիսորը Զոհրաբ Հայրապետյանն է, մոնտաժային աշխատանքներով զբաղվում է Հայկ Մկրտչյանը, Անդրանիկի խոսքով՝ տեսահոլովակում սյուժետային գիծ կա: «Երգը Սիրուշ տոտայի մասին է, որը քաղաքային տրանսպորտում տոթից վատանում է, այդ գծից սկսվում է տեսահոլովակը: Ընթացքում լողավազանային տեսարաններ են, որոնք Երևանում ենք նկարահանել: Վերջում Սիրուշ տոտան արթնանում է և տեսնում, որ երազ էր, նորից նույն տոթն է: Ես կերպարային փոփոխություն չեմ արել, ինքս ինձ եմ մարմնավորում: Ընթացքում պարբերաբար փոխվում է կերպարիս ոճը, դիտողներին չեմ ձանձրացնի»,- պատմեց նա:

Տեսահոլովակի գլխավոր հերոսուհիներից է նաև դերասանուհի Եվա Բաղդասարյանը: Ըստ դերասանի՝ նրան ընտրել են ինքն ու Զոհրաբը: «Եվային վաղուց եմ ճանաչում, նախկինում նրա հետ փոքրիկ գովազդային համագործակցություններ ենք ունեցել: Այս անգամ էլ հեշտությամբ աշխատեցինք, ամեն ինչ լավ ստացվեց: Բացի իմ գեղեցկությունը, Եվան կադրն ավելի գեղեցկացրեց»,- կատակեց Անդրանիկը:

Տեսահոլովակում նկարահանվել է նաև դուդուկահար Կամո Սեյրանյանը, բայց թե ինչ կերպարում, Անդրանիկը չցանկացավ բացահայտել նախքան տեսահոլովակի պրեմիերան:

Արդեն տևական ժամանակ է, ինչ Անդրանիկն ու դերասան Ռաֆայել Երանոսյանը միասին չեն ներկայանում: Դա խոսակցությունների առիթ է ստեղծում, որ նրանք վիճել են ու այլևս միասին չեն ներկայանա: Անդրառանալով այդ թեմային՝ Անդրանիկն ասաց. «Ես ու Ռաֆոն մեր տեսանյութերը տեղարդում ենք ընդհանուր յութուբյան էջում՝ չնայած այս փուլում առանձին աշխատանքներով ենք ներկայանում: Վերջերս խոսակցություններ եմ լսել նաև, որ քաղաքական թեմաների համար վիճել ենք, նույնիսկ հարվածել իրար: Նման բան չկա, ոչ մի թեմայով չենք վիճել: Անպայման հետագայում կրկին միասին հանդես կգանք»: