«Արթնացանք, տեսանք մաման տանն է, շոկի մեջ էինք»․ «Միսս Տիեզերք Արմենիա» Մոնիկա Գրիգորյանը՝ տարիների դադարից հետո մայրիկի վերադարձի և իրենց ընտանիքի վերամիավորման մասին

Tert.am Life–ն իր ընթերցողներին պատմել է, որ «Միսս Տիեզերք» գեղեցկության մրցույթում Հայաստանը ներկայացրած Մոնիկա Գրիգորյանը 4 տարի հեռու է եղել մայրիկից, քանի որ վերջինս մեկնել էր արտագնա աշխատանքի 3 երեխային ապահովելու համար։

Մոնիկայի ընտանեկան պատմությունը շատ դրամատիկ է, քանի որ աղջիկը 10 տարեկանում կորցրել է հորը, ինչից հետո թե՛ հոգեբանական, թե՛ սոցիալական բազմաթիվ խնդիրների է բախվել։

Տարիների բաժանումից հետո Մոնիկայի մայրը վերադարձել է Հայաստան, և նրանց ընտանիքը վերամիավորվել է։ Մայրիկի վերադարձից 4 օր անց, սակայն, Մոնիկան մեկնել է ԱՄՆ, որտեղ կմնա 20 օր։ Գեղեցկուհու տիտղոսակիրը Tert.am Life–ին պատմել է մայրիկի մատուցած անակնկալի, իրենց հույզերի և երջանկության մասին։

«Մենք գիտեինք, որ այս օրերին մաման գալու է, բայց նա մեզ չէր ասել ճիշտ օրն ու ժամը, որպեսզի անակնկալ մատուցի։ Մենք էինք ուզում օրն իմանալ, գնալ, իրեն անակնկալ մատուցել, բայց հակառակը ստացվեց, քանի որ տատիկս, մորաքույրս, մեր բոլոր բարեկամները շատ լավ պահել էին իր գաղտնիքը։ Եղբայրս իր գալուց օրեր առաջ մեկնել էր իր մոտ, որպեսզի օգներ, մասին գային։ Լուսադեմին՝ ժամը 5–ին, մաման եկել էր, ես ու քույրս քնած էինք։ Առավոտյան սուրճ էր դրել ու մեզ արթնացրեց․․․ Չեմ կարող պատմել՝ ինչ էր կատարվում մեզ հետ, արթնացել էինք ու մեր աչքերին չէինք հավատում, մաման տանն էր։ Շոկային վիճակ էր իմ ու քրոջս մոտ»,– պատմեց Մոնիկան։

Մոդելը փոքր–ինչ սրտնեղում է, որ ընդամենը 4 օր կարողացավ վայելել մայրիկի ներկայությունը, բայց և հասկանում է՝ 20 օրից կվերադառնա ու իր ընտանիքն արդեն ամբողջական կլինի։

«Մամայիս հասցրեցի 4 օր տեսնել, քանի որ մեկնեցի ԱՄՆ։ Որոշեցինք չգնալ Վանաձոր, հասկանում էինք, որ բոլոր բարեկամները կարոտել են, գալու են, բայց ուզում էինք իրար հետ ժամանակ անցկացնել։ Մնացինք Երևանում ու մեր ընտանիքով վայելեցինք իրար ներկայությունը։ Այդ օրերին աշխատում էի անընդհատ տանը լինել։  Փորձում էինք լրացնել այս տարիների բացը, բայց ժամանակը քիչ էր։ Քանի որ ինձ մոտ ճամպրուկային վիճակ էր, ամեն բան այնպես չստացվեց, ինչպես ես էլի ծրագրել, մի քիչ խառը իրավիճակ էր, բայց 20 օրով եմ մեկնել։ Մինչև իր գալը չէ պատկերացնում, որ ինձ համար այդքան դժվար կլինի մեկնելը։ Ափսոսանքս շատ էր, փորձում էի քիչ մտածել այդ մասին։ Ուզում եմ այս օրերը շուտ անցնեն, վերադառնամ, որ էլի միասին լինենք»,– պատմեց նա, ապա նկատեց, որ նույնիսկ նոր լուսանկար չեն հասցրել անել մայրիկի հետ։

Մոնիկան նկատեց, որ իրենց ընտանիքը պիտի օրացույցում առանձնացնի մայրիկի վերադարձի օրն ու միշտ տոնի․ չէ՞ որ հենց այդ օրվանից ընտանիքը կրկին միավորվեց ու արդեն միշտ միասին են լինելու։

«Զգացողություններն իրոք անբացատրելի են թե՛ իմ, քրոջս, եղբորս համար, թե՛ մամայիս, որ 4 տարի հեռու է եղել իր 3 երեխայից, իսկ հիմա միացել է։ Չեմ կարող բառերով բացատրել՝ ինչ էր կատարվում մեր ընտանիքում։ Դրանք ամենաերջանիկ 3-4 օրերից էին»,– ասաց նա։

Ավելի վաղ Մոնիկան մեզ հետ զրույցում նաև ասել էր, որ մայրն աշխատանքի հստակ հեռանկարով չի վերադառնում, բայց ինքը վստահ է՝ եթե միասին լինեն, աշխատանք հաստատ կգտնվի։ «4 տարի իրարից հեռու ապրելը բոլորիս համար շատ դժվար էր, հատկապես, մայրիկիս, որովհետև մենք գոնե իրար հետ էինք՝ երեքով, մայրիկս մենակ էր։ Այս տարիների ընթացքում մեզնից ոչ ոք չէր սովորել կարոտին ու հեռավորությանը։ Իհարկե, հիմա լավ էր, տեսազանգերի շնորհիվ ամեն րոպե կապի մեջ էինք մայրիկի հետ, սակայն այդպես էլ չէինք սովորել հեռավորությանը»,– ասել էր նա։