«Գործ չկա»․ Աղաս Մանուկյանի նոր ներկայացման պրեմիերան ու հայտնի հյուրերը

15:11 • 20.11.21

Շոուբիզնես

«Գործ չկա»․ այսպես է կոչվում դերասան Աղաս Մանուկյանի նոր սթենդափը, որը նրա պատասխանն է «Գործ կա» հեշթեգին և ներկայացնում աշխատանքի փնտրտուքի նրա պատմությունները, երբ դեռ հեռուստատեսություն չէր հասել։

Tert.am Life–ը ներկա է եղել պրեմիերային և ներկայացնում է հետաքրքիր դրվագները։

Ներկայացումից առաջ Աղասը շատ հուզված էր, միաժամանակ նկատեց, որ մեծ ինքնավստահություն ունի։ «Այս ներկայացումից առաջ ներկայացրել էի «Աղասի 10 կանայք» սթենդափը, որը մի քանի անգամ խաղացի և շուտ փակեցի։ Սցենարը լավն էր, բայց իմը չէր, դրա համար թիմի հետ որոշեցինք դնել կողքի ու գրել նոր սցենար։ Անկեղծ ասած, այդ ներկայացումը ձախողում եմ համարում, բայց ոչ թե սցենարի, այլ իմ տեսանկյունից։ Պարզապես իմ սցենարը ես պետք է գրեմ, որպեսզի կարողանամ ճիշտ մատուցել։ Այն դեպքում կար լավ սցենարը, որը ես ճիշտ չէի մատուցում»,– անկեղծացավ դերասանն ու նշեց, որ մտավախություն ուներ, որ «10 կանայքի» արձագանքները կազդեն այս ներկայացման վրա, սակայն պրեմիերայից 2 օր առաջ արդեն բոլոր տոմսերը սպառված էին։

Աղասը մեծ ոգևորությամբ է խոսում նոր սցենարի մասին։ Վստահ է՝ բեմում իմպրովիզների պակաս էլ չի լինի, քանի որ սա իր կյանքի պատմությունն է․ «Գրեցինք շատ ծիծաղելի, շատ լավ սցենար, որն իմ կյանքի իրական պատմություններից է, որովհետև ես մինչև հեռուստատեսությունում աշխատանքի անցնելը Վանաձորում փորձում էի տարբեր տեղեր աշխատանքի անցնել ու չէր ստացվում կամ ստացվում էր զավեշտալի պատմություն։ Այդ մասին էլ պատմում եմ։ Հիմա անընդհատ տեսնում եմ «Գործ կա» հեշթեգը ու մտածում եմ՝ ինչու այն ժամանակ, երբ ես էի փնտրում, գործ չկար»։

Աղասը նաև նկատեց, որ այս ներկայացումը խաղալիս չի ցանկանում բեմից իջնել։ ««Ա ընչի համար»–ի ժամանակ ես էլի չէի ուզում բեմից իջնել, «10 կանայքի» ժամանակ բեմում րոպեներն էի հաշվում, երբ պետք է ավարտվի, ազատվեմ այդ մղձավանջից։ Ես հասկանում էի, որ իմը չէր, ինձ մոտ այդ տեսքտը լավ չէր ստացվում, ուղղակի խաղում էի, քանի որ մեծ գումար էինք ծախսել, փորձում էի գոնե դա հետ բերել, իսկ «Գործ չկա»–ն լրիվ այլ հաճույքով եմ խաղում, որովհետև իմն է։ Նորից չեմ ուզում բեմից իջնել»,– պատմեց նա։