Իննա Խոջամիրյանի վթարը Եվրոպայում, տուգանքն ու միայնակ հանգստի մեկնելու որոշումը

15:24 • 05.03.22

Շոուբիզնես

Դերասանուհի Իննա Խոջամիրյանն օրերս է վերադարձել Եվրոպայում հանգստից: Tert.am Life-ի հետ զրույցում նա պատմել է, թե ինչպես է անցել հանգիստը, ինչպես է հասցրել վթարի ենթարկվել, տուգանվել և արկածներ ունենալ Եվրոպայում:

«Ակտիվ հանգիստն էապես հանգիստ համարել չի կարելի: Գնում ես ոչ թե լիցքաթափվելու, այլ բացահայտելու, լցվելու, տասնյակ կիլոմետրեր քայլելու, մոլորվելու, փնտրելու... Հրաշալի էր: Ես ճամփորդելու հարցում ագահ եմ, ինչ խոսք: Որոշել էի մեկնել Պորտուգալիա, սակայն հանգամանքների բերումով չեղարկվեց: Երևի դեռ ժամանակը չէր: Առաջինը, ինչ միտքս եկավ Լիսաբոնի փոխարեն` Պրահան էր: Չեմ կարող ասել ինչու, ասոցիատիվ, որոշում էր»,- պատմեց Իննան ու հավելեց, որ որոշել է այնտեղից էլ մեկնել Գերմանիա՝ Դրեզդեն:

Դերասանուհին միայնակ էր մեկնում ճամփորդության, նրա խոսքով՝ սա առաջին դեպքը չէր. «Առաջին անգամ չէ, որ մենակ եմ ճամփորդում... Եվ առհասարակ 2020-ից հետո շատ ավելի մենակյաց եմ, քան կայի: Ընտանիքս ինձ վստահում է. գիտեն` մոլորակի մյուս ծայրին էլ գլխիս ճարը կտեսնեմ, կքչփորեմ, կգտնեմ՝ ինչ պետք է ու, ամենակարևորը, ապահով եմ և միշտ զգոն: Այնուամենայնիվ, մենակ ճամփորդելը մի վտանգավոր ասպեկտ ունի, որն իրեն զգացնել է տալիս. այն սկսում է քեզ դուր գալ»:

Համացանցում բոլորի քննարկման առարկան էր դարձել հարցը, թե ով է լուսանկարում Իննային, եթե մենակ է: Դերասանուհին այս թեմային կատակով էր անդրադառնում, սակայն հաշվի առնելով հետաքրքրությունը՝ որոշեց բացահայտել պատասխանը. «Չեմ չափազանցնի, թե ասեմ, որ 2000-ից ավել նամակ եմ ստացել այդ օրերին՝ «բա որ մենակ ես գնացել, քեզ ո՞վ է նկարում» հարցով: Երևի ամենաճիշտն է պատասխանել այդ հարցին ի վերջո, եթե այդքան հետաքրքիր է:) 2 օրով ինձ միացավ քույրս, ով ապրում է Վիեննայում: Նկարներիս մեծ մասի հեղինակը նա է: Իսկ երբ մենակ եմ լինում, չեմ սրտնեղում իմ նման միայնակ տուրիստներին խնդրել նկարել ինձ: Ես էլ նրանց եմ նկարում»:

Իննայի հետևորդները գիտեն, որ նրա ճամփորդություններն առանց արկածների չեն անցնում: «Ճամփորդությունները միշտ հիշարժան են, միշտ, բայց չգիտես ինչի ամենաշատը տպավորվում են ամենադաժան պահերը: Վերջին օրվա ձախորդությունները սկսեցին նրանից, որ Գերմանիայից Պրահա վերադառնալուց հետո որոշեցի ոչ թե միանգամից օդանավակայան գնալ, այլ հասնել Պրահայի կենտրոն ` իրենց ավանդական քաղցրավենիքը՝ տրդելնիկ ուտելու: Բկլիկ եմ, ընկա քաղցրավենիքի հետևից, ու «պատժվեցի»: Վերադառնալուս օրը վթարի եմ ենթարկվել, նաև տուգանել են: Օդանավակայան գնալիս իմ մեքենային հարվածեց հանդիպակաց եկող մեքենան: Իսկ տուգանեցին, որովհետև տրանսպորտի կտրոնը գնել էի, բայց մոռացել էի ակտիվացնել, տուգանքի չափը մեծացավ, որովհետև վեճի բռնվեցի ինձ տուգանելու համար»,- ժպիտով պատմեց Իննան ու հավելեց, որ այդքանով ամեն բան չի ավարտվել:

Դերասանուհին բավականին վախեցել է թռիչքի ժամանակ. «Վթարային թռիչք ենք ունեցել մինչև Ֆրանկֆուրտ, ծանր էր նաև Երևան վերադառնալու թռիչքը: Մի պահ մտովի հարազատներիս հրաժեշտ տվեցի. հիմա հիշում եմ ու հասկանում՝ մահվան վախն ինչ ծիծաղելի ու ահասարսուռ բան է: Այս պահին, վերջին իրադարձությամբ պայմանավորված, մի փոքր սկսել եմ վախենալ թռիչքներից»:

Այս տարի սա Իննայի երկրորդ ճամփորդությունն է: Դերասանուհու խոսքով՝ այս հարցում «ագահ» է «Տպավորություն է , թե անվերջ հանգստի կարիք ունեմ: Ես իսկապես վերջին 5 տարվա ընթացքում չեմ հանգստացել բոլորովին, իմ գրաֆիկի ու ծանրաբեռնվածության պայմաններում: Ճամփորդությունը, իհարկե, նոր շունչ տվեց, բայց հիմա էլ վերադարձել ու մտածում եմ` ինչ լավ կլիներ մի քանի օրով ծովափնյա հանգստի գնալ: Երես չեմ առնում, Աստված առաջ»:

Այս շրջանում Իննան չի նկարահանվում նոր նախագծերում: «Եթերային դադարի մեջ եմ: 2022-ի սկզբին ստացած բոլոր առաջարկներից հրաժարվել եմ, դեռևս: Վերականգնվում եմ... Չեմ կարող ասե՝լ ինչքան կտևի, բայց փոխարենը` վերադառնալիս ես կլինեմ ավելի մարտական, ավելի պատրաստակամ, կհասցնեմ կարոտել, հուսով եմ նաև ինձ կկարոտեն, թարմություն կբերեմ ու նոր ասելիք»,- եզրափակեց նա:

Հեղինակ Ամալյա Հովհաննիսյան