«Մի եթերաշրջանի նկարահանման գումարով կարող էինք Երևանի կենտրոնում տուն գնել». Վարդան Սարգսյանի վտանգավոր նկարահանումները Եթովպիայում

Մարտի 13-ից «Արմենիա TV»-ի եթերում մեկնարկում է Վարդան Սարգսյանի «Աշխարհի համերով» նախագծի նոր եթերաշրջանը: Tert.am Life-ի հետ զրույցում Վարդանը պատմել է, որ էքստրեմալ և բարդ նկարահանումներ է ունեցել, բայց հեռուստադիտողները ձանձրանալու վայրկյան չեն ունենա:

«Մեկնել էի Եթովպիա, որտեղ շատ լուրջ արարողություն է տղայի՝ ամուսնության պատրաստվելը, սակայն տարվա ընթացքում մի քանի անգամ է լինում, քանի որ ամեն ընտանիք չէ, որ ֆինանսապես կարող է իրեն թույլ տալ պահպանել ավանդույթը: Բոլորին հավաքում են հրապարակում, գարեջուր, սուրճ հյուրասիրում: Մեր բախտն ուղղակի բերեց, որ այնտեղ գտնվելու օրերին նման արարողություն եղավ»,- պատմեց Վարդանը:

Հաղորդավարը մանրամասնեց արարողությունն ու նկատեց, որ, չնայած վայրի ցեղերի հետ շփման փորձին, ամեն անգամ իր համար նոր բացահայտումներ է անում:

«Իրենք ցուլերին բերում են հարապարակ, և տղան պետք է նրանց վրայով թռչելով անցնի: Հաշվի առնելով ցուլերի ըմբոստությունը՝ դա շատ բարդ է, բայց եթե հանկարծ տղան ընկնի, դա խայտառակություն է իր և ընտանիքի համար: Համարվում է, որ նա դեռ պարաստ չէ ամուսնության: Այս փորձությունն անցնելուց հետո է միայն տղան իրավունք ստանում ընտրելու աղջիկ և ամուսնանալու: Իրենց ավանդույթները մեզ համար շատ տարօրինակ են: Աղջիկներին էլ բերում են հրապարակ ու ծեծում՝ այդպիսով որոշելով, թե նա որքանով դիմացկուն կին կլինի: Հետաքրքիր է, որ աղջիկներն իրենք են ուզում, որպեսզի իրենց ավելի ուժեղ հարվածեն, եթե հարվածը թույլ է, վիրավորվում են: Արյունլվա են լինում, բայց հաճույք են ստանում այդ պրոցեսից», - ասաց Վարդանը ու հավելեց, որ թողարկումն այնքան հագեցած է, որ այս անգամ տևելու է 50 րոպե:

Վարդանը նկատեց, որ հաճախ իրենց համար շատ ռիսկային է նկարահանումներ անելը, հատկապես, երբ շփվում է վայրի մարդկանց հետ. «Մենք անպայման ունենում ենք անվտանգության աշխատակիցներ, բայց շատ կարևոր է այդ մարդկանց հետ շփման մեջ քեզ ճիշտ դրսևորելը: Օրինակ՝ այդ օրը իրենք գարեջուր էին խմում, որը մեր իմացած գարեջուրը չէ, շատ զզվելի մի բան է, բայց եթե չխմես իրենց կվիրավորես, վտանգավոր է: Զզվելով մի կում փորձում ես: Իրենք առանց այդ էլ ադեկլվատը չեն, շատ ավելի վտանգավոր են դառնում, երբ գինովցած են»:

Եթովպիայից վերադառնալուց օրեր անց Վարդանը մեկնել է Մարոկկո, Մարոկկոյից կվերադառնա ու կմեկնի Եգիպտոս: Խոստովանում է՝ թռիչքները շատ հոգնեցուցիչ են:Հաղորդավարը շեշտեց, որ այսքան ճամփորդելով հանդերձ հանգստանալու րոպե չի ունենում:

«Նկարանումները ոչ միայն անսովոր են, այլև շատ բարդ: Մենք առանց հաց ուտելու և հանգստի  նկարահանում ենք, քանի որ սա ֆիլմ չէ, որ որևէ դրվագ կրկնեն, եթե մի պահ բաց թողնենք, կարող ենք կորցնել թելը: Ես հնարավորն անում եմ նկարահանելու այն, ինչ մարդկանց հետաքրքիր է: Ամեն եթերաշրջանից առաջ ընտրում եմ մայրցամաքը, ուր պետք է գնանք, ապա երկիրը, որտեղ շատ ավելի հետաքրքիր փաստեր կան: Վստահ կարող եմ ասել, որ «Աշխարհի համերովը» հայկական հեռուստատեսության ճամփորդական նախագծերի պատմության մեջ ամենաթանկն է: Մի եթերաշրջանի նկարահանմամբ կարող էինք բնակարան գնել Երևանի կենտրոնում»,- եզրափակեց նա: