Վարուժան Մարգարյանի արտաքին փոփոխությունը նոր դերի համար և սիրահարվածությունը

14:57 • 18.03.22

Շոուբիզնես

Դերասան Վարուժան Մարգարյանն այս շրջանում նկարահանվում է Ելենա Արշակյանի թիմի «Լքված ամրոցի պահապանները» հեռուստասերիալում: Tert.am Life-ի հետ զրույցում դերասանը պատմել է իր մարմնավորած կերպարի, արտաքին փոփոխությունների, թատրոնում աշխատանքի և անձնական կյանքի մասին:

«Հեռուստասերիալում իմ կերպարը հայտնվելու է մի փոքր ավելի ուշ: Մարմնավորում եմ գիշերօթիկ դպրոցի տնօրենի տղային,- ասաց Վարուժանը և հավելեց, որ այս պահին հստակ չի կարող բնութագրել կերպարին:- Դրական կամ բացասական կերպարի որակավորում կարող է տալ հեռուստադիտողը: Իմ մասնակցությամբ առաջին տեսարանը հետաքրքիր հանգուցալուծումներ ունի»:

Վարուժանն այս դերում հանդես է գալու կերպարային փոփոխություններով: «Արտաքին փոփոխություններ ենք արել, նոր սանրվածքով և մորուքով եմ: Առօրյայում սկսել եմ դնել օպտիկական ակնոց, որոշեցինք, որ կերպարս էլ հանդես գա այդ տեսքով», - ասաց դերասանը:

Նոր կերպարը մարմնավորել Վարուժանը սկսում է «Բեկորներ» հեռուստասերիալի ավարտից մեկ ամիս անց: Ըստ դերասանի՝ կարևոր է կերպարների տարբերությունն ընդգծելը. «Նախորդ նախագծի ավարտից հետո դադար եղել է, բայց կարճատև: կարևոր է, որ մարմնավորածս կերպարները տարբերվեն իրարից, խաղս՝ հղկվի: Երկու նախագծում էլ դու ես խաղում, պետք է նմանություններ չլինեն, մի կերպարդ մյուս հետ չասոցացվի»:

Նրա խոսքով՝ մասնագիտությունը պահանջում է անըդնհատ փոփոխություններ, հեռուստադիտողը չպետք է հոգնի դերասանից, նրա մարմնավորած կերպարներից:

«Այս մասնագիտության մեջ չկան սանդղակներ, միշտ կա աճելու տեղ, նոր կերպար: Այս ոլորտում անհնար է հասնել գագաթնակետի, հենց դա է ինձ գրավում: Դերասանը մինչև իր կյանքի վերջ պետք է աշխատի իր վրա, քանի որ միշտ բացահայտելու բան կա,- ասաց Վարուժանը և նկատեց, որ այս մասին խոսելիս հիշում է ոլորտի իր էտալոններից մեկին՝ Եվգենի Լեոնովին:- Իր «Նամակներ տղայիս համար» գրքում խոսվում է իր անցած ուղու, դժվարությունների, պատկերացումների մասին դերասանության ոլորտում: Կյանքի տարբեր փուլերում միշտ մտաբերում եմ այդ գրքից տողեր, որոնք ժամանակի ընթացքում ուղղակիորեն դարձել են ինձ հոգեհարազատ»:

Դերասանի խոսքով՝ իր ամենասիրելի դերը եղել է «Երկուսով» հեռուստասերիալում Սամվելի կերպարը. «Այդ կերպարի հետ երկար ճանապարհ եմ անցել, շատ բան եմ սովորել այդ դերը խաղալիս: Իմ և այդ կերպարի նմանությունը «մունաթ»-ն է, ինչը դարձրել էինք կերպարի այցեքարտը: Դա ինձ դուր էր գալիս՝ չնայած հիմա փորձում եմ շտկել բնավորության այդ գիծս»:

Հեռուստասերիալներում նկարվելուց զատ Վարուժանը խաղում է Տիկնիկային թատրոնում և Թատրոն տանիքում այլընտրանքային թատրոնում: «Ես դեռևս շատ ներկայացումներում չեմ խաղացել, բայց իր տեսակով ինձ համար ուրիշ է Տիկնիկային թատրոնի «Երեք քույրը» Չեխովի ներկայացումը, որտեղ մարմնավորում եմ քույրերի եղբոր կերպարը: Այն ինձ շատ է դուր գալիս,- ասաց դերասանը և ընդգծեց՝ կերպարն իր համար առ այսօր չբացահայտված է: Ամեն բեմ բարձրանալիս հոգեպես այլ կերպ եմ վերաբերվել կերպարին՝ կախված իմ կյանքում կատարվող իրադարձություններից»:

«Թատրոն Տանիքում»-ն էլ դերասանի հնարավորություն է տալիս խաղալ բաց երկնքի տակ: «Այս ձևաչափն ինձ համար շատ հետաքրքիր փորձ էր: Խաղում էինք «Մեծն Գեթսբի» ներկայացումը, որտեղ ես մարմնավորում էի պատմիչի դերը: Ներկայացումներից մեկի ժամանակ սկսեց անտանելի ուժեղ անձրև ու կարկուտ տեղալ: Դա իմ կյանքի ամենաերջանիկ օրերից մեկն էր, երբ ամբողջովին թրջված շարունակում էինք խաղալ, հանդիսատեսն էլ չէր գնում ՝ կլանված դիտում էին ներկայացումը: Այդ օրվա էյֆորիան աննկարագրելի էր»,- պատմեց Վարուժանը:

Թատրո՞ն, թե՞ կինո, հարցին դերասանը շատ դժվարությամբ պատասխանեց. «Իմ բախտը բերել է այդ հարցում, քանի որ հիմա երկուսում էլ ներկայանում եմ: Սակայն եթե դիտարկենք որպես երկընտրանք, ապա թատրոն, քանի որ թատրոնում անհնար է «ժանգոտել» կամ կորցնել ինքնությունդ»:

Վերջին շրջանում դերասանի անձնական կյանքը ևս լսարանի ուշադրության կենտրոնում էր: Սոցիալական ցանցերում Վարուժանը կատակել էր, որ մի քանի անգամ եղել է քավոր, բայց առանց քավորկնոջ: Հարցին՝ հիմա սիրահարվա՞ծ է, թե՞ ոչ, նա պատասխանեց. «Ես միշտ սիրահարված եմ. դա ինձ օգնում է իմ գործում: Սիրահարված ժամանակ էմոցիոնալ դաշտդ ակտիվ է լինում, իսկ դերասանի համար դա կարևոր է: Ազա՞տ է սիրտս, թե՞ ոչ, այս պահին թող գաղտնիք մնա, կարծում եմ՝ այդպես ավելի լավ է»:

Թերեզա Հովհաննիսյան