«Առաջին անգամ եմ խաղում ոչ թե դպրոցականի, այլ իմ տարիքի տղայի դեր». Բոնին՝ նոր կերպարի, դժվարությունների և տարիքի մասին

Դերասան   Վահե Բեգլարյանը՝ Բոնին, այս շրջանում նկարահանվում է «Հյուրեր անցյալից» նոր սիթքոմում: Tert.am Life-ի հետ զրույցում դերասանը մեծ ոգևորությամբ է խոսել նախագծի մասին, քանի որ առաջին անգամ հնարավորություն ունի խաղալու ոչ թե դեռահասի, այլ իր հասակակցի՝ 28-ամյա երիտասարդի դեր:

«Սիթքոմում մարմնավորում եմ բացասական կերպար: Այսպիսի կերպար խաղալու առաջին փորձս է: Իրադարձությունները զարգանում են 10-րդ դարում, ստրուկի կերպարով եմ: Գիտական փորձի արդյունքում ես հայտնվում եմ 21-րդ դարում՝ Երևանում: Սիթքոմի սկզբում կերպարն ակնհայտ բացասական է, կարճ ասած, «աֆերիստ», որն անըդնհատ մտածում է՝ ինչպես խաբել և չբռնվել»,- ասաց դերասանը և նշեց, որ հնարավոր է ժամանակի ընթացքում հեռուստադիտողը փոխի պատկերացումները կերպարի մասին:

Վահեն նշեց, որ 10-րդ դարի կերպար խաղալն առաջացնում է դժվարություններ, բայց դրանք հաղթահարելի են: «Առաջին դժվարությունը կապված է հագուստի  հետ: Մենք հագնում ենք զրահներ, բռնում զենքեր, որոնցով շարժվելը, նստելը կամ ակտիվ ինչ-որ ֆիզիկական գործողություններ անելը բարդ է, բայց հաղթահարելի»,- ասաց դերասանը:

Նրա խոսքով՝ մինչև նկարահանումները սկսելն նախապատրաստական աշխատանքներ են տարել, որպեսզի կարողանան ճիշտ գործածել զենքն ու զրահը, որոնք բնորոշ են տվյալ ժամանակաշրջանին: «Ես սովորել եմ ճիշտ նետով կրակելու ձևը, որպեսզի ամեն բան բնական ստացվի: Մյուս դերասանները ևս անցել են պատրաստումներ»,- պատմեց նա:

Իր մարմնավորած կերպարի մասին խոսելիս դերասանը նշեց, որ ցանկանում էին արտաքին փոփոխություններ անել, բայց ավելացրել են միայն մեկ դետալ. «Դեմքիս խալ ենք ավելացրել, թրաշս է անխնամ վիճակում, ինչը բնորոշ է տվյալ ժամանակաշրջանին: Մտածում էինք սանրվածքի փոփոխության, օրինակ, կեղծամ դնելու կամ մորուքը երկարացնելու մասին, բայց կանգ առանք այդ փոքրիկ դետալի վրա»:

Դերասանը շեշտեց, որ վերջապես մարմնավորում է կերպարի, որի տարիքը համապատասխանում է իր իրական տարիքին: «Նախկինում մարմնավորել եմ դպրոցականների, որոնցից 8-9 տարի մեծ եմ, իսկ հիմա իմ կերպարը 28 տարեկան է»,- ասաց նա:

Դերասանը խոսեց նաև Մկրտիչ Արզումանյանի հետ համագործակցության մասին: «Մկոն իմ մանկության դերասաններից է, ես նրան շատ եմ սիրում՝ մեծացել եմ «Կարգին հաղորդում» նայելով, իսկ հիմա աշխատում եմ նրա հետ նույն խաղահրապարակում, ինչը մոտիվացնող է»,- պատմեց դերասանը:

Թերեզա Հովհաննիսյան