«Պերմանենտ դիմահարդարումը թույլ է տալիս մարդկանց գեղեցիկ և կոկիկ տեսքով արթնանալ». Նանոր Թանգուկյանը՝ պերմանենտ դիմահարդարման մասին (լուսանկարներ)

Կոկիկ և խնամված տեսքի կարևոր բաղադրիչներից է դիմահարդարումը: Ժամանակակից գեղեցկության ծառայությունները թույլ են տալիս 24/7 ռեժիմով ունենալ այնպիսի տեսք, ասես հենց նոր ես դուրս եկել գեղեցկության սրահից։ Նմանօրինակ հնարավորությունն ընձեռնում է պերմանենտ (երկարաժամկետ) դիմահարդարումը: Վերջին տարիների ընթացքում պերմանենտ դիմահարդարումը պահանջված է դարձել նաև Հայաստանում, որտեղ դիմահարդարման այս տարբերակի հիմքը դրել է տարիներ առաջ Սիրիայից Հայաստան տեղափոխված Նանոր Թանգուկյանը: Գործունեության ընթացքում Նանորը ոչ միայն մատուցել է նմանօրինակ ծառայություններ, այլև հիմնադրել է իր մասնագիտացված սրահը՝ Nanor Tangoukian PMU Academy-ն, որի շրջանակներում պերմանենտ ծառայություններ մատուցելուց զատ նաև վարել է անհատական դասընթացներ սկսնակ մասնագետների և փորձառու պերմանենտ մեյք ափի մասնագետների հետ:

Tert.am Life-ի հետ զրույցում Նանոր Թանգուկյանը պատմել է պերմանենտ դիմահարդարման, սպասվող դասընթացների, ծառայությունների և Հայաստան վերադառնալու մասին:

-Ինչպե՞ս որոշեցիք զբաղվել այս մասնագիտությամբ

-Առաջին մասնագիտությամբ ես գրաֆիկ դիզայներ եմ և ի սկզբանե ունեցել եմ պատկերացումներ գունատեսության, կոմպոզիցիայի և առհասարակ գեղեցիկի մասին, բայց անկեղծ կլինեմ և կասեմ, որ համակարգչի հետ աշխատանքն ինձ այդքան էլ դուր չի գալիս, քանի որ մարդկանց հետ աշխատելն ավելի հետաքրքիր է և գրավիչ ինձ համար: Դիմահարդարումն ինքնին շատ եմ սիրում, և որոշեցի պրոֆեսիոնալ մակարդակով զբաղվել այս գործով ու գնացի Լիբանանում դասընթացների բարձրակարգ մասնագետի մոտ, որն էլ նկատեց իմ ձեռագիրը՝ ասելով, որ մանրակրկիտ աշխատանքն ինձ մոտ լավ է ստացվում և պետք է փորձեմ պերմանենտ դիմահարդարում սովորել: Սկսեցի սովորել ու հասկացա, որ իսկապես այս դետալային և մանրակրկիտ աշխատանքն ինձ դուր է գալիս և ինչն ամենակարևորն է՝ բավականին լավ է ստացվում: Ես ձգտում եմ լինել լավագույնն ու որակյալ աշխատանք մատուցել, սկսեցի մասնակցել միջազգային կոնֆերանսների, տարվա ընթացքում մի քանի անգամ վերապատրաստվում եմ լավագույն մասնագետների մոտ:

-Ի՞նչ է իրենից ենթադրում պերմանենտ դիմահարդարումը և ի՞նչ նյութերով է այն իրականացվում

-Պերմանենտ նշանակում է երկարաժամկետ և հետևաբար նման դիմահարդարման հիմքը դաջվածքն է, որի արդյունքում համապատասխան ներկը ներարկվում է մաշկի վերին շերտ, իսկ արդյունքը պահպանվում է երկարաժամկետ: Պերմանենտ դիմահարդարումն այժմ ունի մեծ պահանջարկ, ոլորտը շատ է զարգացել: Նախկին դաջվածք ասվածը մնում էր ամբողջ կյանքում, իսկ ճիշտ նյութերով արված պերմանենտ դիմահարդարումը 1-2 տարի: Պերմանենտ դիմահարդարման պարագայում պետք է աշխատել միներալ նյութերով, որոնք վնաս չեն հասցնում մաշկին և օրգանիզմին, երբ օգտագործվում են սինթետիկ նյութեր, ներկի գույնը տարիների հետ փոփոխվում է՝ կարմրում կամ կանաչում: Մենք հումքը ներմուծում ենք Գերմանիայից, արտադրում ենք նաև մեր ներկերը, որոնք արդեն շատ պահանջված են Հայաստանում:

-Ինչո՞ւ է ներկը պահպանվում առավելագույնը 2 տարի

-Միներալ նյութերն «ինտեգրվում են» մաշկին, քանի որ հումքն ամբողջությամբ բնական է և կախված օրգանիզմից՝ 1-2 տարվա ընթացքում «մաքրվու», իսկ սինթետիկ նյութերի պարագայում նյութը մնում է, գույնը փոխվում է՝ դառնալով անբնական: Այս դիմահարդարման առավելություններից է հենց բնական տեսքի պահպանումն ու գեղեցկության ընդգծումը՝ հնարավորություն տալով մարդկանց գեղեցիկ արթնանալ և անգամ լողավազանում ունենալ ընդգծված հոնքեր և շրթունքներ:

-Այս պրոցեդուրայում կա՞ն տարիքային սահմանափակումներ, ովքե՞ր են ձեր հիմնական հաճախորդները

-Պերմանենտ դիմահարդարումը չունի տարիքային սահմանափակումներ, բայց հիմնական այցելուները 30+ կանայք են, քանի որ տարիքի հետ, օրինակ, խունանում են շրթունքներն ու թուլանում է պիգմենտացիան, մենք ընդգծում ենք այն, շատ պահանջված է հոնքերի պերմանենտ դիմահարդարումը և մենք համապատասխան տեխնիկայի օգնությամբ կարողանում ենք կոկիկ և բնական տեսք ստանալ: Մենք նաև հեռացնում ենք նյութերը հատուկ տեխնիկայով և պետք է նշեմ, որ միներալ նյութեր հեռացնելը ևս ավելի հեշտ է: Երիտասարդներ ևս դիմում են հիմնականում ֆորմաների շտկման նպատակով, բացի այդ մենք նաև ունենք հոնքերի և թարթիչների լամինացիա, ինչն այժմ ևս մեծ պահանջարկ է վայելում:

-Ի՞նչ ծառայություններ կան ձեր գեղեցկության սրահում

-Արդեն 3 տարի է, ինչ կա հենց այս կենտրոնը, որի հիմնական ուղղվածությունը պերմանենտ դիմահարդարումն է. Այն իրենից ենթադրում է հոնքերի, շուրթերի, գլխի, թարթիչների և բժշկական դաջվածք, թարթիչների և հոնքերի լամինացիա, նաև՝ լիցք: Պերմանենտ դիմահարդարման շնորհիվ մենք նաև կարողանում ենք վերացնել, քողարկել սպիները: Ունենք տղամարդ հաճախորդներ, որոնք ունեն մազաթափություն և հատուկ տեխնիկայի շնորհիվ կարողանում ենք խիտ տեսք տալ մազերին: Կարևոր գործառույթներից է մեր կենտրոնում արեոլայի տեսքի վերականգնումը, երբ կրծքագեղձի քաղցկեղ ունեցող կանանց մոտ հեռացվում է այդ հատվածը, իսկ մենք հետագայում վիզուալ կերպով կարողանում ենք վերականգնել արտաքին տեսքը:

-Որքա՞ն արժեն նմանօրինակ ծառայությունները

-Մենք ստեղծել ենք այնպիսի գնային սանդղակ, որ հասարակության տարբեր շերտերի մարդիկ կարողանան օգտվել մեր ծառայություններից: Հաճախորդն ինքն է ընտրում, թե ինչ փորձառությամբ մասնագետի մոտ կարող է գնալ: Ինձ մոտ, օրինակ, հոնքերի պերմանենտ դիմահարդարումն իրականացվում է 60.000 դրամով, և մեր կենտրոնում կորեկցիայի գումարը ներառված է այս արժեքի մեջ: Պետք է նշեմ, որ պերմանենտ դիմահարդարումը իրականացվում է երկփուլ և մենք ի սկզբանե նշում ենք ամբողջական ծառայության գինը:

-Նշեցիք, որ նաև իրականացնում եք դասընթացներ, կպատմե՞ք մի փոքր նաև այդ մասին

-Մենք իրականացնում ենք պերմանենտ դիմահարդարման ուսուցում և ունենք դասընթացների մի քանի տարբերակներ. բազային կուրս, որը ստեղծված է սկսնակների համար և աշակերտները զրոյից սովորում են, հետագայում ես անձամբ տրամադրում եմ նրանց հարթակ, որտեղ նրանք կարող են հրավիրել մոդելների և աշխատել, թրծվել և վարժվել այս ոլորտում: Ուզում եմ նշել, որ հունվարից մեկնարկում է բազային դասընթացների շարքը:

Ունենք նաև վերապատրաստման դասընթացներ, որոնք ավելի կարճաժամկետ են և մեզ մոտ գալիս են մասնագետներ, որոնք աշխատում են, բայց ուզում են վերապատրաստվել: Այս ամենից զատ մենք նաև կազմակերպում ենք ամենամյա կոնֆերանսներ՝ հրավիրելով արտասահմանից պրոֆեսիոնալ և բարձրակարգ մասնագետների, որոնք այս ոլորտում առաջատար են, իսկ ներկաները կարողանում են իրականացնել փորձի փոխանակում և բարելավվել իրենց աշխատանքը: Մեր առաջիկա կոնֆերանսը՝ PMU Stars-ը նախատեսվում է իրականացնել 2023-ի մայիսի 16-19-ին:

Հեղինակ՝ Թերեզա Հովհաննիսյան