«8 ամիս շարունակ ապաակտիվացված են եղել բոլոր սոց. էջերս, այդ ընթացքում նաև աշխատել եմ հոգեբանի հետ». Իրինա Այվազյանը՝ դադարի, վախերը հաղթահարելու և նախագծերի մասին

20:19 • 19.12.22

Տարբեր հեռուստասերիալներից հայտնի դարձած դերասանուհի Իրինա Այվազյանը տևական ժամանակ է, ինչ ապաակտիվացրել էր սոցիալական էջերն ու վերջերս է ակտիվացրել դրանք:Tert.am Life-ի հետ զրույցում դերասանուհին պատմել է այդ շրջանի դադարի, հոգեբանի հետ աշխատանքի և նախագծերի մասին:

«Առաջին անգամ էր, երբ այդքան տևական դադար էի վերցրել սոցիալական էջերից՝ ապաակտիվացնելով դրանք: 8 ամիս շարունակ չեմ եղել որևէ սոցիալական ցանցում, չնայած հարցերը շատ էին՝ ինչո՞ւ եմ ջնջել, ե՞րբ եմ վերականգնում, բայց փորձել եմ էջերս փակ պահել այնքան ժամանակ, որքան անհրաժեշտ էր ինձ: Առաջին պատճառներից մեկը մոտիվացիայի պակասն էր, իսկ ես մտածում եմ՝ պետք է աշխատանքն անել սիրով, երկրորդ պատճառներից մեկն օգտատերերի անհարկի մեկնաբանությունների տեղատարափն էր: Ճիշտ է, ինստագրամը նաև իմ եկամտի աղբյուրներից է, բայց հոգեպես ինձ այս դադարն անհրաժեշտ էր»,- ասաց Իրինա Այվազյանը:

Նա նաև նշեց, որ այդ շրջանում առաջին անգամ որոշել է և սկսել հաճախել հոգեբանի մոտ:

«Հետպատերազմյան շրջանում ունեցել եմ որոշակի առողջական խնդիրներ, որոնք պատճառով դիմել եմ համապատասխան մասնագետների, իսկ այդ դադարի ընթացքում նաև առաջին անգամ որոշեցի գնալ հոգեբանի մոտ, չնայած կանխակալ վերաբերմունք ունեի այդ ամենի նկատմամբ: Հիմա շատ հարցերի այլ կերպ եմ նայում և այլ մոտիվացիայով եմ վերադարձել աշխատանքի»,- նշեց դերասանուհին:

Չնայած նա չէր վարում սոցիալական էջերը, բայց այդ շրջանում նկարահանվում էր «Ճիշտ այդպես» հեռուստանախագծում և «Կհանդիպենք անտառի տնակում 2» հեռուստասերիալում:

«Նախագիծն ինձ համար շատ կարևոր էր, երբ ստացա առաջարկը միանգամից համաձայնվեցի, քանի որ իմ եղբայրը 44-օրյա պատերազմի մասնակից է և ինձ համար կարևոր էր տեսնել՝ ինչ է նշանակում զինվորականի կյանքը: Շատ դժվար ընթացք էր և ուզում եմ նշել՝ աղջկա համար բարդ է նման պայմաններում ապրելը: Ինձ համար նաև բարդը որոշակի աշխատանքն էր, քանի որ ես սարսափում եմ բարձրությունից, բայց դա թիմային աշխատանք էր և սարսափելով հանդերձ իրականացրել եմ այն: Հեռուստասերիալի մասին էլ կնշեմ, որ իմ սիրելի նախագծերից է և երկրորդ եթերաշրջանը ևս ստացված է»,- ասաց նա:

Խոսելով հետագա աշխատանքի մասին՝ դերասանուհին նշեց, որ բաց է համագործակցության համար և ստացել է առաջարկներ:

«Ես սիրում եմ իմ գործը և այդ դադարի շրջանում ևս շարունակել եմ աշխատել, հիմա նույնպես սպասում եմ նախագծի հաստատման և նկարահանումներին»,- ասաց Իրինա Այվազյանը: