Այս պահին իմ մասնագիտական կյանքում լուրջ փոփոխություն է. դիմահարդար Անուշիկ Զալմյանը OMC World Champion-2022-ում հաղթելու և գործունեությունը ԱՄՆ-ում շարունակելու մասին

15:59 • 10.03.23

Դիմահարդար Անուշիկ Զալմյանը վերջերս արժանացավ հեղինակավոր OMC World Champion-2022-ի առաջին մրցանակին: Tert.am Life-ի հետ զրույցում Անուշիկը ներկայացրել է մրցույթի մանրամասներն ու խոսել ԱՄՆ-ում այս պահին ծավալած իր գործունեության մասին:

- Անուշիկ, վերջերս Դուք OMC World Champion-2022-ի 1-ին մրցանակին արժանացաք: Նախ՝ շնորհավորում ենք և խնդրում մի փոքր պատմել մրցույթի մասին: Ինչո՞ւ որոշեցիք մասնակցել և ինչպե՞ս ներկայացաք այնտեղ:

- Շնորհակալ եմ հարցազրույցի և շնորհավորանքի համար: Մեր թիմն ամեն տարի մասնակցում է OMC World Champion մրցույթին, և այս տարին բացառություն չէր: Գրեթե ամեն տարի մասնակցել եմ և այս տարի շատ ավելի լավ էի պատկերացնում, թե ինչ էր պահանջվում ինձնից: Իհարկե, անհանգստանում էի, որ մրցույթն օնլայն էր և լուսանկարով չէի կարող փոխանցել կատարածս ամբողջ աշխատանքը, բայց ուրախ էի նաև, որ ժամանակի սահմանափակում չունեմ և կարող եմ հանգիստ աշխատել:

- Ովքե՞ր էին ընդգրկված ժյուրիի կազմում:

- OMC կազմակերպությանը անդամագրված են բազմաթիվ երկրներ և ամեն տարի մասնակցող երկրներն ունենում են իրենց ներկայացուցիչը ժյուրիի կազմում: Ասոցիացիայի գլխամասը գտնվում է Փարիզում:

- Ի՞նչ հնարավորություններ է բացում այս մրցույթը Ձեզ համար:

- Նախ՝ ասեմ, որ այս մրցույթին պատրաստվելն ու մասնակցելն էլ ավելի է վարժեցնում makeup artist-ի տեխնիկան, ինչը չենք կարող ասել միայն հաճախորդների հետ աշխատանքի մասին: Քանի որ ես մասնագիտությամբ նկարիչ-մանկավարժ եմ, մոդելի հետ աշխատելիս նրա դեմքն ինձ համար դառնում է կտավ և ես սիրով սկսում եմ ստեղծագործել:

- Խոսենք նաև Ձեր ուղու մասին: Ինչպե՞ս մուտք գործեցիք ոլորտ:

- Ուղիս սկսել եմ 2017 թվականից, երբ եկա Beauty Fabric սովորելու, հետո ստացվեց այնպես, որ հենց այնտեղ էլ սկսեցի աշխատել: Սկիզբն, իհարկե, շատ բարդ էր, քանի որ ես չունեի փորձ, բայց իմ կողքին կային մարդիկ, ովքեր ինձ աջակցում ու ոգեշնչում էին՝ իմ թիմը, ընտանիքս և, իհարկե, Աշխենը, ով միշտ ասում էր՝ սպասիր քո՛, հե՛նց քո պահին: Հիմա ամեն փոքր հաջողության ժամանակ հիշում եմ այդ խոսքերը:

- Այս պահին գտնվում եք ԱՄՆ-ում և շարունակում եք Ձեր մասնագիտական գործունեությունը: Որքանով է հեշտ Ձեզ համար մասնագիտական նոր կյանք սկսելը ԱՄՆ-ում:

- Այո, այս պահին իմ մասնագիտական կյանքում լուրջ փոփոխություն է, մեծ սիրով արդեն շարունակում եմ աշխատանքս ԱՄՆ-ի Beauty Fabric-ում: Այս ամենը հեշտ դարձավ այն առումով, որ սոցցանցերը հնարավորություն են տալիս, որ քեզ գրկաբաց ընդունեն, ինչի համար անչափ շնորհակալ եմ: Դժվարություններ, իհարկե, լինում են, բայց ես տեսակով շատ համբերատար և ռեալիստ մարդ եմ. ցանկացած դժվարություն համբերատար ընդունում եմ ու փորձում հաղթահարել:

-Որքանո՞վ են տարբեր աղջիկների դիմահարդարման նախընտրությունները ԱՄՆ-ում և Հայաստանում:

- Յուրաքանչյուր երկրի եղանակային կլիման թելադրում և առաջարկում է գունային իր գամման: Տարբեր են նաև կանացիության չափանիշները: Երկու երկրների կանանց հետ էլ շատ մեծ սիրով եմ աշխատում: Իրենց տարբերություններն ինձ էլ շատ բան են սովորեցնում:

- Ի՞նչ նորություններով եք պատրաստվում հանդես գալ ԱՄՆ-ում:

- Դեռ նոր եմ եկել և դեռ ուսումնասիրում եմ այստեղի աշխատելաոճը: Հաստատ կգտնեմ արտահայտման իմ միջոցը, որը հարմար կլինի թե՛ Հայաստանի աղջիկներին, թե՛ makeup-ի միջազգային ստանդարտներին:

Հեղինակ՝ Մարինե Գասպարյան