Luxury Bridal Experience նորաձևության շաբաթի շրջանակում ներկայացվեց նաև հայկական Symphony հարսանեկան զգեստների բրենդը (լուսանկարներ, հոլովակ)

16:17 • 31.05.23

Օրեր առաջ Միլանում՝ պատմական Վիսկոնտի պալատում, Luxury Bridal Experience նորաձևության շաբաթի շրջանակում միջազգային հայտնի բրենդերի՝ Սորջիո Ռոսիի, Սպոզե դի Ջիոյի հետ առաջին անգամ ներկայացվեց նաև հայկական հարսանեկան զգեստների բրենդ։ Symphony ապրանքանիշի հիմնադիր Սաթիկը և Մարինան մեզ հետ զրույցում ներկայացրին մանրամասներ ցուցադրությունից:

–Կպատմե՞ք բրենդի ստեղծման մասին։ Ինչպե՞ս ստացվեց մասնակցությունը Միլանի նորաձևության շաբաթին։
–Symphony ապրանքանիշն ստեղծվել է հինգ տարի առաջ, գաղափարի հեղինակները ես և Մարինան ենք, երկու եղբայրների կանայք։ Հարսանեկան զգեստների բրենդ ունենալու գաղափարը ծնվեց համատեղ քննարկումների արդյունքում, երբ հասկացանք՝ հայկական շուկայում հարսանեկան զգեստների մրցունակ ապրանքանիշ չկա։ Այդպես ստեղծեցինք հարսանեկան զգեստների մեր առաջին հավաքածուն։
Միլանի նորաձևության շաբաթին մասնակցության առաջարկ մի քանի տարի է, ինչ ստանում ենք։ Կազմակերպիչներից մեկը, ով ազգությամբ հայ է, պարբերաբար վստահեցնում էր, որ հարսանեկան զգեստների մեր հավաքածուն առանձնահատուկ է և արժանի ուշադրության միջազգային շուկայում։ Այս տարի որոշեցինք համարձակություն հավաքեցինք եւ դրական որոշում կայացրինք:

–Որքա՞ն ժամանակում է ստեղծվել ցուցադրվող հավաքածուն, ինչի՞ց եք ոգեշնչվել։
–Վերջին հավաքածուն շատ արագ ստեղծեցինք՝ նորաձևության շաբաթին մասնակցության առաջարկը հաստատելուց հետո մոտ երկու ամսվա ընթացքում։ Զգեստները հայկական տարազի մոտիվներով են, օգտագործել ենք հայկական ձեռագործ զարդանախշեր։ Ոգեշնչվել ենք մեր պատմությունից, ազգային հագուստից, մասնավորապես գանձակեցի նորահարսի զգեստից, Ախալցխայի հայ կնոջ տարազից։

–Ի՞նչ ձեռքբերումներ ունեցաք։
–Միլանի նորաձության շաբաթին մասնակցությունը, առաջին հերթին, ճանաչելիություն և արժեքավոր կապեր տվեց։ Միջոցառմանը ներկա էին աշխարհում հայտնի ընկերությունների ներկայացուցիչներ, ամսագրերի գլխավոր խմբագրեր, որոնք հետաքրքրված էին մեր հավաքածուով, այժմ էլ բանակցություններ են ընթանում՝ կապված հետագա համագործակցության հետ։ Լիահույս եմ, որ կունենանք շոշափելի արդյունքներ, և մեր բրենդը տարբեր ձևաչափերով կկարողանանք ներկայացնել աշխարհին։