Տարվա աստղային և երաժշտական ամփոփումը, կարմիր գորգն ու հայ հայտնիները. կայացավ «Տարվա երգ» ամենամյա մրցանակաբաշխությունը (լուսանկարներ)

Այս տարվա երաժշտական ամփոփումը կայացել է երեկ՝ Կարեն Դեմիրճյանի անվան մարզահամերգային համալիրում, որտեղ կայացավ «Տարվա երգ» ամենամյա մրցանակաբաշխությունը, որն այս տարի հոբելյանական էր՝ նվիրված լինելով «Արմենիա TV»-ի 25-ամյակին։ Tert.am Life-ը ներկա է եղել կարմիր գորգի արարողությանը և մրցանակաբաշխությանը: 

Կարմիր գորգի արարողության առաջին հյուրերը Արփի Գաբրիելյանը և Միհրան Ծառուկյանն էին: 
«Հեռուստաընկերությունը ստեղծում է նաև ընտանեկան կոնտենտ: Մեր նախագծերը ստեղծվում են ողջ ընտանիքի համար, մեր պարագայում էլ կարող ենք հավելել, որ այստեղ կարող եք նաև ընտանիք կազմել»,- նշեցին նրանք: 

Մրցանակաբաշխությունում ընդգրկված էին տարվա ընթացքում ստեղծագործական ակտիվությամբ աչքի ընկած և YouTube-ում ամենաշատ դիտումներ հավաքած արտիստները, որոնք պարգևատրվեցին մրցանականերով։   

Կարմիր գորգի արարողությանը երգիչ Արտաշ Ասատրյանն իր որդու՝ Գրիշո Ասատրյանի հետ էր, որը մեզ հետ զրույցում նշեց, որ գովելի է, երբ հարթակ է տրամադրվում նաև երիտասարդ արտիստներին: 

Մրցանակաբաշխության հաղորդավարներն էին Գարիկ Պապոյանը, Իվետա Մուկուչյանը, Նազենի Հովհաննիսյանը և Ներսես Ավետիսյանը:
«Երկու կարևոր իրադարձություններ են կայացել: Ցանկանում եմ, որ եթերում բացի հումորային նախագծերից հաճախ տեղ գտնեն ինտելեկտուալ հաղորդումները»,- նշեց Նազենի Հովհաննիսյանը:
Գարիկ Պապոյանը մեզ հետ զրույցում նշեց, որ առաջին քայլերն արել է հենց Արմենիա հեռուստաընկերությունում, որն իրականացրել է իր երազանքները:

«Տարվա երգ»  մրցանակը ստացան Էրիկը, Սոֆի Մխեյանը, Արմենչիկը,  Արամեն, Սարոն, Նունե Եսայանը, Արաբո Իսպիրյանը, Արփի Գաբրիելյանը, Արման Հովհաննիսյանը, Արկադի Դումիկյանը, Արմենչիկը, Project LA-ը, Արամ MP3-ն, Արփին, Իվետա Մուկուչյանը, Արտեմ Վալտերը, Գարիկն ու Սոնա Ռուբենյանը, Արսեն Շախունցը, «Արցախի ձայները», Սոնան, Արա Մարտիրոսյանը, Դավիթ Գրեգն ու Ռաֆը, Սարո Թովմասյանը և այլոք։ Մրցանակաբաշխության հատուկ հյուրը Թաթա Սիմոնյանն էր, որը հենց մրցանակաբշխության ավարտին իրականացրեց երգի պրեմիերա: Երգիչներ Արման Հովհաննիսյանը և Թաթա Սիմոնյանը հենց մրցանակաբաշխության ժամանակ առաջին անգամ Երևանում կատարեցին «Իմ արև» երգը, որը յութուբում ունի շուրջ 22 մլն դիտում: 

«Արմենիա TV-ի 25 տարիների ընթացքում հեռուստաընկերության մշտական ուղեկիցը և եթերի կարևոր բաղադրիչը եղել է երաժշտությունը։ «Տարվա երգ» համերգային նախագիծը հոբելյանական է և այս տարի  նվիրված է Արմենիա  հեռուստաընկերությանը, որն իր եթերում մշտապես հեռուստադիտողին է ներկայացնում որակյալ երաժշտություն և  հարթակ է երիտասարդ կատարողների համար։ Այս տարիների ընթացքում մենք ներկայացրել ենք հեռուստաձևաչափեր, որոնք ճանապարհ են հարթել դեպի երաժշտական աշխարհ շատ տաղանդավոր երիտասարդների համար։ Արմենիա Թիվին բացառիկ իրավունքով 4 եթերաշրջան իրականացրել է «The Voice» միջազգային նախագծի հայկական տարբերակը՝  «Հայաստանի ձայնը», որը բացահայտեց բազմաթիվ տաղանդավոր երիտասարադների, որոնք այսօր նաև ելույթ կունենան բեմում։  «Հայ երգիչ, «Մենք մերոնցով», «I like it», նախագծերը շատ են եղել, այսօր այս բեմում մեր հեռուստաընկերության ընկերներն են, նրանցից շատերը եղել են մեր նախագծերի անմիջական մասնակիցները»,-նշեց Արմենիա Թիվի PR ղեկավար Հայկուհի Ասատրյանը։

Մրցանակաբաշխության ավարտին հնչեց Հայկոյի հեղինակային «Տարվա երգ»-ի հիմնը: 

Լուսանկարները՝ Վերոնիկա Բադալյանի