«Չեմ մտածում, որ իմ մասին կարող են ասել՝ տանն է մնացել». Անահիտ Ադամյանը՝ անձնական կյանքի, Աշոտ Ղազարյանի թոռնուհին լինելու, տղամարդու՝ իր իդեալի և երազած հարաբերությունների մասին

«Որպես Աշոտ Ղազարյանի թոռնուհի ճանաչվելը ինձ երբեք չի կաշկանդել, այլ՝ ուրախացրել է: Ես միշտ ու ամեն տեղ կասեմ, որ շատ հպարտ եմ, որ նրա թոռնուհին եմ: Մեր ընտանիքում մրցակցություն չկա: Թող բոլորը իմ ընտանիքում ինձանից լավը լինեն: Ես ուրախ կլինեմ: Իմ ընտանիքն ինձ շատ է երես տվել, որովհետև 2 կողմից էլ առաջին երեխան էի: Իհարկե, երբ վատ բաներ էի անում, բարկանում էին: Ես դպրոցում հաճախ տեսնում էի, որ երեխաները մեղավոր են, բայց ծնողները միևնույն է պաշտպանում էին, մամաս ինձ վրա բարկանում էր»,- «Սրտի տանիքներով» հաղորդման ժամանակ անկեղծացել է երգչուհի Անահիտ Ադամյանը:

Նրա կարծիքով՝ ընտանիքում վերջին խոսքը պետք է տղամարդունը լինի:

«Իմ ընտանիքում ես դա տեսել եմ, բայց հայրս միշտ հաշվի է առել մայրիկիս կարծիքը: Եթե ես որևէ տղայի հավանում եմ, հայրիկիս հետ նման գծեր անպայման գտնում եմ: Դա անկախ իմ կամքից է լինում: Հայրս բնավորությամբ շատ խիստ ու լուրջ է: Նրա խոսքը արժեք ունի: Երբ նա ինչ-որ բան է խոսք տալիս, բոլորս գիտենք, որ դա լինելու է: Մենք նման բնավորության գծեր ունենք, ինչ-որ բաներում կարող ենք իրար չհասկանալ, տարակարծիք լինել: Բայց միևնույն է, այն տղամարդը, ում ես կհավանեմ, պետք է հայրիկիս նման լինի»,- նշել է Անահիտը:

Խոսելով ամուսնության մասին նա ասել էր, որ ինքը և իր ընկերները առհասարակ չենք մտածում, որ մարդիկ իրենց մասին կարող են ասել՝ տանն է մնացել:

«Ամեն մեկի մոտ անհատական է: Մեկը կարող է 30-ում հանդիպել իր սիրուն, մյուսը՝ 20-ում կամ 15-ում: Մենք չենք էլ քննարկում այդ պահը: Ցանկալի է, որ, երբ ամուսնանամ կայացած լինեմ, իմ աշխատավարձն ունենամ, բայց շատ կարևոր հանգամանք չէ ինձ համար:

Տղամարդը պետք է լինի անկեղծ, որ կարողանամ նրան վստահել, ինքը պետք է ինձ ապացուցի: Ցանկացած հարաբերության մեջ, եթե 1 անգամ սուտ լինի, իմ կարծիքով՝ էլ նույնը չի լինի, առաջվա պարզ ու մաքուր զգացողությունն էլ չես ունենա: Ամենակարևորը՝ սուտասան չլինի, ես անընդտահ պետք է զգամ, որ այդ մարդու ուշադրության կենտրոնում եմ: Եթե դա չլինի, ես չեմ կարողանա սիրել: Ինձ կախվածության նման սերն է դուր գալիս: Ինձ համար էական է, թե օրվա մեջ ինձ քանի անգամ կզանգի կամ հաղորդագրություն կուղարկի: Եթե չհետաքրքրվի, ինչպես տեղ հասա, իմ մտքում կմտածեմ, որ չի անհանգստացել: «Հաց կերե՞լ ես, ո՞նց ես քեզ զգում, տուն հասե՞լ ես, քնե՞լ ես, բարի լույս, բարի գիշեր» այս բոլորը խայտառակ կարևոր է ինձ համար, եթե մի օր այս հարցերը չլինի կամ սրտիկ դրած չլինի, ես ընկնեմ մտածմունքների մեջ:

Ես շատ տագնապային եմ, ու չեմ կարողանում լռել, պայթում եմ ուղղակի: Ես եմ պարզում հարաբերությունները, նույնիսկ, եթե վեճ լինի, միևնույն է պետք է ասեմ»:

Երգչուհին անկեղծացել է, որ ուշադրությունն ու նվերները իր համար ևս կարևոր են: «Ինձ պետք չէ, որ ամեն օր արժեքավոր նվերներ անեն, ինձ կարող են ամեն օր կինդեր նվիրել, դա ինձ համար ուշադրություն է ու շատ է ուրախացնում:

Երբ ասում են, որ տղամարդը կարող է դավաճանել և դա նորմալ է, ինձ համար դա անընդունելի է: Ես նման հիասթափություն չեմ ապրել, ու շատ ուրախ եմ դրա համար: Կլինեն մարդիկ, որ կասեն՝ ինձ հետ չի եղել, դրա համար եմ այսպես խոսում, բայց՝ ոչ: Եթե նման դեպք լինի իմ կյանքում, չեմ փորձի հետ կառուցել հարաբերությունները:

Տղամարդու ինտելեկտը ևս ինձ համար շատ կարևոր է: Կուզեմ ինձանից զարգացած լինի, որ սովորեմ: Տարիքային տարբերությունն ինձ համար կարևոր չէ: Կարող է ինձանից լինել 1 տարի փոքր կամ 10 տարի մեծ»,- պատմել է Անահիտը: