Երբևէ չարտագաղթել Հայաստանից. Նիկոլ Փաշինյանի «Քաղաքացիական պայմանագրի» պարտավորություններից

«Հայ ազգային կոնգրես» ընդդիմադիր դաշինքի անդամ, ԱԺ համանուն խմբակցության պատգամավոր Նիկոլ Փաշինյանն այսօր «Հայկական ժամանակ» օրաթերթում ներկայացրել է խոստացված «Քաղաքացիական պայմանագիր» կոչվող փաստաթուղթը, որը ներառում է հանուն ազատ և երջանիկ Հայաստանի մղվող պայքարի , դրա խնդիրների, նպատակների և միջոցների մասին պատկերացումների ուրվագծումը: Իսկ բազմաթիվ դետալների ձևակերպումը թողնված է ընթացիկ, աշխատանքային ապագային:

Հիշեցնենք, որ այս փաստաթղթի մշակման մասին Նիկոլ Փաշինյանը հայտարարել էր իր «Ground zero» կոչվող և դրան նախորդող ՝«Քաղաքական տարին մեկնարկելիս» հոդվածներում, որոնցում առաջ էր քաշել պայքարը զրոյից սկսելու թեզը:

Նիկոլ Փաշինյանն ընդգծում է, որ սա նախագիծ է: Այսինքն՝ կարող է ենթարկվել փոփոխությունների, և Նիկոլ Փաշինյանը՝ որպես հեղինակ, հաճույքով կօգտվի հետաքրքրված քաղաքացիների առաջարկներն ընդունել-չընդունելու իր իրավունքից:

Tert.am-ը հակիրճ ներկայացնում է սույն նախագծի սկզբնական տարբերակը: Եվ այսպես. պայմանագրի մասնակիցը նախ հռչակում է հետևյալ պարտավորությունները

ա/ երբևէ չարտագաղթել Հայաստանից. սփյուռքում բնակվող մարդու միանալը սույն պայմանագրին նշանակում է նրա պարտավորությունը՝ առաջիկա հինգ տարիների ընթացքում ձեռնարկել Հայաստան մշտական բնակության տեղափոխվելու գործընթաց:

բ/ ՀՀ, ԼՂՀ դեմ լայնածավալ ռազմական հարձակման պարագայում , ըստ անհրաժեշտության, զինվորագրվել հայրենիքի պաշտպանության գործին, ինչը նշանակում է, որպես կամավոր , մեկնել ռազմական գործողությունների գոտի կամ զբաղված լինել գործունեության այնպիսի տեսակով, որն ուղղակիորեն ծառայում է Հայաստանի ռազմական հաջողության ապահովմանը:

Այս բաժնի կետերից է. մերժել բռնությունը՝ որպես ներհասարակական, անձնական հարցերի կարգավորման եղանակ: Պայմանագրի մասնակիցները որպես բռնություն են դիտարկում նաև ընտրությունների կեղծումը, հանցագործության դիտավորյալ չբացահայտելը, խոսքի ազատության, հավաքների անցկացման և այլ ազատությունների սահմանափակումները:
Հաջորդը. առանց ժամկետների սահմանափակման՝ հետամուտ լինել «Մարտի մեկի» և «Հոկտեմբերի 27»-ի ահաբեկչության ամբողջական, ինչպես նաև այլ հանրային հնչեղություն ստացած սպանությունների բացահայտմանը:

Եվ վերջապես. առանց ժամկետների սահմանափակման հետամուտ լինել երբևէ ՀՀ նախագահի, վարչապետի, ԱԺ պատգամավորի, նախարարի , կառավարությանն առընթեր մարմինների, դատախազության և այլ ղեկավար պաշտոններ զբաղեցրած անձանց և նրանց հետ փոխկապակցված անձանց գույքային վիճակի ուսումնասիրությանն ու վերլուծությանը»:

«Տնտեսական բնագավառ», «Անկախ դատական համակարգ»,« Քաղաքացիների բարեկեցությունն ապահովելու պետական գործառույթը ներառում է» բաժիններում ներկայացված են պետության կողմից անհրաժեշտ վարվելիք քաղաքականության հիմնադրույթները:

Տնտեսական բնագավառում պետությունը պարտավոր է ստեղծել պայմաններ համախառն ներքին ազգային արդյունքի ձևավորման գործում , տնտեսական գործունեության ոլորտում՝ գործարար հմտություններ ունեցող առավելագույն թվով մարդկանց ներգրավման համար: Տնտեսական բիզնեսի դաշտը պետք է ձևավորվի ազատորեն, հովանավորչության բացառման պայմաններում: Սա դիտվում է նաև որպես աղքատության հաղթահարման առանցքային պայման: Առաջնային խնդիր է մոնոպոլիաների և օլիգոպոլիաների վերացումը: Անհրաժեշտ է համարվում ստեղծել օրենսդրական և գործնական միջանցք Հայաստանում «զրոյից» տնտեսական գործունեություն սկսելու իրական հնարավորություններ ձևավորելու համար:

Հանրության հարուստ հատվածը պետք է պատասխանատվություն կրի աղքատ հատվածի նկատմամբ: Այս խնդիրը պետք է լուծվի ոչ այնքան և ոչ միայն վարչական լծակների գործադրմամբ, որքան ազգային-սոցիալական քաղաքականության շուրջ հանրային կոնսենսուսի ձեռքբերմամբ, որը կամրագրվի օրենքով:

ՀՀ ազգային անվտանգության առաջնային խնդիրը բնակչության թվի մեծացումն է: Ըստ այդմ՝ առաջիկա քսան տարիներին ՀՀ բնակչության թիվը պետք է կրկնապատկվի:

Քանի դեռ չի կարգավորվել ԼՂ կարգավորման հարցը, Հայաստանը չպետք է դիտարկի ոչ Եվրոպական Միությանը, ոչ Եվրասիական Միությանը անդամագրվելու հարցը: Հայաստանը պետք է հատուկ հարաբերություններ հաստատի երկու դրացիների՝ Վրաստանի և Իրանի հետ, և դրանք պետք է առավելագույնս դուրս լինեն աշխարհաքաղաքական կոնյունկտուրայի ազդեցությունից:

Փաստաթղի նախագծում ձևակերպված են այլ ոլորտներին ու բնագավառներին վերաբորող այլ նպատակներ և դրանց կարգավորման լուծումներ ու մեխանիզմներ:

Սույն պայմանագրի մասնակիցները Նիկոլ Փաշինյանին լիազորում են պայմանագրի շրջանակներում իրականացնել հետևյալ գործողությունները. ձևավորել Պայմանագրի կառավարման խորհուրդ, տնօրինել Պայմանագրին միացած քաղաքացիների տեղեկատվությանը և ապահովել անձնական տվյալների գաղտնիությունը, մշակել և գործարկել Պայմանագրին արվող նյութական նվիրատվությունների հավաքման, հաշվառման, ծախսերի թափանցիկության գործուն մեխանիզմներ, տնօրինել Պայմանագրի շրջանակներում ձևավորված գույքն ու ֆինանսական միջոցները, նախապատրաստել քաղաքացիական պայմանագրի առաջին համաժողովը, ոչ ուշ , քան Պայմանագրի հրապարակումից հետո երեք տարվա ընթացքում, Պայմանագրի անունից հանդես գալ հայաստանյան և արտերկրյա սուբյեկտների հետ հարաբերություններում: Նման գործառույթ կարող են ունենալ նաև Պայմանագրի կառավարման խորհրդի կողմից լիազորված այլ անձինք: