Մոսկվան, Վաշինգտոնը պետք է հարգեն մեր ընտրությունը՝ Ր. Հովհաննիսյանը աբովյանցիներին (տեսանյութեր, տարբերակ 6)

«Ժառանգություն» կուսակցության առաջնորդ, նախագահական ընտրություններում ըստ պաշտոնական տվյալների երկրորդ տեղը զբաղեցրած Րաֆֆի Հովհաննիսյանն այսօր շարունակում է իր մարզային այցելություններ։


Այսօր նա այցելում է Կոտայքի մարզ, որտեղ կլինի Չարենցավանում, Բյուրեղավանում, Նոր Հաճնում և Աբովյանում։


Հիշեցնենք, որ երեկ և դրան նախորդող օրն այցելել էր Արարատի, Վայոց ձորի և Սյունիքի մարզեր և հանդիպել իր ընտրողների հետ։
 

12.14
Ր. Հովհաննիսյանը չարենցավանցիներին ասաց, որ Սյունիքի մարզպետի հրաժարականին հետևելու է Կոտայքի մարզպետինը (տեսանյութեր, տարբերակ 2)

«Բարևի հեղափոխությունը» այսօր հասավ Կոտայքի մարզի Չարենցավան քաղաք, որտեղ Րաֆֆի Հովհաննիսյանը բնակիչների հետ հանդիպման ժամանակ ասաց, որ իրենք նույնպես իրենց քվեով պահանջել են Սյունիքի մարզպետ Սուրեն Խաչատրյանի հրաժարականը, որին պետք է հետևի նաև Կոտայքի մարզպետի հրաժարականը։ «Սյունեցիներն իրենց իսկ մարզում վախեցել էին և հանդիպման չէին եկել։ Ես դեմ եմ առանձին, մարզային մոտեցումներին և ձեզ ևս ասում եմ, որ Սյունիքի մարզպետը, վստահ եմ, հրաժարական է տալու»,–հայտարարեց նա։

Խոսքն ուղղելով բնակիչներին՝ վերջինս նշեց, որ ինքը հավատաց չարենցավանցիներին, և Չարենցավանը հավատաց իրեն։ Նա կոչ արեց քաղաքացիներին պատրաստվել հաղթանակի, և այդ հաղթանակը մեկ անձի շուրջ չհամախմբել, այլ հենց իրենց շուրջ համախմբեն։

Ելույթն սկսելուց առաջ Ր. Հովհաննիսյանն նշեց, որ իր կինը՝ Արմենուհի Հովհաննիսյանը ասել էր, որ ինքը բոլոր վայրերում կրկնվում է, բայց վերջինս պատասխանել էր, որ բոլոր տեղերում էլ բարևը նույնն է։

Վերջում Հովհաննիսյանը հիշեցրեց բնակիչներին այսօր ժամը 17.00-ին Երևանի Ազատության հրապարակում կայանալիք արտոնված հանրահավաքի մասին և ասաց, որ ով իրենց տեղաշարժվելու, երթուղային նստելու իրավունքը խախտեց, պատասխան է տալու։

Tert.am–ի հետ զրույցում չարենցավանցի մի տղամարդ ասաց, որ վերջին 15 տարիներին բոլոր ընտրությունների ժամանակ չարենցավանցիները ծախվել են, իսկ այս անգամ ավելի էժանով են ծախվել։ Վերջինս նշեց, որ իրենք պատրաստ են գնալ Ր. Հովհաննիսյանի հետևից մինչև հաղթանակ, եթե, իհարկե, նա գնա մինչև վերջ։

Նշենք, որ Չարենցավանում մի կին էլ բարձրաձայն հայտարարում էր, որ ինքը զուգարան է մաքրում, բայց շատ լավ է ապրում և գոհ է նախագահ Սերժ Սարգսյանից։

 
 

13.34
Րաֆֆի Հովհաննիսյանը Բյուրեղավանում պոկեց իր պաստառները

Բյուրեղավան այցելած Րաֆֆի Հովհաննիսյանը նկատելով շենքերի պատերին փակցված իր նախընտրական պաստառները, անձամբ պոկեց դրանք՝ մեկնաբանելով, որ թույլ չի տա օրինախախտում. համապետական ընտրություններից հետո թեկնածուներն իրենց միջոցներով պետք է մաքրեն հանրային տարածքներում տեղադրված իրենց պաստառները:

«Եվ ես մինչև իմ ծառայության ավարտ իմ խոսքի տերը պիտի լինեմ: Եվ եթե որևէ մեկը այսօր Ազատության հրապարակում հանրահավաքին կամ մարտի երկուսի՝ շաբաթ օրվա հանրահավաքին խախտի ձեր իրավունքը՝ մարշրուտկա նստելու, ավտոբուս, քայլելու, ես ուզում եմ իմանալ դրա մասին»,- հայտարարեց Րաֆֆի Հովհաննիսյանը:

Նա վերընթերցեց երկու շաբաթ առաջ այս նույն վայրում ներկայացրած իր նախընտրական ծրագրի դրույթները: Դրանք են՝ հինգ տարվա ընթացքում նվազագույնը 180 000 աշխատատեղ, բարձր աշխատավարձ և ոչ ողորմություն, ապահովված փոքր ու միջին ընտանեկան բիզնես, հարուստ գյուղ, պաշտպանված բնություն:

«Պաշտպանված բնություն, բնությունը բոլորիս է պատկանում. Հրազդանից սկսած մինչև Սյունիք, Թեղուտ, Թռչկան, Սևանա լիճ և Քաջարան: Պիտի հարգենք բնությունը, մեր երեխաների համար մաքուր պիտի պահենք»,- ավելացրեց Րաֆֆի Հովհաննիսյանը:

Նա նաև ասաց, որ այն մարդը չէ, որ դատարկ տեղը հրաժարական պահանջի և ավելացրեց, որ հրաժարական պետք է տան բոլոր նրանք, ովքեր լավ չեն սպասարկել ժողովրդին կամ ծաղրել են նրա ընտրությունը:

«Եթե պատիվ մնացել է մեզ մոտ հրաժարականների շրջանը մոտեցել է: Արդեն մի քանի հոգի հրաժարական տվել են: Այդ շարանը կշարունակվի, բայց ոչ նրա համար, որ պարոն Սարգսյանի հրամանը չկատարեցին, այլ նրա համար, որ լավ չեն ծառայել ժողովրդին»,-ասաց «Ժառանգության» նախագահը:

Բյուրեղավանից հեռանալուց առաջ Րաֆֆի Հովհաննիսյանը սովորության համաձայն քայլեց փողոցներում, համբուրեց երեխաներին, իսկ նրանցից մեկին էլ ձեռքով պատիվ տվեց:
Բյուրեղավանից Րաֆֆի Հովհաննիսյանը շարժվեց դեպի Նոր Հաճն:

14.06
Նոր Հաճնում Ր. Հովհաննիսյանը ազատամարտիկի մորը թույլ չտվեց այրել Սերժ Սարգսյանի նկարը

Կոտայքի մարզի Նոր Հաճն քաղաքում արցախյան ազատամարտիկ Էդիկ Թորոսյանի մայրը՝ տիկին Փառանձեմը հաճնցիների հետ Րաֆֆի Հովհաննիսյանի հանդիպմանը ժամանակ քաղաքի հրապարակում փորձեց այրել Սերժ Սարգսյանի և Ռոբերտ Քոչարյանի նկարները։ Հենց այդ պահին Հովհաննիսյանը ժողովրդի առաջ ելույթ էր ունենում և երբ տեսավ Փառանձեմ մայրիկին, մոտեցավ և թույլ չտվեց, որ նկարները այրվեն։ «Պետք չէ Փառանձեմ մայրիկ, պետք չէ»,–ասաց նա։

Tert.am–ի հետ զրույցում հաճնցիները պատմեցին, որ քարոզարշավի շրջանակներում Սերժ Սարգսյանը Նոր Հաճն չի այցելել հենց Փառանձեմ մայրիկի պատճառով։ Վերջինս էլ չի թաքցնում իր բացասական վերաբերմունքը նախագահի հանդեպ։

14.44
Ր. Հովհաննիսյանը Նոր Հաճնում խոստացավ գրողի ծոցն ուղարկել արտագաղթը

Նոր Հաճնում Րաֆֆի Հովհաննիսյանն այսօր իր ելույթը սկսեց՝ «բրավո, Նոր Հաճն» խոսքերով, սակայն ավելացրեց, որ այդ բրավոն վերաբերում է նաև այն համայնքներին, որտեղ պաշտոնական տվյալներով հաղթել է Սերժ Սարգսյանը՝ ժողովրդից գողացված ձայների արդյունքում: Դրանք են՝ Եղվարդը, Բյուրեղավանը, Աբովյանը, Չարենցավանը, Հրազդանը:
«Ես թվերին չեմ նայում, և ես պարտավորվում եմ ձեր բոլորի ներկայությամբ ասելու, որ ես ոչ մի տեղ չեմ նահանջելու»,- ասաց Րաֆֆի Հովհաննիսյանը և ավելացրեց, որ Ստյոպա Սաֆարյանի հետ ռուսերենի մի փոքր վեճ են ունեցել, որի արդյունքում ինքը հաղթող է դուրս եկել:

Այսինքն՝ չնահանջելու մասին իր հավաստիացումը, որ վերջին օրերին ձևակերպում է ռուսերենով, այնուամենայնիվ ռուսերենում իգական սեռի է, և ուրեմն, ասաց, որ թերթերը ճիշտ մեջբերեն իր խոսքերը՝ ոչ թե «զադնի», այլ «զադնայա սկորուստ» և վերահաստատեց իր պնդումը, որ դա չի լինելու:

Րաֆֆի Հովհաննիսյանը կրկնեց Բյուրեղավանում հնչեցրած իր խոսքը, որ անհիմն կերպով հրաժարական պահանջող մարդ չէ, բայց բոլորը պետք է պատասխան տան՝ ժողովրդի քվեն գողանալու համար, ով խախտեց օրենքը՝ համազգեստով, թե առանց համազգեստի, նախագահ , թե վարչապետ, թե գյուղապետ:

«Ոչ մի տեղ չենք գնալու մեր քաղաքից, մեր Հանրապետությունից: Հինգ տարի անց ունենալու ենք կենսաթոշակ, ազատամարտիկի հարգանք, երեխայի ամենալավ կրթություն, աշխատավարձ և աշխատատեղ, և չի լինելու արտագաղթ: Արտագաղթը տանելու ենք դեպի գրողի ծոցը, դեպի պատմության դասագրքերը»:

Րաֆֆի Հովհաննիսյանն ավելացրեց, որ Հայաստանն աշխարհի հետ՝ Ռուսաստանի, Եվրոպային, Չինաստանի, ԱՄՆ-ի հետ ունենալու լավ հարաբերություններ, պետք է պահանջի, որ նրանք հարգեն նաև ժողովրդի ձայնը:

«Թող ժողովրդավարության դասեր մեզ չտան, եթե իրենք ճանաչում են ոչ լեգիտիմ, ոչ իրավակարգ, ժողովրդի ձայնից գողացված ընտրություն: Եվ ես վախ չունեմ, նույնը կասեմ մեր ռազմավարական գործընկեր Վլադիմիր Վլադիմիրովիչին, Բարաք Օբամային, ում որ պետք է, կասեմ»,-ավելացրեց «Ժառանգության» առաջնորդը:

«Ես ոչ մի տեղ չեմ գնալու, ես ձեզ մենակ չեմ թողնելու, բայց պահանջում և ակնկալում եմ ձեզնից, որ դուք ևս ինձ մենակ չթողնեք: Որ այս ճանապարհը, դեպի հաղթանակ, պետք է գնանք միասին»,-խոստացավ Րաֆֆի Հովհաննիսյանը:

Դա, ըստ նրա, կտևի որքան որ պետք է. հնարավոր է՝ մեկ շաբաթ, մեկ ամիս:
Նոր Հաճնից Րաֆֆի Հովհաննիսյանն ուղևորվեց Աբովյան: Նախքան ուղևորվելը Րաֆֆի Հովհաննիսյանը տեղեկացրեց, որ վաղը Ազատության հրապարակում բացօթյա ասուլիս է տալու, իսկ մարտի 1-ին՝ մայրաքաղաքի Մյասնիկյանի արձանի հարևանությամբ գտնվող հրապարակում՝ հանրահավաք:
Րաֆֆի Հովհաննիսյանը խնդրեց, որ հանրահավաքին մարդիկ իրենց հետ ծաղիկներ բերեն:

15.06
Մոսկվան, Վաշինգտոնը պետք է հարգեն մեր ընտրությունը՝ Ր. Հովհաննիսյանը աբովյանցիներին

Րաֆֆի Հովհաննիսյանի Կոտայքի մարզին տարած բարևի հանդիպումներն այսօր եզրափակվեցին Աբովյան քաղաքում, որտեղ փետրվարի 18–ին 25 ընտրական տեղամասերից 21-ում հաղթել էր Րաֆֆի Հովհաննիսյանը:
Նա աբովյանցիներին պատմեց, որ այսօր հանդիպել է Գերմանիայի դեսպանին, իսկ երկու օր առաջ՝ Ռուսաստանի, ավելի առաջ՝ ԱՄՆ դեսպաններին:

«Բոլորը հարգանքի արժանի պետություններ են, մեր գլխի վրա տեղ ունեն, բայց իրենք՝ մեր համար առաջին ռազմավարական գործընկեր Ռուսաստանից սկսած, բոլորը առաջին հերթին պետք է հարգեն մեր շահը, հայ ժողովրդի ընտրությունը: Մեր ռազմավարական գործընկե՞րն է Մոսկվան, թող լինի, հետո Վաշինգտոնը, Բրյուսելը, Չինաստանը, բայց այդ ռազմավարական գործընկերները պետք է հարգեն մեր իրավունքը, մեր քաղաքացու ընտրությունը, մեր ազգային շահը՝ Արցախի ճանաչումից մինչև Ցեղասպանության ճանաչում և հատուցում»,-ասաց Րաֆֆի Հովհաննիսյանը:

Նա Հայաստանը բնութագրեց, որպես «այստեղ՝ քաղաքակրթությունների ծննդավայր՝ Նոյի աշխարհ», որի հետ ասաց, որ թող գան ու խոսեն բոլորը:

«Ժպիտով, բայց իրավունքով» ,- աբովյանցիներին խորհուրդ տվեց Րաֆֆի Հովհաննիսյանը:
Նա աբովյանցիներին ասաց, որ այլևս կուսակցական պատկանելություն չի ճանաչում և իրեն այլևս չեն տեսնի «Ժառանգության» կրծքանշանով, քանի որ ինքն այսուհետ ճանաչում է մի պետություն, մի դրոշ:
 


 

17.06
Աբովյանցիներն ասում են, որ իրենց անվճար ավտոբուսներով բերելու են հանրահավաք

Րաֆֆի Հովհաննիսյանի հետ այսօր աբովյանցիների հանդիպման ժամանակ Tert.am-ի հետ զրույցում մի խումբ աբովյանցիներ ասացին, որ իրենց անվճար ավտոբուսներով տանելու են մարտի 2-ին Երևանում կայանալիք հանրահավաքին:
Նրանք ասացին, որ, անպայման, գնալու են և մասնակցեն հանրահավաքին, և անգամ, եթե մեքենա չլինի, ոտքով կգնան:

Հարցին, թե ովքեր են իրենց տանելու հանրահավաք, նրանք պատասխանեցին, որ իրենց տանելու են նրանք, ովքեր իրենց նման մարդիկ են և սիրում են Րաֆֆի Հովհաննիսյանին: Մեկ այլ քաղաքացի էլ ասաց, որ անհատ մարդիկ նույնպես այդ օրը իրենց Երևան կտանեն: «Ես էլ, որ մեքենա ունենայի, կտանեյի մարդկանց»,- ասաց քաղաքացիներից մեկը: