«ՀայՌուսգազարդի» աշխատակիցը տրամադրել է մի սարքի լուսանկար, որով նվազեցնում են գազի կալորիականությունը

«ՀայՌուսգազարդի» մի աշխատակից «Ներազգային ազատագրական շարժմանը» ներկայացրել է մի սարքի լուսանկար, որի մասին հայտնել է, որ այդ սարքով գազը ազոտի միջոցով կալորիազրկվում է և դրա հետևանքով ավելանում է գազի ծավալը։

«Կարող եմ ներկայացնել կաթի օրինակով, երբ օրինակ՝ կաթը 30 անգամ ջրով բացեն , ծավալը լիտրերով կավելանա, այ այդպես իրենց ներքին ռեզերվուրներում գցում են գազի կալորիականությունը»,– այսօր լրագրողների հետ հանդիպմանը հայտարարեց «Ներազգային Ազատագրական» շարժման հիմնադիր Վահան Մարտիրոսյանը (լուսանկարում):

Ի պատասխան հարցի, թե ինչ որակի գազ է ներկրվում Ռուսաստանից, Վահան Մարտիրոսյանը նկատեց, որ սահմանի վրա գալիս է բարձր կալորիականությամբ x ծավալի գազ, քանի որ «հինգ տեղ ստուգվում է», սակայն գազը կալորիազրկվելով , ավելանում է, դառնում y քանակությամբ և տրամադրվում է բնակչությանը:

Վահան Մարտիրոսյանի տեղեկացմամբ՝ սա նոր չէ, նման նախադեպ եղել է Ուկրաինայում, որտեղ բանը հասել է մինչև դատական պրոցեսի, քանի որ Ուկրաինայում Գիտությունների ազգային ակադեմիան կարողացել է ապացուցել, որ գազն անորակ է:

Բանախոսը, ի պատասխան դիտարկումների, որ լաբորատորիաները ստուգում են և հաստատում, թե գազը կալորիական է, հիշեցրեց, որ դրանք երկուսն էլ պատկանում են «ՀայՌուսգազարդին», այսինքն՝ իրենք իրենց ստուգում են:

«Ես վստահ եմ, որ եթե ստուգեն ոչ թե հեղուկ գազը, այլ՝ օդը, որ շնչում է ՀՀ քաղաքացին, այդ սարքավորումները միևնույն՝ է ցույց կտան, որ այդ օդը ջերմազատում է 7600 կալորիա, ինչը նախատեսված է ԳՕՍՏ-ով»,- հեգնանքով նկատեց բանախոսը:


Նա նաև ասաց, որ Հայաստանում գիտահետազոտական կենտրոնները վախենում են անկախ ստուգումներ իրականացնելուց, ինչպես օրինակ՝ Ֆիզիկայի ինստիտուտի մի աշխատակից ասել է, որ՝ եթե ինքը կորցնի իր աշխատատեղը, ապա ով է տալու իր աշխատավարձը։

Ի պատասխան հարցի, թե ինչո՞վ է սա պաշտպանված , որպեսզի իրենց չմեղադրեն զրպարտության մեջ, Վահան Մարտիրոսյանն ասաց. «Մի ամբողջ ազգ բողոքում է, սառում, դա ապացույց չէ՞։ Իսկ ինչ վերաբերում է աննախադեպ ցրտին, որ ասում են, աննախադեպ ցուրտը ի՞նչ կապ ունի»։

Հիշեցնենք, որ ԱԺ «Բարգավաճ Հայաստան» խմբակցության անդամ Լյովա Խաչատրյանի՝ գազի կալորիականության մասին հարցին ի պատասխան ՀՀ էներգետիկայի և բնական պաշարների նախարար Արմեն Մովսիսյանը հայտնել էր, որ օդ հնարավոր չէ խառնել և համապատասխան «խորհուրդներ» տվել:

Վահան Հովհաննիսյանն ասաց, որ պատրաստ է կանգնել դատարանի առաջ , իսկ լրագրողներին էլ կոչ է անում այս հարցով հետաքննություններ իրականացնել:
Նա նաև այն կարծիքին է, որ պետք է լինեն ընդդեմ, հիմա արդեն՝ «Գազպրոմ Արմենիայի» կոլեկտիվ դատական հայտեր, այդ դեպքում արդեն գազամատակարար ընկերությունն ինքը պետք է շահագրգռված լինեն, որ ապացուցեն, որ իրենք ճիշտ են:

«ՀայՌուսգազարդ»–ի պարզաբանումը կներկայացնենք ավելի ուշ։