Չեմ կարծում, որ ՀՀԿ համագումարին մեծ փոփոխություններ լինեն. Գալուստ  Սահակյան (տեսանյութ)

ԱԺ նախագահ, Հայաստանի Հանրապետական կուսակցության փոխնախագահ   Գալուստ Սահակյանը Tert.am–ին տված բացառիկ հարցազրույցում անդրադառնում է, թե ինչ փոփոխություններ պետք է ակնկալել կամ չակնկալել կուսակցության  առաջիկա 26-րդ համագումարից ու փոփոխություններից: Նաև իր արտահայտություններով  հայտնի ԱԺ նախագահն անդրադառնում է հարցին, թե ինչո՞ւ մարդիկ երբեմն չեն ընկալում իր արտահայտությունները: Ի պատասխան` Գալուստ Սահակյանն ասում է, որ հայ հասարակությունը լավ պիտի սովորի հայերեն, իմանա` գրաբար, միջին հայերեն, որպեսզի իր արտաբերած մտքերը հասկանա:

Ներկայացնում ենք հարցազրույցի կրճատված տարբերակը, իսկ մանրամասները` տեսանյութում:

-Պարո՛ն Սահակյան, ՀՀԿ ղեկավար կազմում, չեն թաքցնում, լինելու են արմատական փոփոխություններ, նաև անձերի, բայց դրանք ի՞նչ կոնտեքստում են արվելու, ինչից՞ ելնելով:

- Դա էդպես բամբասանք խոսք է, որովհետև ցանկացած կուսակցությունում մշտապես նաև ղեկավար կազմի փոփոխություններ են լինում, պարզապես ամսի 26-ին (նկատի ունի նոյեմբերի 26-ին Tert.am) մեր կուսակցության համագումարն է, և մարդիկ մտածում են մեծ փոփոխություններ են լինելու, չեմ կարծում, որ այդպիսի մեծ փոփոխություններ լինեն և ոչ էլ այդպիսի անհրաժեշտություն կա այսօր, որովհետև Հանրապետականը միակ կուսակցությունն է, որն անընդհատ ամեն տարի, ամիս փոփոխություններ է ունենում, բայց դա չի նշանակում, որ փոփոխված մարդիկ քաղաքականությունից դուրս են մնում: Նրանք վարում են իրենց այն ընդհանուր գիծը, որը պահանջում է կուսակցությունը: Այնպես որ, չեմ կարծում` ինչ-որ փոփոխություններ: Եթե մտածում եք` վարչապետը կդառնա հանրապետական և դա շատ մեծ փոփոխություն է ՀՀԿ-ի համար... իհարկե, շատ լավ կլինի, որ վարչապետն էլ հանրապետական դառնա:    

-Գրեթե հայտնի է, որ նորանշանակ վարչապետ Կարեն Կարապետյանը դառնալու է  ՀՀԿ-ական, ՀՀԿ փոխնախագահ: Ինչո՞ւ կուսակցական, ՀՀԿ-ական դառնալու հեռանկարը չի շրջանցում Հայաստանի և ոչ մի անկուսակցական  վարչապետի: 

- Կոնկրետ, եթե Կարեն Կարապետյանը դարձավ հանրապետական և կուսակցության նախագահի տեղակալ, ինչպես օրինակ` ես եմ, ինչպես օրինակ` Աշոտյանն է կամ մյուսը, այդ ժամանակ կխոսենք: Խնդիրը հետևյալն է. վերջին հաշվով` ամբողջ կառավարությունն այսօր իրագործում է Հանրապետականի կարծիքը, նրա տեսակետները: Կամ կառավարությունն այդ տեսակետն է իրագործում հասարակության մեջ կամ կարող է և տեսակետն օգտագործել, և քննարկումների ժամանակ էլ մասնակցել այդ քննարկումներին: Կարծում եմ` ցանկացած վարչապետ, եթե Հանրապետական կուսակցության դիրքերից է խոսում, հա՛մ կատարում է Հանրապետականի քաղաքական պահանջը, համ էլ նաև կարծիք ունի, իր խոսքն ասելու այս կամ այն երևույթի գնահատման կամ շարունակության վերաբերյալ:

-Տեղեկություններ են շրջանառվում, որ Կարեն Կարապետյանի փոխնախագահ դառնալու դեպքում կուսակցությունում «չիստկաներ» են լինելու, և շատ մարդիկ հայտնվելու են լուսանցքում:

-Ես կարծում եմ` այդ խոսակցությունները մի քանի շաբաթ հետո կլինի հետևյալը, որ 2017 թվականի ընտրությունները եղել են արդեն, Հանրապետականը քաղաքական մեծամասնություն է արդեն ... դրանք քաղաքական դաշտի խոսակցություններ են, բայց ոչ քաղաքական գործչի:

-Կա՞ կուսակցությունում նոր, թարմ դեմքերի, թարմ արյան կարիք:

- Դա էլ նիհիլիստական երևույթ է այն առումով, որ  ցանկացած կուսակցության մեջ մշտապես նոր երևույթներ, նոր դիրքեր, նոր բովանդակություններ են լինում: Հանրապետականի մոտ իր գաղափարախոսությունը միշտ մնում է նույնը, բայց քաղաքական պայքարում կատարվում է այն, ինչը ՀՀԿ-ն ռեալ է գտնում այդ ժամանակաշրջանի համար իրագործելու առումով: 

- Բոլոր այդ պրոցեսների ընթացքում, երբ փոփոխություններ են տեղի ունենում, ինչ-որ մարդկանց ստիպված է լինում Հանրապետական կուսակցությունը հրաժեշտ տալ՝ և՛ գործադիր օղակներից, և՛ այլ: Եվ որքան էլ նրանք ասում են, որ «մենք նեղացած չենք», պարզվում է, որ նեղացած են:

- Չարտահայտենք «նեղացած» բառը: Բնական է` մարդը եթե աշխատում է, հաջորդ օրվանից պիտի չաշխատի, վատ է նստում իր վրա, բայց դա երբեք չի նշանակում, որ ինքը որոշակի դիրքորոշումներ է փոխել Հանրապետականի  նկատմամբ, որովհետև ցանկացած կուսակցություն, երբ իշխանության է, բնականաբար, դիրքերը առավել են լինում: Երբ իշխանություն չէ, պարզապես դիրքեր չի ունենում: Բնական է, եթե մարդը աշխատել է, հիմա չի աշխատում, վատ է ազդելու վրան, բայց դա նեղացածություն չէ: Ընդամենը պետք է կարողանաս նոր վիճակը ընկալել և այդ նոր վիճակով առաջ շարժվել: 

-Պարոն Սահակյան, կազմվել է Ձեր  ամենահայտնի 10 արտահայտությունների ցանկը: «Բիզնես ունեցողը դեռ բիզնեսմեն չէ», «Դեմ լինելը դա ընդդեմը չէ», «Գաղտնի բառը դա թաքուն բառը չէ», բայց ամենահետաքրքիրը սա է՝ «Ես ձեր մերկությունը լավ եմ տեսել և երբեք չեմ գայթակղվել»: Ենթադրում եմ, որ Ձեր խոսքերն ուղղված են ընդդիմությանը, բայց, որպեսզի չենթադրեմ` չե՞ք ասի` ինչ նկատի ունեք:

- Դա, գիտեք, մի քիչ շատ դժվար է բացատրել, դրա համար պիտի հայ հասարակությունը շատ լավ սովորի հայերեն: Առավել ևս գրաբար, միջին հայերեն, որպեսզի այն մտքերը, որ արտաբերում եմ, կարողանա հասկանալ: Դրա համար էլ մեկ անգամ ասացի, որ ես աշխատում եմ այլևս հարցազրույցներ չտալ: