Զանգվածային կրճատումը հանցագործություն է. լուծարվող նախարարությունների աշխատակիցները Նիկոլ Փաշինյանի հետ հանդիպում են պահանջում

11:00

Մշակույթի նախարարության աշխատակիցներն իրենց բաց նամակը փոխանցեցին Կառավարության նամակների և դիմումների բաժնի պետին՝ պահանջելով, որ վարչապետին  ասեն, որ երկուշաբթի ցանականում են հանդիպել նրա հետ՝ դիմումի պատասխանը  ստանալու ակնկալիքով:

Աշխատակիցները նշեցին, որ պատրաստ են անգամ տոնական օրերին ակցիաներ, նստացույց իրականացնել, քանի որ ժամանակ չունեն. հունվարի 1-ից օպտիմալացում է իրականացվելու:

Բաց նամակը հանձնելուց հետո աշխատակիցները դադարեցրին ակցիան:

10:50

Բյուջեում ինչ-որ գումար ավելացնելու համար զանգվածային կրճատումների գնալը հանցագործություն է, մշակույթի նախարարության լուծարումը չարյաց մեծագույնն է:

Այս մասին լրագրողների հետ զրույցում Կառավարության շենքի դիմաց ասաց Մշակույթի նախարարության ներկայացուցիչ Տաթև Սուքիասյանը: Նա ընդգծեց, որ բացի բաց նամակը հանձնելուց, ուզում են նաև անձամբ իրենց մտահոգությունները ներկայացնել վարչապետի պաշտոնակատարին:

«Ուզում ենք վարչապետին հանդիպել՝ հավատալով, որ ինքն ունի այնպիսի արժեհամակարգ, որ իր հետ առերեսվելով՝ մենք կկարողանանք մեր խնդիրը հասցնել  իրեն: Խնդրում ենք՝ վերանայի օպտիմալացման նախագիծը, դրա մշակմանը մասնակցել են ոչ պրոֆեսիոնալ մարդիկ. այն գրվել է շտապողականության արդյունքում: Պիտի խնդրենք, որ հանրային քննարկումների արդյունքում ձևավորվի և մասնագիտական հիմքերի վրա դրվի, կամայականություններից պետք է զերծ մնալ:Մշակույթի նախարարի հետ հանդիպել ենք, նա առաջարկել է հիմնավորում պատրաստել, որը կստորագրի նաև ինքը»,- մանրամասնեց նա:

Աշխատակիցը նկատեց, որ ակցիայից հետո վերադառնալու են նախարարություն, պատրաստելու են հիմնավորումը, որպեսզի նախարարը, ինչպես խոստացել է, ստորագրի այն, և պաշտոնապես փոխանցվի Կառավարությանը:

Ակցիայի մասնակից,, կառավարման փորձագետ Սերոբ Անտինյանն էլ նշեց, որ այս խնդրի հետ կապված շատ կարևոր նկատառումներ կան, որոնք պետք է հաշվի առնել:

«Մեր երկիրը վերջին ամիսներին ունեցավ շատ կարևոր խորքային  գործընթացներ, և մենք մեկնարկ ենք տալիս նոր Հայաստանին: Այդ խորքային գործընթացները չուղեկցվեցին տնտեսական ճգնաժամով, դրամի արժեզրկմամբ, չուղեկցվեցին մեր երկրի համար պետական համակարգի կոլապսով, այլ անցանկալի երևույթներով, արտաքին և ներքին անվտանգային խնդիրներով, ինչո՞ւ, որովհետև պետական կառավարման համակարգը անխափան աշխատում էր: Պետական կառավարման համակարգը երկրի պետականության հիմքն է, հատկապես կառուցվածքային փոփոխություններին պետք է նախորդեն շատ լուրջ մասնագիտական, փորձագիտական քննարկումներ»,- նշեց նա՝ անթույլատրելի համարելով առանց խնդիրների հստակ սահմանման հայեցողական մոտեցումները կառուցվածքային փոփոխությունների վերաբերյալ:

Կառավարման փորձագետն ասաց, որ դեռ նախկին իշխանությունների ժամանակից կա հայեցողական, անբնական մոտեցումներով փոփոխություններ անելու արատավոր պրակտիկա:

«Պետք էր մարդուն պաշտոն տալ, ստեղծում էին նախարարություն, պետք չէր պաշտոն տալ, նախարարությունը լուծարում էին, հիմա այդ գործելաոճի շարունակություն է նկատվում: Այսինքն՝ կա պաշտոնյա, նախարարությունը պահում են, չունեն համապատասխան նախարար, նախարարությունները միավորում են»,- ընդգծեց նա:

-----------------------


Լուծարվող նախարարությունների աշխատակիցները երթով շարժվում են դեպի Կառավարություն՝ վարչապետին ներկայացնելու համար իրենց հիմնավորումները, թե ինչու նախարարությունները չպետք է փակվեն:

Սփյուռքի նախարարության ներկայացուցիչ Լրոն Անտոնյանը լրագրողների հետ զրույցում ընդգծեց, որ անթույլատրելի է, որ 7-8 մլն Սփյուռք ունեցող պետությունը լուծարի համապատասխան նախարարությունը:

Նա ընդգծեց, որ նախարարությունում նոր թափով մշակվել են հայրենադարձության ծրագրեր, որոնք փաստացի կյանքի կոչել այլևս չեն կարողանա:

«Մեր նախարարի դիրքորոշումը եղել է նախարարությունը պահելը, իր ձեռքերը ծալած չեն, կփորձի իր քայլերը կատարել: Մենք փաստացի ունենք 10 վարչություններ, բաժիներ, վարչության պետեր, աշխատակիցներ. ստացվում է, որ օպիտմալացման արդյունքում Սփյուքից այստեղ բերելու փոխարեն արտագաղթի տեմպերն ենք ավելացնում»,- շեշտեց նա:





09:30

Մշակույթի նախարարության աշխատակիցները նախարարության շենքի դիմաց գործադուլ են իրականացնում:

Աշխատակիցները բողոքում են նախարարությունների օպտիմալացման/միավորման դեմ: Նրանք դիմում-բողոք են պատրաստել հանրապետության վարչապետի պաշտոնակատար Նիկոլ Փաշինյանի անունով:

Աշխատակիցները բողոքում են, որ իրենց ոչ ոք օպտիմալացման մասին տեղյակ չի պահել:

«Մեզ միայն երեկ գրություն է ուղարկվել, որ նախարարությունը մի մասով միանում է Կրթության նախարարությանը, մյուս մասով՝ Քաղաքաշինության կոմիտեին»,- ասաց բողոքի ակցիայի մասնակիցներից մեկը:

Աշխատակիցները պնդում են, որ ոչ մի մասնագիտական, հանրային քննարկում չի եղել:

«Չգիտեմ՝ ովքեր են որոշել, ինչպես են որոշել. ինչպե՞ս կարելի է փակել նման կարևոր կառույցը»,- նշեց ակցիայի մասնակիցներից մեկը:  

Նշենք, որ բողոքի ակցիային ներկա են նաև այլ գերատեսչությունների աշխատակիցներ: 

Մասնավորապես, Սփյուռքի նախարարության աշխատակիցը նշում է,որ իրենց գերատեսչության գործառույթները շատ կարևոր են, և նախարարության լուծարումը դեմոգրաֆիական նոր խնդիրների կհանգեցնի: 

Հիշեցնենք, որ Կառավարության կառուցվածքի վերաձևավորման արդյունքում ՀՀ նախարարությունների թիվը 17-ից կհասնի 12-ի։

Փոփոխությունների համաձայն՝ լուծարվելու է Սփյուռքի նախարարությունը։ Տրանսպորտի, կապի ու տեղեկատվական տեխնոլոգիաների նախարարությունը կդառնա կապի ու բարձր տեխնոլոգիաների նախարարություն։ Տնտեսական զարգացման ու ներդրումների և գյուղատնտեսության նախարարությունները կմիավորվեն։ Աշխատանքի ու սոցիալական հարցերի նախարարությունը կմիանա տարածքային կառավարման ու զարգացման նախարարությանը։ Մշակույթի, սպորտի ու երիտասարդության նախարարությունները կմիավորվեն կրթության և գիտության նախարարությանը։