Ցանկացած նման հանդիպում, որն ապահովում է խաղաղ բանակցային գործընթացի շարունակությունը, ողջունում ենք. Դավիթ Բաբայանը՝ Փաշինյան-Ալիև հանդիպման մասին

Ցանկացած նման հանդիպում մենք ողջունում ենք, այն առումով, որ դրանք դիտարկում ենք որպես խաղաղ բանակցային գործընթացի  շարունակություն ապահովող և տարածաշրջանում խաղաղությանն ու կայունությանը նպաստող կարևոր հանգամանք:

Tert.am-ի հետ զրույցում նման տեսակետ հայտնեց Արցախի նախագահի մամուլի խոսնակ Դավիթ Բաբայանը՝ անդրադառնալով Դավոսում կայացած Փաշինյան-Ալիև հանդիպմանը: Բաբայանը նշեց, որ հանդիպումը կանխատեսելի էր, և չի բացառվում, որ հանդիպումը  կարող է նախապես ծրագրավորված չլիներ, քանի որ երկու երկրների նախագահները գտնվում էին միևնույն վայրում, և իսկապես հնարավոր չէր, որ մեկը մյուսին չտեսնեին:

Թեև ոչ պաշտոնական, բայց նման ձևաչափով հանդիպումը, ըստ Դավիթ Բաբայանի, չի նշանակում, որ բանակցային լիարժեք ձևաչափի վերականգնման հարցը հայկական կողմի օրակարգից դուրս է եկել: Հիշեցնենք, որ Նիկոլ Փաշինյանը նշել էր, որ Արցախը պետք է բանակցային կողմ լինի, և ինքն իր փոխարեն բանակցի:

«Այն, որ Արցախը պետք է մասնակցի, և առանց Արցախի մասնակցության հնարավոր չէ հասնել համապարփակ կարգավորման, սա փաստ է: Երբ որ նոր իշխանությունները դրա մասին ավելի էին հաճախակի բարձրաձայնում, մենք դա ողջունել ենք, նաև նշել ենք, որ այս գործընթացը շատ բարդ գործընթաց է լինելու, աշխատատար և ժամանակատար, որպեսզի վերականգնեն բանակցային լիարժեք ձևաչափը»,-ասաց նա:  

Ըստ Բաբայանի՝ պարզ է, որ Ադրբեջանն ամեն ինչ անելու է, որպեսզի չվերականգնվի լիարժեք ձևաչափը. «Բայց դա չի նշանակում՝ մենք պետք է հրաժարվենք այդ ամենից, պարզապես իրավիճակը պետք է  գնահատենք այնպիսին, ինչպիսին որ կա, և պետք է աշխատենք այդ ուղղությամբ և միշտ մտապահենք, որ բարդ գործընթաց է, երկար ժամանակ է պահանջելու և մեծ ջանքեր»,-ասաց նա:

Հարցին, թե հաշվի առնելով ԱԳ նախարարների վերջին հանդիպումից հետո ԵԱՀԿ խմբի հայտարարությունը, թե հասարակություններին պետք է պատրաստել խաղաղության, արդյո՞ք այս հանդիպումն այդ գործընթացի շարունակությունն է, և քննարկման առանցքում դրան հաջորդելիք գործողություններն են, Արցախի նախագահի մամուլի խոսնակը պատասխանեց, որ երբ խոսում են ժողովուրդներին խաղաղության պատրաստելու մասին, պետք է հասկանալ, որ դա պատգամ է, ցանկություն:

«Իրենք չենք ասում՝ պարտադրել ինչ-որ որոշում կամ հրամցնել այն, փորձել համոզել այս կամ այն ընդունելի տարբերակը: Դե ո՞վ չի ուզում, որ խաղաղություն լինի, բայց հարցն այն է, թե ինչ ձևով պետք է դրան հասնել, օրինակ՝ Ադրբեջանի դեպքում դա տարիների պահանջ է, և այդ երկիրը թաթախված է հայատյացությամբ՝ մսուր-մանկապարտեզից սկսած մինչև նախագահի աշխատակազմ և իր ընտանիքը: Հիմա ինչպե՞ս կարելի է մեկ շաբաթում կամ մեկ ամսում նման հարցերին հասնել, դա անհնարին է, դրա համար այդ հայատյացության մեջ չկա ժամկետ, խաղաղությունը պատրաստելն անժամկետ հարց է, իսկ դա նշանակում է, որ Ադրբեջանը պետք է հրաժարվի հայատյաց նացիստական քաղաքականությունից, ռևանշիզմից և այլն: Բայց չէ՞ որ նա շարունակում է նույն քաղաքականությունը նաև այդ հայտարարությունից հետո, որ Արցախն իրենն է, Երևանն իրենն է, և բացի երկար ժամանակից, նաև միջազգային հանրությունը համապատասխան կոչերից պետք է անցնի գործնական քայլերի և ամեն ձևով փորձի սանկցիաների միջոցով պայքարի հայատյացության, նացիզմի դեմ, այսինքն՝ սա բարդ է լինելու, և նրանք խաղաղության պատրաստ չեն»:

Իսկ թե, ըստ նրա, թեկուզ ոչ պաշտոնական այդ հանդիպմանը հնարավոր է՝ բեկումնային առաջարկներ լինեն, և ինչ սպասել, ասաց, որ չի բացառվում՝ տարբեր առաջարկներ լինեն, ինչպես պարբերաբար լինում է: «Բայց ասում եմ, որ դրանք չեն կարող լինել պարտադրված, և ԵԱՀԿ խմբի ղեկավարներն են ասում, որ իրենք չեն հանդիսանում  դատավորներ կամ պարտադրող կողմ: Այսինքն՝ ինչ էլ որ լինի, քննարկման առարկա է, և բազմաթիվ առաջարկներ են եղել, բայց  բոլոր դրանք տապալվել են առաջին հերթին Ադրբեջանի կողմից, և անկախ նրանից՝ ինչ առաջարկ կլինի, որը չի բացառվում, դա պարզապես  գործնական բնույթ պետք է տեսնենք և ոչ թե այլ բան: Այլևս կողմերը պատրաստ չեն, որ բեկում լինի առաջին հերթին նրա պատճառով, որ Ադրբեջանը չի հրաժարվում այդ ամենից»,-ասաց նա: