Ադրբեջանը շարունակում է պատերազմ չսկսելը «ծախել» որպես զիջում. Նարեկ Մինասյան

Քաղաքագետ Նարեկ Մինասյանի խոսքով՝ Ադրբեջանը մշտապես դիմում է մանիպուլյացիոն հնարքների, իսկ «տարածքներ՝ խաղաղության դիմաց» բանաձևը յուրովի է մեկնաբանում: Նա Tert.am-ի հետ զրույցում նման դիտարկում արեց՝ անդրադառնալով հիմնախնդրի շուրջ վերջին զարգացումներին:

«Պետք է արձանագրել հստակ՝ Լեռնային Ղարաբաղի կարգավորման բանակցային գործընթացը մինչ հիմա չի վերսկսվել,- ասաց նա՝ համոզմունք հայտնելով, որ հիմա վերոնշյալ բանաձևը բանակցային գործընթացում չկա և չի քննարկվում,- այլ բան է, երբ տարբեր ուժեր տարբեր տարիներին շրջանառել են նման թեզեր՝ ինչ-ինչ  նպատակներ ունենալով: Հայկական կողմի համար այդ թեզն անընդունելի է այն պարզ պատճառով, որովհետև այն տարիներ շարունակ Ադրբեջանի կողմից շրջանառվող թեզի շարունակությունն է. ադրբեջանական կողմը փորձում է հայկական կողմի հետ տարվող բանակցությունները, պատերազմ չսկսելը «ծախել» որպես զիջում և ներկայացնել միջազգային հանրությանը, որ այդ «զիջման» դիմաց հայկական կողմն էլ պետք է համարժեք զիջում անի: Հայկական կողմը հիմա էլ բարձրաձայնում է, որ ուժի սպառնալիքի մասին խոսելով՝ հնարավոր չէ զիջումներ կորզել, իսկ հայաստանյան և արցախյան բանակը ունակ է ցանկացած հարվածի պատասխանել»:

Հիշեցնենք, որ Ադրբեջանի արտգործնախարարությունն արձագանքել էր Հայաստանի վարչապետի հայտարարությանը, որ Հայաստանը չի կարող քննարկել «տարածքներ՝ ստատուսի դիմաց» բանաձևը՝ նշելով, որ Նիկոլ Փաշինյանի տրամաբանությունը դժվար է հասկանալ. «Ինչպես հայտնի է, ԵԱՀԿ Մինսկի խմբի հովանու ներքո ընթացող ղարաբաղյան խնդրի կարգավորման բանակցությունների հիմքում ընկած է հենց հայկական ուժերի դուրսբերումը Ադրբեջանի գրավյալ տարածքներից։ Այդ դեպքում հարց է առաջանում՝ պարոն Փաշինյանի այդ հայտարարությունն արդյոք նշանակո՞ւմ է հրաժարում բանակցություններից»,- նշված էր հայտարարության մեջ:

Նարեկ Մինասյանը պատահական չհամարեց, որ Նիկոլ Փաշինյանը միջազգային իր գործընկերների հետ հանդիպումների ժամանակ նշում է, որ լավ կլինի՝ Ադրբեջանը հստակեցնի, թե ինչ փոխզիջումների է գնալու ինքն անձամբ կարգավորման գործընթացում: «Ադրբեջանական կողը չի էլ բարձրաձայնում, թե ինչ զիջումների է պատրաստ կարգավորման համար»,- ասաց նա:

Իսկ արդյոք այդ պարագայում պետք է գնալ բանակցությունների: Նարեկ Մինասյանի խոսքով՝ այդ հարցը պետք է տրվի հենց բանակցությունների նախօրեին, երբ խոսվի, որ պետք է բանակցություններ լինեն: «Բնականաբար, այդ բանակցությունները չեն կարող լինել ինքնանպատակ: Դրանով է նաև պայմանավորված, որ արդեն մոտ 7 ամիս նման հանդիպում չի եղել. այս պահին դեռ չկա այն հիմքը, որի շուրջ կողմերը կարող են բանակցել»,- ասաց նա:

Նարեկ Մինասյանի խոսքով՝ չի բացառվում, որ արտգործնախարարներին համանախագահների միջնորդությամբ հաջողվի մի այնպիսի կետի հասնել, որ հնարավոր լինի նման հանդիպում կազմակերպել:

«Այնուամենայնիվ, այս պահին այդ հիմքը չկա, որ բանակցություններ լինեն: Թե երբ վերջնական այն պատրաստ կլինի, երբ երկու երկրների ղեկավարները կհանդիպեն, դեռ պարզ չէ: Համենայն դեպս համանախագահներն աշխատում են, առաջիկայում նրանք այցելելու են տարածաշրջան, և այդ ընթացքում էլ երևի կքննարկվի ղեկավարների հանդիպման թեման»,- ասաց նա:

Քաղաքագետը նկատեց, որ Հայաստանում տեղի ունեցած իշխանափոխությունից հետո, երբ երկիրը դրական իմիջ ձեռք բերեց, Ադրբեջանն էլ որդեգրեց մի քաղաքականություն, որ չտուժի քաղաքակրթական հարթության մեջ:

«Հակամարտության կոնտեքստում Ադրբեջանը փորձեց փոխել իր իմիջը և ձեռնարկեց մի շարք քայլեր, որպեսզի միջազգային հանրությունում ընկալվի որպես կառուցողական կողմ: Տարիներ շարունակ հայկական կողմն էր համարվում կառուցողական կողմը հակամարտության կարգավորման գործընթացում, հիմա այդ դերը Ադրբեջանն է փորձում վերցնել իր վրա: Այդ ուղղությամբ որոշակի քայլեր է անում. դեռևս պահում է Դուշանբեի պայմանավորվածությունները, հանդես է գալիս գերիների փոխանակման առաջարկով, Նախիջևանում ռազմական զորախումբը փոխարինում է սահմանապահ զորքերով և այլն: Այս ամենին զուգահեռ, սակայն, Ադրբեջանը չի փոխել ո՛չ իր ռազմատենչ հռետորաբանությունը, ո՛չ էլ հիմնախնդրի կարգավորման վերաբերյալ իր մոտեցումները»:

Այս պարագայում, քաղաքագետի խոսքով, հայկական կողմը պետք է միջազգային շփումների ժամանակ տեղ հասցնի, որ պատրաստակամ է շարունակել բանակցությունները և բացահայտել ադրբեջանական կողմի քայլերի իրական նպատակը:

«Պետք է ցույց տալ, որ Ադրբեջանի քաղաքական ղեկավարության մոտ մոտեցումների փոփոխություն դեռևս չկա: Ստեղծված իրավիճակում հայկական կողմը կարող է հանդես գալ նաև այնպիսի նախաձեռնություններով, որոնք չկատարելու դեպքում Ադրբեջանը կբացահայտի իր դեմքը, իսկ կատարելու դեպքում նպաստ կլինի  իրավիճակի հանդարտեցմանը»,- ասաց նա: