Մարտի 1-ի դեպքերի հարցով ՀՀ-ն մոնիտորինգային գործընթացի տակ է. ԵԽԽՎ-ում ՀՀ պատվիրակության ամփոփիչ ասուլիսը

ԵԽԽՎ ձմեռային նստաշրջանին հայկական պատվիրակությանը առնչվող հարցը հիմնականում վերաբերում էր ընտրություններին. այս մասին լրագրողների հետ զրույցում ասաց պատվիրակության ղեկավար Ռուբեն Ռուբինյանը, ով նշեց, որ բոլորը դրական գնահատական տվեցին ՀՀ-ում անցկացված ընտրությունները:  «Բոլորը շնորհավորում էին ժողովրդավարության ահռելի առաջընթացի համար»,-ասաց նա:

ԵԽԽՎ հայաստանյան պատվիրակության նոր անդամները հանդիպել են նաև ԵԽԽՎ նախագահ վերընտրված Լիլիան Մորի Պասկենի հետ, ով նշել է, որ ՀՀ-ի օրինակը որոշիչ պետք է  լինի այլ երկրների համար:

Նշենք, որ ԵԽԽՎ ձմեռային նստաշրջանը մեկնարկել էր հունվարի 21-ին և ավարտվել  հունվարի 25-ին:

Ամփոփ ասուլիսին ԵԽԽՎ պատվիրակության ղեկավարն անդրադարձավ Եվրոպայի խորհրդի մարդու իրավունքների հարցերով հանձնակատար Դունյա Միյատովիչի՝ Հայաստանի Հանրապետության վերաբերյալ զեկույցին, որտեղ անդրադարձել էր 2008թ.-ի մարտի 1-ի դեպքերի բացահայտմանն ուղղված գործողություններին:

Նա չհամաձայնեց լրագրողի դիտարկումներին, որ դա քաղաքական վրեժխնդրության կամ ընտրովի արդարադատության վերաբերյալ ահազանգ էր: «Համաձայն չեմ ահազանգ տերմինի հետ, չկա զեկույց, որում նշվի, որ ՀՀ-ում խախտվել է արդարությունը, կամ արդարադատությունը, կա կոչ՝ ապահովել, որպեսզի բոլոր գործերն անցնեն պատշաճ արդար քննության միջոցով, դրական կոչ է, մենք այսպես, թե այնպես դա անելու ենք և անում ենք»,-ասաց նա:

Պատվիրակության անդամ ԼՀԿ խմբակցության ղեկավար Էդմոն Մարուքյանը ևս համաձայնվեց, որ զեկույցում մեղադրանք չի տեսել: «Մտահոգությունների մասին էր կոչ արվում, կամ որ չափանիշները պետք է պահպանվեն: Պետք է ըմբռնել, որ կոչերը կլինեն, թե չեն լինի, այդ չափանիշները պետք է պահպանվեն, զեկուցողները լինեն-չլինեն, եթե մենք որպես ընդդիմություն տեսնենք, որ քաղաքական հաշվեհարդար կա կամ քաղաքական հետապնդում, համենայն դեպս մեր դիտարկումները նման եզրահանգման չեն բերել»,-ասաց նա և հավելեց, որ եթե միջազգային փորձագետները կարձանագրեն՝ իրենք կլինեն ավելի ուշադիր:

Հարցին, թե այս պահին ՀՀ-ն ի՞նչ մոնիտորինգի տակ է, հանձնաժողովի անդամ Վլադիմիր Վարդանյանը նշեց, որ ոչ միշտ է, որ իրավիճակային մոնիտորինգ է  իրականացվում: Նա տեղեկացրեց, որ Մարտի մեկի դեպքերի հարցով մոնիտորինգային գործընթացի տակ է: «Եթե մոնիտորինգ է, դա չի նշանակում, որ պետությունը դասվել է ինչ-որ ժողովրդավարության տեսանկյունից խնդիրներ ունեցող երկրների շարքում»,-ասաց նա և նշեց, որ հարցը դեռևս կշարունակի օրակարգում մնալ:

«Հուսով ենք, որ մոտակա ժամանակահատվածներում մենք կարձանագրենք որոշակի պրոգրես և կշրջանցենք մոնիտորինգի ժամանակաշրջանը: Պետք է  ուշադրություն դարձնել, որ ժողովրդավարությունը ստատիկ վիճակ չէ, ԵԽԽՎ-ն արձանագրում է և՛ ժողովրդավարության նահանջ և զարգացում»,-ասաց նա:

Ճշգրտող հարցին՝այսինքն՝ ՀՀ-ն մոնիտորինգի տա՞կ է Մարտի 1-ի բացահայտման մասով, բայց ոչ քաղաքական հետապնդումների, Վարդանյանը հստակ չպատասխանեց. «Տեսեք մոնիտորինգ նշանակում է պարզել՝ որքանով  է պետությունը կատարում իր կողմից ստանձնած պարտավորությունները, և եթե ԵԽԽՎ-ում կամ այլ կառույցում կասկածներ են առաջանում առ այն, որ տվյալ երկիրն իր ստանձնած պարտավորությունները պարկեշտ եղանակով չի իրականացնում, ապա նախաձեռնում է մոնիտորինգային  գործընթաց, ինչը նորմալ է, որովհետև ցանկացած երկրում կարող է լինել ժողովրդավարության զարգացում կամ նահանջ, և այդ հետնահանջը կարող է պատճառ դառնալ, որ այդ պետությունը դուրս մնա ԵԽԽՎ կազմից: Այնպես որ, ես չէի պայմանավորվի այս կամ այն դրվագով,  սա ընդամենը ստանձնած պարտավորությունների կատարման որակի ստուգման գործընթաց է, որը, կարծես թե, նորմալ է»,-ասաց նա: