Իշխանությունները փորձում են հակասահմանադրական եղանակով մեկուսացնել ՍԴ-ն. Սիրանուշ Սահակյանը՝ սահմանադրական փոփոխությունների մասին

Սահմանադրական փոփոխությունների անհրաժեշտությունը պետք է հիմնավորի նախաձեռնող կողմը` հստակ մատնանշելով, թե ինչպիսի խութեր կան Սահմանադրության մեջ, որը հասարակության զարգացումը չի կարողանում ապահովել: Այս մասին  Tert.am-ի հետ զրույցում ասաց «Իրավական ուղի» ՀԿ համահիմնադիր Սիրանուշ Սահակյանը` անդրադառնալով Սահմանադրական փոփոխություններ իրականացնելու՝ իշխանության նախաձեռնության անհրաժեշտությանը:

«Քանի որ փոփոխությունների անհրաժեշտության վերաբերյալ հիմնավորումներ չեն ներկայացվում, այս պահին ունեմ տպավորություն, որ նախաձեռնող սուբյեկտը չի պատկերացնում, թե ինչ խնդիրներ կան և գործընթացի ժամանակ կմտածեն: Ես համարում եմ այս պահին այդ փոփոխությունները ոչ առարկայական, քանի որ չի մատնանշվում, թե որ խնդիրների գոյության պայմաններում ինչ խնդիրներ են դրվելու»,-ասաց նա:

Անդրադառնալով «Ազգային ժողով կանոնակարգ» սահմանադրական օրենքում փոփոխություններ և լրացումներ կատարելու նախաձեռնությանը Սիրանուշ Սահակյանն ասաց, որ այդ նախագծով կասկածի տակ են դնում նախաձեռնող սուբյեկտի բարի մղումները:

«Սահմանադրական դատարանը, որը 2015 թվականի Սահմանադրությամբ առանցքային դերակատարություն ունի Սահմանադրական փոփոխությունների նախագծի սահմանադրականությունը որոշելու հարցում, վերջինս մեկուսացվում է այս նոր օրենսդրական փոփոխություններով: Այսինքն՝ փորձ են անում մեկուսացնել Սահմանադրական փոփոխությունների գործընթացից Սահմանադրական դատարանը և դա կատարվում է հակասահմանադրական օրինագծի միջոցով»,-ասաց նա:

Սիրանուշ Սահակյանը նկատեց, որ ՀՀ Սահմանադրությունը Սահմանադրական դատարանին վերապահել է պարտադիր լիազորություն նախագծի փոփոխությունների սահմանադրականությունը գնահատելու և միջազգային պայմանագրերի Սահմանադրության համապատասխանությունը գնահատելու համար:

«Որոշ հարցերում հայեցողություն է տրված սուբյեկտներին` դիմել կամ չդիմել Սահմանադրական դատարան, բայց մի խումբ սահմանափակ հարցերով, որոնց մեջ մտնում են տարածքային փոփոխությունները, միջազգային պայմանագրերը և Սահմանադրության փոփոխությունների նախագիծը, պարտադիր սահմանադրական վերահսկողության մեխանիզմ է նախատեսվել: Մենք հիմա տեսնում ենք, որ Սահմանադրության լուծումներին ուղղակի հակասող օրենսդրական փոփոխություններով Սահմանադրական դատարանի այս լիազորությունը փորձում են վերացնել` մեկնաբանելով, որ Ազգային ժողովն ինքը կարող է որոշել դիմել, թե չդիմել Սահմանադրական դատարանին: Գուցե մենք վաղն էլ ունենանք ավելի վատ պրոցես, և Կառավարությունն էլ ինքը որոշի միջազգային պայմանագրերի հարցերով դիմել Սահմանադրական դատարանում կամ չդիմել` մեկնաբանելով, որ դա հայեցողություն է: Եվ շատ ավելի վատ է, որ տարածքային փոփոխությունների հետ կապված հարցերով ևս կարող է որպես հայեցողություն մեկնաբանվել»,-ասաց նա:

Սիրանուշ Սահակյանը հռետորական հարց ուղղեց. եթե Սահմանադրական փոփոխությունների, «Ազգային ժողով կանոնակարգ» սահմանադրական օրենքում փոփոխություններ  նախաձեռնության հեղինակների մղումները բարի են և նպատակը հասարակության զարգացումն է, այլ ոչ թե խմբերի շահերն ամրապնդող սահմանադրական փոփոխությունների իրականացումը, ապա ինչո՞վ է պայմանավորված հակասահմանադրական եղանակով Սահմանադրական դատարանին մեկուսացնելը:

«Երկրորդ, եթե իրենց մղումներն իրոք բարի են, ինչո՞ւ են դա նախաձեռնում արտահերթ ընթացակարգով և այս նախագծերը փորձաքննության չեն ուղարկվում Վենետիկի հանձնաժողովին, որը ամենաառանցքային միջազգային դերակատարն է նմանատիպ օրենքների փոփոխությունների ժամանակ»,-ասաց նա:

Սիրանուշ Սահակյանը նկատեց, որ ամեն ինչ ցույց է տալիս, որ բացառապես քաղաքական նպատակ են հետապնդում այս փոփոխությունները,  որովհետև իրավական գործընթացներում հարգվում են իրավունք պաշտպանող ինստիտուտները: «Եթե իրավունք պաշտպանող ինստիտուտները մեկուսացվում են գործընթացներից, ապա մենք ունենք քաղաքական պրոցեսների հետ»,- ասաց նա և նշեց, որ նկատում է դատական իշխանությունը գործադիր իշխանությանը ենթարկեցնելը փորձեր:

«Ճնշումները շարունակվում են ՍԴ-ի նկատմամբ, և մենք տեսնում ենք պայքար. համակարգը զիջումների չի գնում, և պետք է ուժեղացնեն իրենց գործիքակազմը, որպեսզի վերջնականապես ջարդեն և ենթարկեցնեն Սահմանադրական դատարանը»,- հավելեց նա: