Արցախյան կարգավորման հարցում կա փաստաթուղթ և կա գործընթաց. այս ողջ ընթացքում եղած հայտարարություններն ընդամենը սեփական հասարակությանը ապակողմնորոշելու գործընթաց էին. Կարեն Բեքարյան (տեսանյութ)

Արցախյան կարգավորման հարցում կա փաստաթուղթ, ընթանում է գործընթաց, և այս ողջ ընթացքում եղած հայտարարություններն ընդամենը սեփական հասարակությանը ապակողմնորոշելու գործընթաց էին: Այս մասին «Ոսկանապատ» վերլուծական կենտրոնի կազմակերպած «Արցախը մեծ փոփոխությունների նախաշեմին. արտաքին և ներքին անվտանգություն» թեմայով պանելային քննարկման ընթացքում հայտարարեց վերլուծաբան Կարեն Բեքարյանը՝ նշելով, թե դա հայտնի դարձավ ԱԳ նախարարի՝ հունվարի վերջին Ժնև կատարած այցից հետո:

«Պետք է արձանագրենք, որ բավական երկար ժամանակահատված տևած այն կեղծիքը, որ որևէ կերպ բանակցություն չկա, սեղանին փաստաթուղթ չկա, ժնևյան հանդիպումը ուղղակիորեն ցույց տվեց՝ չտալով մանևրելու հնարավորություն, որովհետև հնգակողմ հայտարարության տակ կա նաև ՀՀ ԱԳ նախարարի ստորագրությունը, իսկ հայտարարության մեջ, բացի կարգավորման գործընթացը, տարաբնույթ ուղղություններից քաղաքական գործընթացին հղում կա՝ սկզբունքների և տարրերի մասին խոսելով: Իսկ մենք բոլորս լավ հիշում ենք, որ սկզբունքների և տարրերի բառակազմը մշտապես կիրառվել է Մադրիդյան սկզբունքների կամ դրանց որևէ վարիացիայի նկատմամբ»,-պարզաբանեց Բեքարյանը:

Նա անդրադարձավ ՀՀ վարչապետ Նիկոլ Փաշինյանի՝ Կապանում կայացած ասուլիսի ընթացքում Արցախյան կարգավորման հարցին առնչվող ելույթին՝ նշելով, թե այն բավական ճղճիմ բեմադրված թատրոն էր՝ ժնևյան հանդիպումից օրեր առաջ. «Նա ասաց՝ «ինչ ունեմ որպես ժառանգություն ստացած նախորդներից»: Իրավիճակի աբսուրդ ունենք այդտեղ. խոսքը վերաբերում է երկրի գլխավոր բանակցողին, ի պաշտոնե՝ այդ պարտականությունը կրողին, և այդ մարդը նախկինների թողած ժառանգության հետ կապված հղում է անում ինչ-որ լրատվամիջոցի հրապարակման»,-ասաց Բեքարյանը՝ նշելով, թե սեփական հանրության նկատմամբ կա հարգանքի լիակատար բացակայություն:

«Այս ձևով արդեն հիմարի տեղ դնել բոլորին՝ հնարավոր է միայն հարգանքի լիակատար բացակայության պարագայում, և որքան շուտ մեր հանրությունը կարողանա դա գիտակցել, այնքան ավելի շուտ մենք բոլորս կհասկանանք ստեղծված մարտահրավերները»,- նշեց նա:

Կարեն Բեքարյանը կարևորեց, որ վարչապետն իր ելույթում հղում արեց լրատվամիջոցի հրապարակման՝ այն ներկայացնելով որպես բացահայտում: «Ես հասկանում եմ, որ իր ամբողջ շեշտադրումը, թիրախավորումը մեր հանրության իր պատկերացմամբ՝ ոչ գրաճանաչ հատվածն է: Գրաճանաչ հատվածը գոնե մի անգամ հասցրել է տեղեկանալ, թե ղարաբաղյան հարցում ԵԱՀԿ Մինսկի խմբի համանախագահների մոտեցումը որն է, և այդ մոտեցումը համանախագահ երկրների մակարդակով բացահայտվել է, որը վերաբերում է երեք սկզբունքներին և վեց տարրերին: Այն, ինչ նա ներկայացնում էր Կապանում, տարիներ ի վեր գաղտնազերծված էլեմենտ է: Մարդը որպես գյուտ ներկայացնում է դա որպես բացահայտում»,-ասաց վերլուծաբանը:

Նրա խոսքով՝ վարչապետը դրանով էլ չսահմանափակվեց՝ անելով մի շատ «էժանագին քայլ»՝ դիմելով Արցախում սպասվող նախագահական ընտրություններին նախագահի թեկնածուներին, առաջարկեց ներկայացնել իրենց կարծիքը Արցախյան հարցի կարգավորման շուրջ։

«Արձագանքած թեկնածուները մրցակցության մեջ մտան: Ստացվում է՝ գործընթացին չմասնակցող սուբյեկտը, այս դեպքում՝ թեկնածուն, տալիս է արձագանք մի բանի վերաբերյալ, որի ամբողջական պատկերը չունի: Փորձ է արվում ՀՀ վարչապետի ուղերձը չթողնել օդում և արձագանքել՝ մրցավազք ստեղծելով: Բայց սրանից հետո տեղի է ունենում ամենաունիկալը՝ ՀՀ ԱԳ նախարարը Ժնևում թքած ունենալով վարչապետի տված հարցմանը Արցախից եկած պատասխանների վրա՝ քննարկում է այն փաստաթուղթը, որը, իբրև թե, բացահայտում էր վարչապետն ու հարցնում Արցախի կարծիքը: Այստեղից հարց՝ եթե արտգործնախարարը շրջանցում է վարչապետի հրահանգները, մենք դա պետք է տեսնեինք, եթե չի շրջանցել, ապա ո՞ւմ համար էինք անում այս թատրոնը, նպատակը ո՞րն էր»,-ասաց Բեքարյանը, ապա շարունակեց.

«Այսինքն՝ սեփական հանրությանը հիմարացնելու այս գործընթացն ինչ-որ տարածում է ստացել ու տրանսֆորմացնել միջազգային հանրության վրա՞ և ՄԱԿ-ի անվտանգության խորհրդի երեք անդամ երկրի վրա՞: Հիմարի տեղ դնելու գործընթացում ռիսկերը հաշվող եղե՞լ է»: