Բանկերի՝ 0 տոկոսով վարկեր տալու ծրագիրն անարդյունավետ է․ գործարարներն այդ փողով կփակեն բարձր տոկոսներով իրենց մյուս վարկերը և այդ գումարը չի հասնի տուժած քաղաքացուն․ Էդմոն Մարուքյան (տեսանյութ)

Տնտեսական միջոցառումների առումով, այսօր քաղաքացիները հայտնվել են մի իրավիճակում, երբ պետությունը միջամտել է նրանց տնտեսական գործունեությանը՝ պետականորեն դադարեցնելով մի շարք ընկերությունների գործունեությունը: Այս մասին ԱԺ-ում լրագրողների հետ զրույցում հայտարարեց ԼՀԿ խմբակցության ղեկավար Էդմոն Մարուքյանը:

«Պատկերացնենք Չարենցավանից Երևան եկած մի կին սրճարանում մատուցողուհի է աշխատել, հիմա նա տան վարձը, կոմունալները, վարկը վճարելու խնդիր ունի: Նման խնդիրներ կան, և մեկ մարդու մասին չէ խոսքը, այլ՝ հազարավոր մարդկանց: Պետությանը կոչ ենք արել՝ ուղղակի ֆինանսական աջակցություն ցուցաբերել այն քաղաքացիներին, որոնք այսօր աշխատում են ամենախոցելի ոլորտներում: Սա նոր հեծանիվ չէ, ամբողջ աշխարհում այս մեթոդն է կիրառվում՝ սկսած ԱՄՆ-ից»,- նշեց Մարուքյանը:

Հարցին՝ պետությունն ունի՞ այդքան միջոցներ, նա պատասխանեց, որ պետությունն ունի ռեզերվներ և պետք է աջակցի, ոչ թե ասի գնացեք զրո տոկոսով վարկ վերցրեք, որը անարդյունավետ միջոց է: «Վտանգ կա, որ բանկերն իրենց մտերիմ գործարարներին կտան զրո տոկոսով այդ վարկերը, այդ վարկերը բանկերի մտերիմ գործարարները կվերցնեն, իրենց բարձր տոկոսով վարկերը կփակեն և կունենան զրո տոկոսով վարկ: Շրջանառու միջոցից կվճարեն այդ աշխատավարձը, կասեն՝ տեսեք ես արեցի, բայց էդ փողերը կծախսեն իրենց վարկերը փակելու համար: Այսինքն՝ դա չի հասնի քաղաքացուն, որը տուժված է: Հետևաբար, երբ մարդիկ բանկերից բողոքում են, պետք չէ մարդկանց էլի բանկ ուղարկել: ԱՄՆ-ում ծրարով աջակցություն են ուղարկվում մարդկանց տներ, ոչ թե ասում են՝ գնացեք բանկեր»,- շեշտեց Մարուքյանը:

Հարցին էլ՝ մոտավոր հաշվարկ ունի՞, թե ինչ գումարի մասին է խոսքը, պատգամավորն արձագանքեց. «Այնքան գումարի, որը նախատեսվում է տալ բանկերին, որպեզի զրո տոկոսով վարկեր տրվեն: Այն ընկերությունները, որոնք փակվել են կամ փակման վտանգի տակ են, նրանք անիմաստ են համարում այդ վարկը վերցնելը, որովհետև չեն կարողանալու հետ վերադարձնել: Մարդիկ կես մլն դոլար վարկ ուեն, ասում են՝ եկեք էլի 200 հազար դոլար վերցրեք, աշխատավարձ տվեք, կոմունալ վճարեք, հետո կբերեք կվերադարձնեք, հիմա այդ եկամունտերը չեն ստանում ու մեծ կորուստներ են կրում, հետո ո՞նց կվերադարձնեն»:

Tert.am-ի հարցին ԲՀԿ ղեկավար Գագիկ Ծառուկյանն ասել էր՝ ինչո՞ւ պետք է ինքը վճարի, ով արտակարգ դրություն մտցրել է, թող նա էլ աշխատակիցներին վճարի՝ Մարուքյանը համակարծի՞ք է այդ մոտեցմանը, նա ասաց, որ չի կարող մեկնաբանել խոշոր սեփականատերերի հայտարարությունները. «Ես մինչև այդ հայտարարել եմ, որ բոլոր այն ոլորտները, որոնք փակվել են պետության միջամտությամբ, պետությունը պետք է աջակցի»:

Դիտարկմանը՝ այսինքն համամիտ է Ծառուկյանի ասածի հետ, նա ասաց. «Դա ես եմ առաջինը ասել, Ծառուկյանը չի ասել, ուղղակի տարբերությունն այն է, որ ես չունեմ հազարավոր աշխատողներ, ինքն ունի»:

Ինչ վերաբերում է վարչապետի նշած երկու արտադրամասին, որտեղ վարակակիր է եղել, սակայն անուն չտալուն, արդյո՞ք դա խուճապ չի առաջացնի մարդկանց մոտ, Մարուքյանն ասաց, որ տեղեկատվությունը պետք է թափանցիկ տրվի: «Որքան մենք ասենք, որ նորմալ է ամեն ինչ, մի անհանգստացեք, այնքան վարակը տարածվելու է, պետք է այս ամենին շատ լուրջ վերաբերվել, իմ առաջարկն էլ այդ գծից էր»:

Դիտրաակմանն էլ՝ կարող ենք ասել, որ պատշաճ գործողություններ չեն իրականցվում կառավարության կողմից՝ վարակը կանխելու համար, նա արձագանքեց. «Դրա մասին ժամանակը կգա, անպայման կխոսենք: Ես կարծում եմ, որ լրջություն է պետք այս ամենին հաղորդել, այն արձագանքը, որ եղավ իմ առաջարկի վերաբերյալ, դա խոսում է այս ամենին անլուրջ վերաբերվելու մասին, այդ անիմաստ հերոսանալու կոչերն ուղղակի անլուրջ էր»:

Մանրամասները՝ տեսանյութում։