Չիլի պղպեղը նվազեցնում է լյարդում ճարպերի մակարդակը. գիտնականներ

11:24 • 03.10.20

Կծու պղպեղի տարբեր տեսակների մեջ պարունակվող ակտիվ բաղադրիչը կապսաիցինն է, որը պատասխանատու է մթերքի կծու համի համար, սակայն քչերին է հայտնի, որ այն նաև շատ օգտակար է առողջության համար։ Այս նյութի ամենակարևոր օգտակար հատկություններից մեկը ցավը մեղմելու ունակությունն է, սակայն ցավազրկող հատկությունները միակը չեն, որով օժտված է կապսաիցինը։ Ճապոնացի գիտնականների նոր հետազոտությունը ցույց է տվել, որ այս միացությունը պաշտպանիչ ազդեցություն է ունենում նաև թթվայնացնող սթրեսի ու ճարպային կուտակումների դեմ։

Japanese Journal of Complementary and Alternative Medicine պարբերականում հրապարակված հետազոտությունը ցույց է տվել, որ առնետների վրա անցկացված գիտափորձերի ընթացքում կապսաիցինը զգալիորեն նվազեցրել է կրծողների լյարդում կուտակված ճարպն ու վիսցելար ճարպը։ Գիտափորձի շրջանակներում գիտնականները կենդանիներին կերակրել են ճարպերով հարուստ մթերքով, ինչպես նաև ալկոհոլ են տվել։ Ուսումնասիրությունները ցույց են տվել, որ կապսաիցինը կարող է պաշտպանել ինչպես ալկոհոլի ազդեցությունից, այնպես էլ ճարպերով հարուստ սննդակարգից։

Կապսաիցինի ազդեցութունը ճարպերով ու ալկոհոլով հարուստ սննդակարգի վրա պարզելու համար գիտնականները չորս շաբաթական առնետներին չորս շաբաթ կերակրել են փորձնական սննդակարգով։ Կրծողներին նրանք բաժանել են չորս խմբի, որոնցից առաջինը վերահսկիչ խումբն էր, երկրորդը՝ կապսաիցին ստացած առնետների խումբը, երրորդը՝ ճարպերով ու ալկոհոլով հարուստ սննդակարգով սնվող առնետների խումբը, իսկ չորրորդում այն առնետներն էին, որոնք սնվում էին ճարպերով ու ալկոհոլով հարուստ սննդակարգով՝ միաժամանակ ստանալով նաև կապսաիցին։ Ընդ որում՝ ալկոհոլը մկներին տրվել է ջրի փոխարեն։

Գիտափորձից հետո մասնագետները նկատել են, որ միայն կապսաիցին և միաժամանակ կապսաիցին ու ալկոհոլ ստացած առնետների մոտ որովայնի հետին պատին ճարպաշերտերի քանակությունն ավելի քիչ էր։ Բացի այդ, այս խմբերի առնետների մոտ նկատվում էր նաև լյարդում կուտակված տրիգլիցերիդների ու թթվայնացնող սթրեսի ավելի ցածր մակարդակներ, քան վերահսկիչ խմբի առնետների մոտ։