Հայաստանին ևս մեկ հնարավորություն տվեցին

Ստրասբուրգում ավարտվեց ԵԽԽՎ ձմեռային նստաշրջանի երկրորդ օրվա նիստի առաջին հատվածը, որի ընթացքում քննարկվեց Հայաստանի նկատմամբ պատժամիջոցներ կիրառելու հարցը։ Ջոն Պրեսկոտի և Ժորժ Կոլոմբիեի զեկույցից հետո, ովքեր առաջարկեցին հետաձգել Հայաստանին ձայնի իրավունքից զրկելու հարցը մինչև ապրիլյան նստաշրջան, այդ խնդրի շուրջ բանավեճ ծավալվեց, որի ընթացքում տարբեր կարծիքներ հնչեցին։

Մի շարք պատվիրակներ համաձայնեցին համազեկուցողների հետ՝ նշելով, որ Հայաստանին պետք է ոչ թե զրկել ձայնի իրավունքից, այլ օգնել վերադառնալ ժողովրդավարության ուղի։ Նրանք նշում էին, որ Հայաստանին՝ ձայնի իրավունքից զրկելուց հետո ժողովրդավարության վիճակը երկրում կտրուկ չի բարելավվելու, և դա ամենևին էլ լուծում չէ։ Մասնավորապես, Ռուսաստանի ներկայացուցիչ Վյաչելսավ Տիմչենկոն նշեց, որ ինքը կտրականապես դեմ է պատժամիջոցներ կիրառելուն, քանի որ վերջին շրջանում ավագունու և թաղապետերի ընտրությունները Հայաստանում ապացուցեցին, որ Հայաստանի ներկայիս իշխանություններն առավել մոտ են կանգնած ժողովրդին։ Նա նշեց նաև, որ այդ ամենը նա գիտի ոչ թե զեկույցներից, այլ այն պատճառով, որ իր աղջիկն ամուսնացած է հայի հետ, և տվյալ իրավիճակն իրեն հասանելի է բազամթիվ բարեկամներից, ովքեր ապրում են Հայաստանում։

Բնական է, որ Հայաստանին ձայնի իրավունքից զրկելու կողմ էին Ադրբեջանի երեք պատվիրակներ, ովքեր իրենց ելույթում չմոռացան խոսել երկակի ստանդարտներից և ադրբեջանական քարոզչական մեքենայի ավանդական դրույթներից։ Ադրբեջանական կողմին պատասխանեց Հայաստանի ներկայացուցիչ Նաիրա Զոհրաբյանը, ով իր խոսքում նշեց, որ ադրբեջանցիների նման ելույթներին բոլորը ծանոթ են, և դրանք ավելորդ է մեկնաբանել։

Այն պատվիրակներից, ովքեր կողմ էին պատժամիջոցներ կիրառելուն, առավել հավասարակշռված էր Շվեդիայի ներկայացուցիչ Մարիետա Պուռբե–Լունդինի խոսքը, ով նշեց, որ Հայաստանի իշխանություններին հնարավորություն էր տրվել ազատել բոլոր կալանավորված անձանց դեռևս վեց ամիս առաջ, սակայն դա տեղի չի ունեցել մինչ այսօր։ Պուռբե–Լունդինն ասաց, որ ինքն առաջարկել էր այս հարցը քննարկել դեռևս հոկտեմբերին, սակայն դա տեղի չէր ունեցել, և, օգտվելով դրանից, Հայաստանի իշխանությունները պարզապես ձգձգում են և չեն կատարում Վեհաժողովի պահանջները։ Ուկրաինայի ներկայացուցիչ Օլգա Գերասիմյուկն իր հերթին նշեց, որ, թեև ինքը դեմ է Հայաստանին ձայնի իրավունքից զրկելուն, սակայն կարծում է, որ  Հայաստանի ընդդիմությանը  պետք է հնարավորություն տալ ավելի  լայն  մասնակցություն ցուցաբերել աշխատանքային գործընթացին։ Գերասիմյուկը նշեց, որ այսօր ընդդիմությունն ընդամենը հնարավորություն է ունեցել գրավոր տարածել իր կարծիքը։

Փակման խոսքում համազեկուցող Ջոն Պրեսկոտը ևս մեկ անգամ հակիրճ խոսեց իրենց աշխատանքի և կատարած եզարահանգումների մասին՝ կոչ անելով քվեարկել իրենց կողմից առաջարկված նոր բանաձևի օգտին, որի համաձայն Հայաստանի հարցի քննարկումը տեղափոխվում է և ՀՀ իշխանություններին հնարավորություն է տրվում կատարել ԵԽԽՎ պահանջները։ Պատվիրակները կողմ քվեարկեցին տվյալ առաջարկությանը։