Հիմար և ապօրինի արարք. Գարեգին Չուգասզյանն՝ իրեն բերման ենթարկելու մասին

Նախախորհրդարանի քարտուղարության անդամ Գարեգին Չուգասզյանը երեկ «Ազատության» հրապարակում հանրահավաքին հետևած երթի ժամանակ իրեն բերման ենթարկելը համարում է հիմար և ապօրինի արարք:

Tert.am-ի հետ զրույցում Գարեգին Չուգասզյանն ասաց, որ ոստիկանության քայլը ապօրինի էր, որովհետև, միևնույն է, ժողովուրդը գնաց Փակ շուկա և այնտեղ անցկացրեց շտապ հավաքը:
 

«Ելույթ ունեցան մտավորականներ, իրենց մտահոգությունն արտահայտեցին, որ բարբարոսությունն ու ապօրինի շինարարությունը բոլորի աչքի առաջ շարունակվում է, և այսօրվա իշխանությունը այսօրվա օլիգարխիայի առաջ անզոր է»,- ասաց Գարեգին Չուգասզյանը և հավելեց,- իսկ ապօրինի, որովհետև եթե անգամ ոստիկանությունը համարում էր, որ իմ՝ Փակ շուկայի մոտ շտապ հավաք անցկացնելու կոչով վարչական խախտում է տեղի ունեցել, իրավունք չունեին իմ ազատությունը սահմանափակել, տանել բաժին»:
 

Նախախորհրդարանի քարտուղարության անդամը հավելվեց, որ համաձայն կազմված արձանագրության՝ ինքը խախտել է Վարչական օրենսգրքի 150-րդ հոդվածի 15-րդ կետը:
 

«Ինձ գնդապետ Օսիպյանը մեղադրեց, որ ես անօրինական երթի կոչ եմ արել, մինչդեռ ես արել եմ Փակ շուկայի մոտ շտապ հավաք անցկացնելու կոչ՝ Երևանի կենտրոնում տեղի ունեցող բարբարոսության նկատմամբ ուշադրություն հրավիրելու համար»,- մեկնաբանեց Գարեգին Չուգասզյանը, ով բողոքարկելու է իր նկատմամբ սահմանված տուգանքը և խորհրդակցում է իրավաբանների հետ:

Հիշեցնենք, որ այս տարվա նախագահական ընտրություններից հետո հետընտրական Հայաստանում գրեթե ամեն օր ինքնաբուխ երթեր էին անցկացվում, բայց եթե անգամ բաժիններ բերման ենթարկվելու դեպքեր էլ լինում էին, ապա միայն երիտասարդ ակտիվիստների պարագայում:

Հարցադրումը՝ հնարավո՞ր է՝ իրեն բերման են ենթարկել, որովհետև ոստիկաններն արձանագրել են քաղաքացիական պասիվություն, անտարբերություն, միգուցե՝ երթի ոչ բազմամարդ լինելն ու ամառվա շոգը և իրենց ավելի ապահով են զգացել,
Գարեգին Չուգասզյանը կտրականապես հերքեց. «Բացարձակապես, կրկնում եմ՝ սա հիմարության արդյունք է, որովհետև իրենց ինչի՞ն էր պետք քաղաքի կենտրոնում աղմուկ-աղաղակը՝ զբոսաշրջիկների ներկայությամբ: Ի՞նչ ստացան դրանից. ապահովությու՞ն, թե՞ հերթական իրենց հիմար որոշումների արձագանքը»:


Նախախորհրդարանի առաջիկա երկու ամսվա անելիքների պահով Գարեգին Չուգասզյանն առանձնացրեց «Արդարության ատյանի» ստեղծումը՝ որակելով որպես Նախախորհրդարանի գլխավոր քայլ:

«Այն արդեն անհրաժեշտություն է դարձել, որովհետև թե՛ Վահե Ավետյանի գործը և թե՛ էկոլոգիական աղետը, որ տեղի է ունենում Սյունիքում և այս մշակութային աղետը, էնքան նյութեր են կուտակվել, որ Քաղաքացիական դատարանը պետք է քննի ու վճիռ կայացնի»:
 

Նախախորհրդարանի անդամի հավելմամբ՝ անցումային արդարադատության խնդիր է ծագում, երբ երկրում չի գործում արդարադատական համակարգը կամ դառնում է օլիգարխիայի կցորդը:
 

«Երբ դատարանը չի իրականացնում իր գործառույթները, երբ վկաներին չի հարցաքննում, հրաժարվում է հարցեր տալ Վահե Ավետյանին բուժող բժշկին, մասնավորապես, նրա մահը ե՞րբ է վրա հասել, էդ ժամանակ էդ հարցը բժշկին ժողովուրդը պետք է տա՝ մահը ե՞րբ է վրա հասել, և երբ բժիշկը ասում է, որ այն վրա է հասել նույն օրը, էդ ամեն ինչը պետք է ֆիքսվի ու ներկայացվի հանրությանը»,-ասաց Նախախորհրդարանի անդամը:
 

Ժողովրդի ինքնակազմակերպումը Նախախորհրդարանի հռչակած թիվ մեկ առաջնահերթությունն է: Իհարկե, ֆորսմաժորային իրավիճակի դեպքում Նախախորհրդարանը հընթացս կարձագանքի տարաբնույթ իրադարձությունների, բայց, ըստ Նախախորհրդարանի անդամի՝ որպես թիվ մեկ առաջնահերթություն պետք է պահպանվի ժողովրդի ինքնակազմակերպման խնդիրը:
 

«Հասարակական շատ խնդիրներ կան, բայց այլ ճանապարհով գնալու դեպքում մենք միայն հետևանքների դեմ կպայքարենք, այլ ոչ խնդիրների: Իհարկե, հետևանքների դեմ պայքարել պետք է, բայց սկզբից պետք է վերհանել պատճառները»: