Ուկրաինայի հայ համայնքը քաղաքական հարցեր չի քննարկում. համայնքի քարտուղար Սամվել Ազիզյան

Ուկրաինայում հայ համայնքը, որպես այդպիսին, քաղաքական կառույց չէ, քաղաքական դիրքորոշումներով հանդես չի գալիս, թեև որքան մարդ, այնքան կարծիք կարող է լինել։ Այս մասին Tert.am-ի հետ զրույցում ասաց Ուկրաինայում հայ համայնքի քարտուղար Սամվել Ազիզյանը՝ ի պատասխան հարցի, թե ներուկրաինական խորը ճգնաժամի պայմաններում, ըստ որոշ կանխատեսումների՝ քաղաքացիական պատերազմի շեմին, հայ համայնքի ներկայացուցիչներն ինչ դիրքորոշում ունեն:

«Մենք քաղաքական օրակարգից դուրս ենք, մենք, այսպես ասած, ապոլիտիկ դիրքում ենք: Մենք չենք մասնակցում, բայց, նորից եմ կրկնում, մարդիկ տարբեր են լինում և տարբեր՝ հայացքների, և իրենք պատասխանում են իրենց համար»,- ասաց Սամվել Ազիզյանը և ավելացրեց. «Հայ համայնքը ոչ քաղաքական կազմակերպություն է, որտեղ տարբեր քաղաքական հայացքների տեր մարդիկ են հավաքված: Իսկ համայնքի ընդհանուր խնդիրը մեր կուլտուրան է, մեր կրոնը»:

Հայ համայնքի ներկայացուցիչը համաձայն չէ դիտարկման հետ, որ, փաստորեն, հայ համայնքը չեզոք է: «Ոչ թե չեզոք ենք, այլ մշտապես հանդես ենք գալիս խաղաղության կոչերով, այն դիրքորոշման օգտին, որ խնդիրը պետք է հանգուցալուծվի խաղաղ ճանապարհով»,- ասում է հայազգի ներկայացուցիչը:

Այդուհանդերձ, հայտնի են բազմաթիվ փաստեր մայդանում հայերի ակտիվ գործունեության մասին. մայդանի առաջին զոհերից է Սերգեյ Նիկոյանը, մայդանում ակտիվորեն հանդես է գալիս տաղանդավոր նկարիչ Բորիս Եղիազարյանը, տեղեկություն ունենք, որ մայդանում շատ ակտիվ է մի հայ աղջիկ, որի ընտանիքը, սակայն, տեղյակ չի եղել:

Սամվել Ազիզյանն ընդունեց, որ կան հայեր, որոնք մասնակցում են, բայց նաև ասաց, որ տեղեկություն չունի՝ նրանք հայ համայնքի անդամնե՞ր են, թե՝ ոչ:

Դիպուկահարի կրակոցին զոհ գնացած Սերգեյ Նիգոյանի դեպքի առնչությամբ, ըստ մեր զրուցակցի, «հայերը ոչ մի խնդիր չունեն», այսինքն՝ հայերի նկատմամբ որևէ խտրականություն չկա, ոչ էլ հակահայկական տրամադրություններ կան:

«Հայ համայնքը ստեղ 1000 տարվա պատմություն ունի, և մեկ օրվա մեջ ոչ կփոխվի, ոչ էլ կարելի է դրա հետ կապել, որովհետև եթե զոհերի մասին խոսենք, Ուկրաինայում երևի ավելի շատ հայ մարտիկներ են զոհվել, քան նույնիսկ Հայաստանի տարածքում: 60 հազար հայ է այստեղ զոհվել ,և նրանք զոհվել են հանուն Ուկրաինայի»,- ավելացրեց հայ համայնքի ներկայացուցիչը:

Ուկրաինայում հայ համայնքի թվաքանակի վերաբերյալ կա պաշտոնական և ոչ պաշտոնական տեղեկություն: Պաշտոնականը՝ 100 հազար մարդն է։ « 2001-ի դրությամբ 100 հազար է, բայց անցել է 13 տարի և, կարծում եմ, շատ են ավելացել»,- ասաց նա։

Հայաստանի արտգործնախարարության մեր աղբյուրը հայտնեց, որ հայերի թիվը Ուկրաինայում 300-400 հազարի սահմաններում է: