Քաղաքական վայրիվերումների պարագայում հաջողվել է գերազանցել այն պլանը, որը բյուջեի հիմքում դրել էր նախորդ կառավարությունը․ ՀՀ վարչապետ

2018 թվականը քաղաքական առումով աննախադեպ տարի էր, անցած տարի տեղի է ունեցել նախագահական մեկ ընտրություն, վարչապետի 5 ընտրություն, ԱԺ արտահերթ մեկ ընտրություն, Երևանի քաղաքապետի մեկ արտահերթ ընտրություն, թավշյա հեղափոխություն և կարևոր է նշել, որ այդ պայմաններում է տեղի ունեցել բյուջեի կատարման ընթացքը. ԱԺ–ում 2018թ-ի բյուջեի կատարողականի քննարկմանը հայտարարեց ՀՀ վարչապետ Նիկոլ Փաշինյանը։

Նա նշեց, որ նման պայմաններում է մայիսին ձևավորվել իրենց կառավարությունը և կարողացել կատարել կարևոր խնդիրը՝ պահպանել մակրոտնտեսական կայունություն։

«Ցանկանում եմ ընդգծել, որ, երևի թե, հնարավոր չէ համաշխարհային պատմության մեջ գտնել նմանօրինակ դեպք, երբ երկրում տեղի են ունենում այսպիսի մասշտաբային փոփոխություններ և դրանք չեն ուղեկցվում տնտեսական ցնցումներով»,-ասաց նա։

ՀՀ վարչապետը նշեց, որ 2018-ին գրանցվել է 5,2% տնտեսական աճ։ «Բայց պետք է ընդգծել, որ նախորդ կառավարության կողմից հաստատված նախագծում որպես տնտեսական աճի կանխատեսում նշվել էր 4,5%, այսինքն՝ ըստ էության ահա այսպիսի գլոբալ քաղաքական վայրիվերումների պարագայում կառավարությանը հաջողվել է  գերազանցել այն պլանը, որը բյուջեի հիմքում դրել էր նախորդ կառավարությունը։ 2018-ին պետական բյուջեն կատարվել է, բյուջեի արդյունքներով ՀՀ կառավարությունը չունի չկատարված պարտավորություններ»,-ասաց վարչապետը։

Նիկոլ Փաշինյանի խոսքով՝ բյուջեի կատարողականի թվային մասերում ոչ մի արտառոց բան չի կատարվել, թերակատարում ունեցել են ծախսային մասով. ոչ ամբողջությամբ է հնարավոր եղել այն իրականացնել։

«Սա կապ ունի մի քանի խնդիրների, այդ թվում՝ կոռուպցիայի դեմ հայտարարած պայքարի հետ։ Այսօր էլ կան խոշոր վարկային ծրագրեր, որոնց հետ կապված հարուցված են քրեական գործեր, և համարում ենք, որ պետական բյուջեի միջոցները պետք է իրացվեն մաքսիմալ արդյունավետ, քաղաքացիները պետք է վստահ լինեն, որ ստանում են այն առավելագույն արդյունավետությունն ու որակը, որն իրենք ակնկալում են»,-ասաց նա։

Վարչապետը նշեց, որ կառավարության մակրոտնտեսական կայունությունը հնարավոր է եղել պահպանել երկու հիմնական պատճառով. «Առաջինը՝ մենք գոհունակությամբ պետք է արձանագրենք, որ ՀՀ–ում կան որոշ կայացած ինստիտուտներ, որոնք թավշյա հեղափոխության շրջանում իրենց դերակատարությունն ունեցան և անկախ վայրիվերումներից կարող են պահել կայունություն և սա շատ լավ նորություն է»։

Երկրորդ պատճառը, ըստ նրա, այն է, որ Հայաստանում տեղի ունեցած հեղափոխությունը թավշյա էր, «թավիշը շատ էր», և ինչպես բազմիցս բարձրաձայնել է, հեղափոխությունը պետք է շատ ավելի կոշտ լիներ։

«Իհարկե, կարող էր և կարող է, բայց առանձնահատկությունն այն է, որ կառավարությունը չի կարող իր առաջ մեկ խնդիր ունենալ, ունի բազմաթիվ խնդիրներ, ինչպես և նախկինում։ կառավարության գործունեությունը համարում եմ բազմաթև կշեռքի նժարներ, սովորական կշեռքն ունենում է երկու նժար, կառավարությունը կառավարում է բազմաժանր կշեռք, և եթե մեկն անհամաչափորեն շեղվի, կունենանք կոլապսներ ուրիշ ոլորտներում։ Այս առումով մեր կառավարությունն իր առաջ խնդիր է դրել հավասարակշռությունը չկորցնել որևէ դեպքում»,-ասաց նա։

Նիկոլ Փաշինյանը նշեց, որ Հայաստանում կարող էր ձերբակալվածների, կալանավորվածների երկնիշ, քառանիշ աճ արձանագրվել, բայց նկատեց, որ դա անխուսափելիորեն կազդեր այլ ցուցանիշների վրա, և այսօրվա առաջին կիսամյակի ցուցանիշները գալիս են վկայելու այդ մասին։  

«Այս բալանսավորված քաղաքականության արդյունքում մենք առաջին եռամսյակի  կտրվածքով ունենք ՀՆԱ-ի 7,1% աճի ցուցանիշ։ Ուզում եմ ընդգծել, որ սա ոչ թե տնտեսական ակտիվության ցուցանիշն է, այլև ՀՆԱ-ի ամփոփված ցուցանիշը։ Ապրիլ ամսվա տվյալներով տնտեսական ակտիվության ցուցանիշն արձանագրվել է 9,2%»,– ասաց նա՝ ավելացնելով, որ դա կառավարություն-խորհրդարան համատեղ աշխատանքի արդյունք է։