Պատերազմը կարող է դադարեցնել ռազմի դաշտում հայերի հաղթանակը, Արցախի  ճանաչում որևէ երկրի կողմից հիմա հնարավոր չէ. Արմեն Բադալյան

Պատերազմը կարող է դադարեցնել ռազմի դաշտում հայկական ուժերի հաղթանակը: Այս մասին Tert.m-ի հետ զրույցում ասաց քաղաքագետ Արմեն Բադալյանը:

Ինչ վերաբերում է հարցին՝ բանակցությունների միջոցով հնարավոր չի՞ համարում հասնել պատերազմի ավարտին, քաղաքագետը նշեց՝ ընդհանրապես բանակցությունները ռազմական գործողությունների շարունակությունն են, և բանակցային գործընթացը կախված է նրանից, թե ռազմի դաշտում ով ինչ հաջողություններ ունի և ըստ այդմ էլ արդեն բանակցում է:

«Իհարկե, պատահում է, որ այնքան ուժեղ հաջողություն չես ունենում, բայց շատ լավ ես բանակցում ու ինչ-որ հաջողություն ես ունենում, բայց հիմնականում ռազմի դաշտում ինչ հաջողություն ունես, ըստ այդմ էլ դու կարողանում ես բանկցություններ անցկացնել: Չնայած՝ պատահում է և հակառակը. դու ռազմի դաշտում բավականին լավ հաջողություններ ես ունենում, սակայն դիվանագիտական դաշտում չես կարողանում դրանք նյութականացնել, այնպես որ, դա էլ է տեղի ունենում»,- հայտարարեց նա:

Քաղաքագետն ընդգծեց՝ հիմա ասել, որ ռազմի դաշտում Հայաստանը հաջողություններ ունի, այս պահի դրությամբ, իհարկե, ըստ պաշտոնական տեղեկությունների, չենք կարող, որովհետև պաշտոնական տեղեկություններով՝ Ադրբեջանը որոշակի տարածքներ արդեն վերցրել է իր վերահսկողության տակ, բայց միևնույն ժամանակ էլ հայկական կողմը նշում է, որ Ադրբեջանին բլիցկրիգ չի հաջողվել: «Այսինքն՝ այստեղ և հաջողություն է, և որոշ տեղում անհաջողություն է, ըստ այդմ էլ, դրանից ելնելով՝ հայկական կողմը պետք է բանակցի և ավելին կարողանա անել: Իշխանական կողմն ավելի լավ կարող է պատկերացնել՝ ինչպիսին է իրավիճակը, որովհետև բազմաթիվ ներքին հարցեր կան, որոնք, բնական է, չեն հրապարակայանացվում, և նրանք կարող են, հաշվի առնելով դրանք, բանակցային գործընթացն իրականցնել»,- ասաց նա և պարզաբանեց, որ խոսքը գաղտնի որևէ բաների չի վերաբերում, ուղղակի հայ-ռուսական, հայ-ֆրանսիական հարաբերություններ կան, և ի վերջո վարչապետը բազմաթիվ երկրների հետ անընդհատ հեռախոսազրույցներ է ունեցել, միգուցե ինչ-որ ինֆորմացիաներ են ձեռք բերել և այլն:

Դիտարկմանը՝ բուռն քննարկումների ու քննադատութնյունների առարկա էր դարձել ՌԴ նախագահ Վլադիմիր Պուտինի հայտարարությունը, որ լուծումը պետք է բավարարի երկու կողմերին էլ, Բադալյանը նշեց. «Այդ տարբեր շրջանակները, որ քննադատում են Վլադիմիր Պուտինի այդ հայտարարությունը, իրենց ոչինչ չի խանգարում՝ զենք վերցնեն, գնան ու ազատագրեն Կուբաթլուն, Զանգելանը, Հադրութը, Ֆիզուլին և մնացած այլ շրջանները ու նորից վերակնագնեն մինչև սեպտեմբերի 27-ի դրությունը, թող զենքը վերցնեն իրենց ձեռքն ու գնան կռվելու»:

Հարցին էլ՝ «Հաղթելու ենք»-ի նշաձողը ո՞րն է, ի՞նչը կհամարվի հայկական կողմի համար հաղթանակ, նա նշեց, որ չի կարող ասել, դա իշխանությունը պետք է ասի, որովհետև ինքն է այդ տերմինը մտցրել շրջանառության մեջ. միգուցե այն է, որ ադրբեջանական կողմը չկարողանա Ղարաբաղից ինչ-որ տարածքներ ավել վերցնել, միգուցե այն, որ Շուշին չկարողանա գրավել, ինչը արդեն փորձում է անել: «Դա իշխանությունները պետք է որոշեն ու ասեն: Շատ դժվար է ասել, թե ինչը կարող ենք գնահատել որպես հաղթանակ, որ իշխանությունը չգնահատի այն որպես պարտության քարոզ»,- շեշտեց նա:

Ինչ վերբերում է հարցին՝ Արցախի ճանաչումը հնարավոր համարո՞ւմ է թեկուզ համանախագահող որևէ երկրի կողմից, Բադալյանը պատասխանեց՝ ոչ. «Ոչ մի երկրի դա ձեռնտու չէ՝ ո՛չ համանախագահող երկրներին, ո՛չ մյուս երկրներին: Միգուցե եթե այլ ռազմաքաղաքական իրավիճակ լիներ, Հայաստանում ինչ-որ ճանաչման գործընթաց լիներ: Եվրոպական քաղաքական գործիչներն այդքան էլ կողմնակից չեն, որովհետև այնտեղ կա Շոտլանդիայի, Կատալոնիայի և բազմաթիվ այլ տարածքների հարցեր: ԱՄՆ-ին էլ ընդհանրապես ձեռնտու չէ, որովհետև իրենք Թուրքիայի հետ առևտրային հարաբերություններ ունեն և մի փոքր Ղարաբաղի համար, հատկապես այս վարչակազմը հարաբերությունները չի ցանականա լարել, այն էլ նախընտրական փուլում: Ռուսաստանն էլ, չեմ կարծում, գնա անկախության ճանաչման, որովհետև նշանակում է բացահայտ կոնֆլիկտի մեջ մտնել Ադրբեջանի հետ, իսկ դա Ռուսստանի շահերից չի բխում»,- ընդգծեց նա:

Ինչ վերբերում է ռուսական խաղաապահ ուժերի հնարավոր տեղակայմանը, նա նշեց, որ դրա համար Ադրբեջանն ունի իր պայմանները և քանի ռազմի դաշտում պարտություն չի կրել, ինքն այդ պայմաններից չի հրաժարվի: «Իսկ իր պայմանը սկզբում հինգ շրջան, հետո երկու շրջանի հանձնումն է, հետո վերադառնում է Շուշիի շրջան Ադրբեջանի բնակչությունը, դրանից հետո, եթե Ղարաբաղում հայ մնաց, կմտածի խաղաղապահի մասին, բայց չեմ կարծում՝ դրանից հետո Ղարաբաղում հայ կմնա, որովհետև իրենք ամբողջովին կմաքրեն Ղարաբաղը, իսկ եթե մաքրեցին, խաղաղապահ զորքի կարիք չի լինում»,- նշեց Արմեն Բադալյանը: