Քանի որ մենք չունենք իշխանություն, որը կարող է Ալիևի հետ հավասարը հավասարի պես բանակցել ռազմագերիների հարցով, դա անում են անհատ պատգամավորները․ Նաիրա Զոհրաբյանը՝ ԵԽԽՎ քննարկումների մասին

Ցավոք սրտի, պետք է արձանագրենք, որ եվրոպական կառույցներում այսօր արժեքային համակարգի լուրջ ճգնաժամ կա։ Այս մասին Tert.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի լիագումար նիստի քննարկումներին։

«Ընդամենը մեկ բլոգերի՝ Ալեքսեյ Նավալնիի ձերբակալության հարցը կարող է դառնալ համաշխարհային քաղաքական օրակարգի թիվ մեկ հարցը, որի վերաբերյալ ԵՄ-ն հատուկ քննարկում է կազմակերպում, Եվրոպական խորհրդարանը հատուկ քննարկում է կազմակերպում, Մեծ Բրիտանիայի, ԱՄՆ-ի, Կանադայի արտաքին գերատեսչությունները հատուկ հայտարարություններով են հանդես գալիս, իսկ հայկական կողմի առաջարկը՝ հումանիտար ճգնաժամի համատեքստում քննարկել հայ ռազմագերիների վերադարձի հարցը, անտեսվում է եվրոպական կառույցների, և, մասնավորապես, ԵԽ-ի կողմից»,-ասաց նա։

Հարցին՝ իսկ արդյո՞ք կային քայլեր, որոնք հնարավոր էր ձեռնարկել՝ գերիների հարցով ԵԽ-ում հայանպաստ քննարկում կազմակերպելու համար, Զոհրաբյանն արձագանքեց․

«Այսօր Հայաստանում չկա իշխանություն, այն գտնվում է բացարձակ անկարողունակ, որևէ քաղաքական կշիռ չունեցող անձանց ձեռքին, որոնք տարատեսակ էժանագին մանիպուլյացիաներով ընդամենն ամեն օր հաջորդ օրվա համար երկարաձգում են իրենց իշխանությունը։ Հայաստանն այլևս չի վարում որևէ ադեկվատ արտաքին քաղաքականություն, դիվանագիտական աշխատանքը հավասարեցված է 0-ի։ Օրինակ՝ Նիկոլ Փաշինյանը տարիներ շարունակ պայքարում էր, որ դեսպաններ պետք է նշանակվեն բացառապես դիվանագետները, բայց ինքն իր անգլերենի ուսուցչուհուն նշանակելու է դեսպան այնպիսի կարևորագույն երկրում, ինչպիսին ԱՄՆ Է։ Խոսել իշխանության հնարավոր ակնկալվող քայլերի մասին, աբսուրդ է, որովհետև նոյեմբերի 10-ին Հայաստանում իշխանությունն ինքնասպան եղավ»,-ասաց նա։

Պատգամավորն ընդգծեց, որ, այնուամենայնիվ, հայկական պատվիրակության անդամները բարձրաձայնում են հայ ռազմագերիների մասին։ «Քանի որ մենք այսօր չունենք իշխանություն, որը կարող է Ալիևի հետ հավասարը հավասարի նման բանակցել և որպես նախապայման դնել ռազմագերիների վերադարձի հարցը՝ Սյունիքով Ադրբեջանին ճանապարհ տալուց առաջ, դա պետք է անեն անհատ պատգամավորները, ինչը և մենք անում ենք»,-նշեց նա։

Նա ներկայացրեց, որ Եվրոպայի խորհրդի պահպանողականների և ռեֆորմիստների դաշինքի քաղաքական նիստին բավականին լուրջ բանավեճ է տեղի ունեցել իր և ադրբեջանցի պատվիրակ Ասիմ Մոլազադեի միջև, որովհետև վերջինս, Զոհրաբյանի տեղեկացմամբ, ռազմական հանցագործություններ կատարելու մեջ է մեղադրել Հայաստանին՝ ասելով, որ ԵԽ-ն պետք է կանխի, որովհետև հենց հիմա էլ հայկական տարբեր փոքրաթիվ խմբեր շատ պրովոկացիաներ են իրականացնում։

«Ես ասացի, որ եթե իրենք խոսում են ռազմական հանցագործությունների մասին և նկատի ունեն Ադրբեջանին, ապա ես ընդունում եմ, որ իրենք գիտակցում են, որ իրենց երկիրը ռազմական հանցագործ է։ Երբ նրանք նորից խոսում էին, թե ԵԽ-ում հայկական և ադրբեջանական  պատվիրակությունները պետք է  կարողանան նորմալ աշխատել, ես նորից դիմել եմ դահլիճում նստած ադրբեջանցի պատգամավորներին և ասել՝ բռնեք ձեր նախագահ Ալիևի ձեռքը, Ժնևյան կոնվենցիայով Ադրբեջանը պարտավոր է րոպե առաջ վերադարձնել բոլոր ռազմագերիներին, որոնք հենց այս պահին անմարդկային պայմաններում պահվում են Բաքվի բանտերում»,-ասաց պատգամավորը։

Զոհրաբյանը նաև ցուցադրել է գլխատված հայ ռազմագերիների նկարը ու հարցրել, թե կարո՞ղ են նայել այդ նկարին։ Նա նշել է, որ Ադրբեջանում այդ նկարով սոցհարցումներ են անում, թե տեսնողներն ինչ են զգում, իսկ վերջիններս պատասխանում են՝ հրճվանք։