Կու տենդ վարակիչ հիվանդության ախտանշանները

Կու տենդ՝ սուր զոոանթրոպոնոզ, ռիկետսիոզ ինֆեկցիա է, որն ընթանում է տենդով, թոքերի ախտահարումով, մասնավորապես ատիպիկ թոքաբորբի զարգացման երևույթներով:

Կու տենդը բնորոշվում է բարձր վարակելիությամբ, ավելի հաճախ հիվանդանում են՝ գյուղական վայրերի բնակիչները, անասնաֆերմաների, թռչնաբուծական ֆերմաների աշխատողները, սպանդանոցների աշխատակիցները, որսորդները, մսի, մորթու և կաշվի մշակումով զբաղվողները:

Վարակի աղբյուր՝ են հանդիսանում ավելի քան 40 տեսակի տզեր (հիմնականում իքսոդային, գամազային, արգասային և այլն), վարակված վայրի և տնային կենդանիները, թռչունները, կրծողները, որոնք արտազատում են հարուցիչներին հիվանդության ամբողջ ընթացքում:

Փոխանցման ուղիները՝մարդուն վարակը կարող է փոխանցվել տարբեր ճանապարհներով. ասպիրացիոն, ալիմենտար, կոնտակտային, տրանսմիսիվ: Ավելի հաճախ Կու տենդի հարուցիչները ներթափանցում են շնչուղիներ լորձաթաղանթով վարակված փոշին շնչելիս (կենդանիների կաշին և մորթին մշակելիս), վնասված մաշկով (վարակված կենդանիների հետ շփվելիս), վարակված միսը, կաթը, ջուրը օգտագործելիս:

Կլինիկա՝ հիվանդության գաղտնի շրջանը տևում է 3-30 օր (ավելի հաճախ 19-20 օր): Հիվանդությունը զարգանում է հանկարծակի, ջերմության կտրուկ բարձրացումով մինչև 39-400 C, քրտնարտադրությունով, ուժեղ գլխացավով, մկանացավով և հոդացավով, արտահայտված թուլությամբ և անքնությամբ: Կարող է զարգանալ բրադիկարդիա և արտերիալ հիպոթենզիա: Հաճախ նկատվում է երեսի և պարանոցի շրջանում մաշկի հիպերեմիա, կոնյուկտիվիտ և այլն: Ավելի հազվադեպ ռոզեոլոզ կամ պապուլոզ ցանավորում: Հիվանդության սկզբնական փուլը տևում է 7-9 օր, մի քանի օրից ջերմությունը իջնում է, պահպանվում է սուբֆեբրիլ մակարդակների վրա, որից հետո զարգանում է հիվանդության երկրորդ փուլը, ի հայտ են գալիս շնչուղիների ախտահարման երևույթները՝ տրախեիտի, բրոնխիտի և ատիպիկ թոքաբորբի պատկերով:

Կարող են զարգանալ դիստրոֆիկ փոփոխություններ երիկամներում, սրտանոթային, նյարդային համակարգերում և այլն:

Կանխարգելում՝ իրականացվում են հակահամաճարակային, անասնաբուժական և սանիտարահիգիենիկ համալիր միջոցառումներ: Այդ միջոցառումները նախատեսում են արոտավայրերի հակատզային մշակումը, կրծողների ոչնչացումը, կենդանիների անասնաբուժական հսկողությունը, մսի և կաթի անհրաժեշտ ջերմային մշակումը: Վարակի բնական օջախում կարևոր են անձնական հիգիենայի կանոնների պահպանումը և ռիսկի խմբերի պատվաստումները Կու տենդի դեմ:

Աղբյուրը՝ NCDC, Armenia