«Սատուրնիզմ». կապարային թունավորման վտանգավոր ազդեցությունները

22:25 • 17.05.16

Կապարային թունավորումը անվանում են նաև «Սատուրնիզմ»։ Տարբերում են սուր և քրոնիկ թունավորումներ: Թունավորման սուր ձևը առաջանում է այն դեպքերում, երբ կապարի մեծ քանակներ են անցնում օրգանիզմ աղեստամոքսային կամ շնչական համակարգով:

Ավելի հաճախ արձանագրվում են քրոնիկ թունավորումներ: Այս դեպքում, օրգանիզմ անցած կապարի փոքր քանակները կուտակվում են օրգանիզմում և որոշակի սահմանային մեծության հասնելով՝ ի հայտ են գալիս թունավորման նշաններ:

Կապարի վտանգավոր ազդեցությունն արտահայտվում է հատկապես 1-5 տարեկան հասակում: Մասնավորապես, կապարն ազդում է երեխաների մտավոր զարգացման վրա:

Երեխաների վրա կապարի վտանգավոր ազդեցությունը դրսևորվում է սկսած ներարգանդային շրջանից: Հայտնի է, որ հղի կնոջ արյան մեջ կապարի նույնիսկ ցածր չափաբաժիններն ընդունակ են վնասել ապագա երեխայի ոսկրերը և այլ օրգանները: Ներկայումս պարզվել է, որ կապարը փոփոխության է ենթարկում ԴՆԹ-ն և այդ փոփոխությունները փոխանցվում են սերնդից սերունդ:

Օրգանիզմի վրա կապարի վնասակար/թունավոր ազդեցությունից խուսափելու համար անհրաժեշտ է կենցաղում և արտադրական պայմաններում պահպանել սանիտարահիգիենիկ կանոները՝ աղեստամոքսային ճանապարհով կապարի օրգանիզմ ներթափանցումը բացառելու համար կապարով աղտոտված ձեռքերը լվանալ ուտելուց առաջ: Ջրամատակարարման համակարգում չի կարելի օգտագործել կապար պարունակող խողովակներ և մասեր: Հրաժարվել կապարային ներկերից և կոսմետիկայի միջոցներց:

Արտադրական պայմաններում անհրաժեշտ է սահմանել և պահպանել օդում կապարի սահմանային թույլատրելի խտությունները, իրականացնել կապարի հետ աշխատանքների փակ տեխնոլոգիական պրոցեսներ, աշխատողները պետք է օգտագործեն պեկտինային նյութեր (ծիրանի, դեղձի հյութեր)՝ օրգանիզմ անցած կապարը դուրս բերելու համար:

Աղբյուր՝ NCDC, Armenia ֆեյսբուքյան էջ