Ռոզենբախի Էրիզպելոիդ. ախտանշաններն ու կանխարգելումը

Էրիզպելոիդը սուր վարակիչ հիվանդություն է, որը բնորոշվում է հիմնականում մաշկի և հոդերի ախտահարմամբ։ Վարակը զարգանում է հիվանդ կենդանիներից(հիմնականում խոզերից) վարակվելու հետևանքով:

Վարակի աղբյուր են հանդիսանում կենդանիների շատ տեսակներ՝ խոզեր, գառներ, խոշոր եղջերավոր կենդանիներ, հավեր, բադեր, կրծողներ, խեցգետիններ և այլն: Ավելի հաճախ վարակի աղբյուր են հանդիսանում խոզերը: Հիվանդությունն ավելի հաճախ արձանագրվում է մսավաճառների, խոհարարների, սպանդանոցների աշխատակիցների, անասնապահների, ձկնորսների, որսորդների մոտ: Մարդը վարակվում է վարակված կենդանիների և վարակված մսի հետ շփման և օգտագործման հետևանքով: Մարդուց մարդ վարակը չի փոխանցվում:

Պաթոգենեզ՝ վարակը ներթափանցում է մարդու օրգանիզմ վնասված մաշկով, որտեղ և առաջանում են բնորոշ բորբոքային փոփոխությունները, ինչի մեջ կարող են ընդգրկվել նաև հոդերը: Որոշ հիվանդների մոտ կարող է տեղի ունենալ վարակի տարածում լիմֆոգեն և հեմատոգեն ճանապարհով, ինչը կարող է հանգեցնել երկրորդային օջախների առաջացմանը՝ էնդոկարդում, միոկարդում, կենտրոնական նյարդային համակարգում, թոքերում:

Կլինիկական նկարագիր՝ գաղտնի շրջանը տևում է 1-7 օր ավելի հաճախ 2-3 օր:

Տարբերակում են էրիզիպելոիդի մաշկային, հոդային, սեպտիկ և անգինոզ ձևերը:

Մաշկային ձև՝ հանդիպում է ավելի հաճախ, այն բնորոշվում է վարակի ներթափանցման հատվածում մաշկի այտուցվածությամբ, էրիթեմայով և քորով: Հիվանդության հետագա օրերին, այտուցն ավելի տարածուն է դառնում, ախտահարվում են ավշային հանգույցները: Հիվանդության տևողությունը 10-12 օր է:

Հոդային ձև՝ վերոնշված ախտանշաններին գումարվում է հոդերի բորբոքումը , ինչը բնորոշվում է ցավով, այտուցվածությամբ հոդերի շրջանում և կարող է բերել հոդերի ձևափոխմանը դեֆորմացման:

Սեպտիկ ձևը՝ հանդիպում է հազվադեպ, բնորոշվում է սուր զարգացումով, մարմնի ջերմաստիճանի բարձրացումով մինչև 40⁰C, արտահայտված ինտոքսիկացիայով, գիտակցության մթագնությամբ: Նկատվում է լյարդի և փայծաղի մեծացում: Կարող է զարգանալ էնդոկարդիտ, միոկարդիտ, թոքաբորբ, աչքերի բորբոքում և այլն:

Անգինոզ ձևը՝ զարգանում է վարակված սննդամթերքի օգտագործման հետևանքով: Զարգանում է սուր, ջերմության բարձրացումով, ցավով կոկորդում, մաշկի վրա կարող է առաջանալ էրիթեմատոզ ցան:

Կանխարգելում՝ վարակի աղբյուրի նկատմամբ ձեռնարկվող միջոցառումները պետք է իրականացնել անասնաբուժական ծառայության հետ համատեղ: Անհրաժեշտ է համաճարակաբանական հսկողություն սահմանել սպանդանոցների, սառցակոմբինատների, անասնագոմերի նկատմամբ: Ռիսկի խմբերում մսավաճառներ, սպանդանոցների աշխատակիցներ, խոհարարներ, անասնապահներ և այլն անհրաժեշտ է անձնական պաշտպանիչ միջոցների օգտագործում և անձնական հիգիենայի կանոնների պահպանում:

Աղբյուր՝ NCDC, Armenia ֆեյսբուքյան էջ