6 հիվանդություն, որոնց առաջացման պատճառ կարող են դառնալ ընտանի կենդանիները

13:58 • 25.06.16

Ընտանի կենդանիների տերերն ավելի առողջ են, քանի որ կենդանիները իջեցնում են նրանց արյան ճնշումը, տրամադրում են զբոսանքների և ընկերակցում միայնակ օրերին: Սակայն նույն այդ կենդանիները կարող են նաև «նվիրել» մեզ տհաճ հիվանդություններ:

Ընտանի կենդանիների հետ անմիջական շփման հետևանքով կարելի է առնվազն 39 հիվանդություն ձեռք բերել, կենդանիներին խայթելուց հետո մարդուն խայթած միջատներից՝ 48, իսկ ընտանի կենդանիների արտաթորանքից վարակված ջրից ու սննդից՝ 42:

Ձեզ ենք ներկայացնում 6 հիվանդություն, որոնց առաջացման պատճառ կարող են հանդիսանալ ընտանի կենդանիները:

1. Կատվի ճանկռածի հիվանդություն

Հաճախ երեխաները կատուների հետ շփվելիս վնասվում են, երբ կենդանին ճանկռում է: Սա իհարկե սովորական երևույթ է, սակայն այն կարող է տարիներ հետո բարդություններ առաջացնել: Վնասվածքի հատվածում լիմֆատիկ հանգույցները կարող են այտուցվել և մեծանալ, ինչը տեղի է ունենում բակտերիաների ներթափանցման արդյունքում: Վարակումը կարող է ապաքինվել առանց միջամտության, սակայն ճիշտ կլինի ապահովության համար օգտագործել հակաբակտերիալ քսուք: Հարկ է հիշել, որ կանխարգելումը լավագույն բուժումն է:

2. Մարինում միկոբակտերիա

Սա ազատ ապրող բակտերիաների տեսակ է, որը կարող է վարակել տանը ակվարիում ունեցող մարդկանց՝ դրանց մաքրման ժամանակ: Բակտերիան կարող է ներթափանցել մաշկի մեջ մանր վնասվածքների միջոցով և առաջացնել բորբոքումներ 1-2,5 սմ կարմիր խոցերի և հանգույցների տեսքով: Հիմնականում այդ դանդաղ զարգացող վարակի դեպում օգնում են հակաբիոտիկները, սակայն երբեմն կարող է նաև վիրաբույժի միջամտության կարիք լինել: Ապահովության համար ակվարիումի մաքրման ժամանակ անհրաժեշտ է օգտագործել անջրանցիկ ձեռնոցներ, իսկ գործն ավարտելուց հետո լվանալ ձեռքերը մինչև արմունկները:

3. Մազածածկույթի սնկախտ

Այս հիվանդությունը պայմանավորված է մաշկի սնկային վարակով: Վնասակար սնկերը սնվում են կրեատինով, որը գտնվում է մաշկի վերին շերտերում, մազերում և եղունգներում: Հիվանդ կենդանու հետ անմիջական շփման դեպքում այս հիվանդությամբ կարող են վարակվել ինչպես մեծահասակները, այնպես էլ երեխաները: Բուժումը կարելի է սկսել առանց բժշկի նշանակման համապատասխան քսուքների օգնությամբ, սակայն վարակի կրկնվելու դեպքում հնարավոր է լինի բժիշկի նշանակած ավելի ուժեղ ազդեցություն ունեցող միջոցի անհրաժեշտություն:

4. Սալմոնելլա

Սալմոնելլա բակտերիան հաճախ հանդիպում է երկկենցաղների և սողունների մոտ (գորտերի, սալամանդրների, կրիաների, մողեսների, օձերի): Այս կենդանիներին անհրաժեշտ է պահել համապատասխան ակվարիումներում և թույլ չտալ շրջել տանը՝ հատկապես խոհանոցում: Այս կենդանիների հետ շփվելուց հետո անհրաժեշտ է լվանալ ձեռքերը: Ոչ մի դեպքում չի կարելի լվանալ սառնարյունների ակվարիումները տան սանհանգույցում: Աշխատեք զերծ պահել երեխաներին, հատկապես մինչև մեկ տարեկան երեխաներին, և թույլ իմունային համակարգ ունեցող անձանց այդ կենդանիների հետ շփումից:

5. Թութակի տենդ

Այս վարակիչ հիվանդության պատճառ են դառնում բակտերիաները, որոնք փոխանցվում են արա և կորելլա թութակներից: Չնայաճ, որ սա բավական հազվադեպ հիվանդություն է (ԱՄՆ-ում տարեկան գրացվում է վարակման միայն 50 դեպք), մասնագետները վստահ են, որ այս հիվանդության շատ դեպքեր էլ պարզապես սխալ են ախտորոշվում, ուստի դեպքերն ել զգալիորեն ավելի շատ են: Թութակի տենդի ախտանշաններն են ջերմությունն ու դողը, մկանային ցավերը և չոր հազը: Բացի այդ տենդը կարող է նաև ի հայտ գալ թոքաբորբի տեսքով և սպառնալ կյանքին: Պատշաճ բուժման բացակայության դեպում թութակի տենդը կարող է հանգեցնել նյարդերի, սրտի և լյարդի խանգարումների: Բուժումն իրականացվում է ուժեղ հակաբիոտիկներով: Թութակ ձեռք բերելիս անհրաժեշտ է համոզվել, որ կենդանին անցել է անասնաբուժական զննում և լիովին առողջ է: Բացի այդ, թութակի հետ յուրաքանչյուր շփումից կամ նրա վանդակը մաքրելուց հետո անհրաժեշտ է լվանալ ձեռքերը:

6. Տոքսոպլազմոզ

Եթե ձեր կատուն ունի դրսում զբոսնելու թույլատվություն, ապա մեծ է վտանգը, որ նա կարող է ունենալ տոքսոպլազմա կոչվող մակաբույծ: Կատուների մեծամասնությունը կարողանում են հաղթահարել վարակը, մինչ վերջինիս վարակիչ փուլ մտնելը: Սակայն երբեմն մակաբույծները ներթափանցում են կենդանու արտաթորանք, դրանով իսկ վտանգի գոտու վերածելով կատվի արտաթորանքի համար նախատեսված ամանը, այգին և խաղահրապարակները: Տոքսոպլազմոզի ախտանշանները նման են երկարատև գրիպի, սակայն այն կարող է մահացու լինել թույլ իմունային համակարգ ունեցողների համար։ Առավել շատ վտանգված են հղիները, քանի որ մակաբույծը կարող է հասնել պտղին, ինչի հետևանքով մեծ է երեխայի մահվան կամ հաշմանդամության հավանականությունը։

Նյութի աղբյուրը՝ zdorovie.com