Որո՞նք են լյարդի հիվանդությունների ախտանշաններն ու դրանց կանխարգելման միջոցները

Լյարդի խանգարումները կարող են բազմաթիվ բարդությունների պատճառ դառնալ: Med2.ru կայքը ներկայացրել է, թե որոնք են լյարդի հիվանդությունների առաջին դրսևորումները և ինչպես դրանք կանխարգելել:

Ըստ բ.գ.թ պրոֆեսոր Ալեքսեյ Բույեվերովի` լյարդի հիվանդությունների վաղ ախտանշանները չեն կրում որևէ սպեցիֆիկ բնույթ: Դրանց թվում կարող են լինել թուլությունը, սրտխառնոցը, ախորժակի կորուստը, աջ կողոսկրերի հատվածում ցավը և տհաճ զգացողությունները, քաշի կորուստը և ընդհանուր ինքնազգացողության վատացումը: Հիվանդությունների ուշ փուլերի ախտանշաններն ավելի լուրջ բնույթ են կրում (դեղնախտ, այտուցվածություն, արյունահոսություն) և հաճախ հանգեցնում են լյարդի հյուսվածքների անդառնալի փոփոխությունների: Մաշկի գույնի փոփոխությունները կարող են լինել լյարդի հիվանդության առաջին ախտանշաններից:

Անհրաժեշտ է հիշել, որ լյարդը մեր օրգանիզմի «բիոքիմիական լաբորատորիան» է: Այնտեղ ամեն վայրկյան տեղի է ունենում մոտ 5000 բիոքիմիական ռեակցիա` ուղղված ոչ միայն իր սեփական կառուցվածքի ու գործառույթների, այլև ամբողջ օրգանիզմի կենսական նշանակություն ունեցող օրգանների գործառույթների վերականգնմանը: Վնասակար գործոնները հանգեցնում են լյարդի բջիջների կառուցվածքի և գործառույթների խանգարմանը` բացասական ազդեցություն ունենալով բիոքիմիական ռեակցիաների ընթացքի վրա, վնասելով հեպատոցիտները և իջեցնելով ֆերմենտների և կոֆերմենտների (գլուտաթիոն, ադենոզինեռֆոսֆատ էներգետիկ մոլեկուլներ, ադեմեթիոնին, ֆերմենտներ, վիտամիններ) մակարդակը: Թունավոր նյութերի կուտակումների արդյունքում հիանդությունը սրվում է` հանգեցնելով լյարդի ցիռոզի:

Գոյություն ունեն լյարդի հիվանդությունների բուժման տարատեսակ եղանակներ: Բուժման նպատակն է պարզել և վերացնել հիվանդության առաջացման հետևանքները և շտկել ախտաֆիզիոլոգիական հիմնական մեխանիզմները, որոնք հաճախ նույնն են լինում լյարդի բազմաթիվ հիվանդությունների` այդ թվում նաև բորբոքումների և ֆիբրոզի դեպքում:

Հեպատոպրոտեկտորները հնարավոր թերապիաներից են: Դրանք կարևոր դեր են խաղում լյարդի հիվանդության տարբեր դրսևորումների բուժման մեջ և ուղղված են պաշտպանողական մեխանիզմների ձևավորմանն ու հիվանդության առաջընթացի կասեցմանը: Այդ միջոցներն օգտագործվում են որպես լրացում էթիոտրոպ թերապիային կամ որպես միակ դեղամիջոց` հիվանդության պատճառների անհայտ լինելու և էթիոտրոպ բուժման բացակայության դեպքում:

Գոյություն ունեն տարբեր ազդեցություններով հեպատոպրոտեկտորներ (բջջաթաղանթի վերականգնում, լեղազատման կարգավորում, բիոքիմիական ռեակցիաներին նպաստելու համար առանցքային մոլեկուլների փոխարինում, լյարդի գործառույթների և կառուցվածքի վերականգնում): Լյարդի կարևորագույն մոլեկուլների (ֆերմենտներ և կոֆերմենտներ) փոխարինման շնորհիվ` կոմպլեքս թերապիայի մեջ մտնող հեպատոպրոտեկտորները մասնակցում են բիոքիմիական ռեակցիաների վերականգնման և լյարդի շատ հիվանդություններին հատուկ ախտաֆիզիոլոգիական մեխանիզմների շտկման գործընթացներին` դրանով իսկ նպաստելով լյարդի բջիջների կառուցվածքի բարելավմանն ու գործառույթների վերականգնմանը: