Ինչպե՞ս տարբերել ալերգիկ ռինիտը սովորական մրսածությունից

Քթից հոսող արտադրությունն անհանգստացնում է ոչ միայն մրսածության, այլ նաև ալերգիկ ռեակցիաների ժամանակ և ոչ միշտ է հնարավոր հասկանալ, ինչն է այդ արտադրության պատճառը: Ինչպես նշում է estet-portal.com կայքը, պատճառները կարող են տարբեր լինել, հետևաբար՝ բուժումը նույնպես: Ձեզ ենք ներկայացնում մի համեմատական բնութագիր, որը թույլ կտա տարբերել ալերգիկ ռինիտը (քթաբորբ) սովորականից:

Ռինիտի հիմնական ախտանշանները

Քթի արտադրությունը բավական հաճախ հանդիպող երևույթ է: Ցանկացած տեսակի ռինիտ բնութագրվում է հետևյալ կերպ.

·         քթի փակվածություն,

·         փռշտոց,

·         քոր քթի խոռոչում:

Սակայն սովորոկան ռինիտի դեպքում սրան ավելանում են նաև այլ ախտանշաններ: Սկզբում քթի խոռոչում նկատվում է չորություն և այրոց, այնուհետև սկսվում է քթից արտադրության հոսք: Հաճախ սովորական ռինիտը պայմանավորված է վարակներով, ուստի կարող է լինել նաև բարձր ջերմություն: Բացի այդ, շատ հնարավոր է, որ նկատվի քթի փակվածություն, գլխացավեր, ախորժակի կորուստ, օրգանիզմի ընդհանուր թուլություն, իսկ 4-5րդ օրերին քթանցքերում կարող է առաջանալ թարախային արտադրություն:

Ի՞նչը կարող է առաջացնել ալերգիկ ռինիտ

Ալերգիկ ռինիտը բավական տարածված խնդիր է, որով տառապում է բնակչության 15%-ը՝ այդ թվում նաև երեխաները: Այն կարող է կրել ոչ միայն սեզոնային բնույթ, այլև նկատվել ամբողջ տարի: Դրա պատճառ կարող են հանդիսանալ.

·         կենդանական բուրդը,

·         կենցաղային քիմիական նյութերը,

·         փոշին,

·         կահույքն ու գորգերը,

·         կոսմետիկ միջոցները և այլն:

Բացի այդ, ալերգիկ ռինիտի պատճառ կարող են հանդիսանալ նաև ծաղիկների փոշին ու բորբոսասնկերը:

Ալերգիաների դրսևորումները կարող են տարբեր լինել: Դրանք կարող են արտահայտվել մաշկի ցանով, էկզեմայով, չոր հազով, կոկորդի ցավով և չորությամբ, հոտառության և համի զգացողության կորստով և այլն:

Ինչպե՞ս տարբերել ալերգիկ ռինիտը սովորականից

Ալերգիկ ռինիտը սովորականից տարբերել այդքան էլ հեշտ չի, սակայն կարելի է ուշադրություն դարձնել հետևյալ ախտանշաններին.

1.      Ալերգիկ ռինիտը սովորականից տարբերելու ամենահեշտ միջոցը ջերմությունը չափելն է: Եթե ռինիտի հետ մեկտեղ նկատվում է նաև բարձր ջերմություն, ապա այն պայմանավորված է վարակներով կամ վիրուսներով, այլ ոչ թե ալերգիկ ռեակցիայով:

2.      Բացի այդ, մրսածության հետևանքով առաջացած ռինիտը դրսևորվում է ընդհանուր թուլությամբ և ախորժակի կորուստով:

3.      Ալերգիկ ռինիտը կարող է հանարծակի սկսվել, իսկ սովորականը 1-2 օրվա ընթացքում՝ աստիճանաբար խորանալով:

4.      Հաճախ ալերգիկ ռինիտի դեպքում նկատվում է քոր քթի խոռոչում:

5.      Ալերգիկ ռինիտը ուղեկցվում է երկար փռշտոցներով` 10 և ավել անգամ, այն դեպքում, որ սովորական մրսածության ժամանակ մարդն այդքան չի փռշտում (2-3 անգամ):

6.      Սովորական ռինիտի դեպքում արտադրությունը մի քանի օրից դառնում է ավելի խիտ և մուգ գույնի, իսկ ալերգիկի դեպքում այն միշտ մնում է թափանցիկ:

7.      Բացի այդ, ալերգիան կարող է ուղեկցվել աչքերի կարմրությամբ, արտասուքի հոսքով և աչքերի տակ մուգ շրջաններով: Սովորական ռինիտի դեպքում նման ախտանխաններ չեն լինում:

8.      Սովորական ռինիտը, որպես կանոն, անցնում է հակավիրուսային և պալիատիվ (սիմպտոմատիկ) բուժումից հետո, այն դեպքում, երբ ալերգիկ ռեակցիաներն անցնում են միայն դրանց առաջացման պատճառներից խուսափելու կամ համապատասխան դեղորայք ընդունելու դեպքում:

9.      Ալերգիան հաճախ դրսևորվում է ոչ միայն քթի արտադրությամբ, այլ նաև մաշկային խնդիրներով՝ դերմատիտով, կարմրությամբ ու քորով:

10.  Բացի այդ ալերգիկ ռինիտը կարող է ունենալ ժառանգական բնույթ, ուստի, եթե ծնողները ունեն նման հակում, ապա երեխաները կարող են դա ժառանգել:

Սակայն պետք է հիշել, որ ախտորոշումն ու բուժումը ինքնուրույն իրականացնելը խիստ անցանկալի է: Անկախ ռինիտի տեսակից՝ անհրաժեշտ է դիմել բժշկի, քանի որ միայն նա կարող է պարզել դրա առաջացման պատճառն ու պատշաճ բուժում նշանակել: