Ինչպե՞ս բուժել հիպերակտիվ միզապարկը

Սովորաբար միզապարկը դատարկելու կարիք լինում է միայն այն ժամանակ, երբ այն լիքն է, ընդ որում՝ այդ մասին մեզ ազդանշաններ է ուղարկում գլխուղեղը: Այդ ազդանշանների ինտենսիվությունը կախված է հավաքված մեզի քանակից, սակայն լինում են դեպքեր, երբ դրանք ստիպում են չափից դուրս հաճախ գնալ զուգարան, նույնիսկ եթե միզապարկը գրեթե դադարկ է:

Այս խնդիրն այսօր տանջում է 40 տարեկանից բարձր կանանց 17%-ին: Չնայած, որ այն շատ տարածված է, բժշկի դիմում է հիվանդների միայն 2%-ը. մնացածը փորձում են բուժվել իրենց ուժերով, ինչը ոչ միշտ է հաջողվում: Aif.ru-ն զրուցել է բ.գ.թ. ուրոլոգ Իվան Դիդենկոյի հետ՝ պարզելու համար, թե ինչպե՞ս ազատվել այս անցանկալի խնդրից:

Հնարավոր չէ զսպել

Հիպերակտիվ միզապարկի հիմնական ախտանշաններն են.

o    օրվա ընթացքում առնվազն 8, իսկ գիշերը՝ 2 անգամ միզելու ցանկություն

o    միզելու ուժգին և հանկարծակի ցանկությունները, որոնց պատճառով հաճախ նույնիսկ հնարավոր չի լինում հասնել զուգարան,

o    զգացողությունը, որ միզապարկը միշտ լիքն է, նույնիսկ միզելուց հետո,

o    ծանր ֆիզիկական աշխատանքի, ծիծաղի կամ փռշտոցի ժամանակ մեզը հաճախ չզսպելը:

Ո՞րն է պատճառը

Խանգարման պատճառ կարող են հանդիսանալ նյարդաբանական հիվանդությունները, նեյրոդեգեներատիվ հիվանդությունները (օրինակ՝ Ալցհեյմերի հիվանդությունը կամ Պարկինսոնի հիվանդությունը) կամ դրա առաջացմանը նպաստող այլ հիվանդությունները (շաքարային դիաբետ, գլխուղեղի ուռուցքներ, երիկամների հիվանդություններ, ցիստիտ, նևրոզ և այլն): Հաճախ այս խնդիրը կարող է պայմանավորված լինել հորմոնային կամ տարքային խնդիրներով, մասնավորապես՝ դաշտանադադարով, ինչպես նաև կոֆեինի, գազավորված ըմպելիքների, ճարպոտ ու աղի սննդի, ալկոհոլի կամ միզամուղ դեղամիջոցների չարաշահումով:

Ճիշտ ախտորոշման համար ուրոլոգը նախ հիվանդին նշանակում է միզելու հաճախականության օրագիր պահել, որտեղ, միզելու ժամերից բացի, պետք է նաև գրանցել՝ ի՞նչ է հիվանդը կերել, խմել կամ ընդունել օրվա ընթացքում: Միայն այսքանից հետո կարելի է անցնել անալիզներին ու հետազոտություններին, որոնք կարող են բավական շատ լինել:

Ի դեպ՝ գոյություն ունի ժողովրդական բժշկության մի միջոց, որը շատ հեշտ է պատրաստել: Անհրաժեշտ է 1 ճաշի գդալ հումքը (եզան լեզվի տերևներ կամ սամիթի սերմեր) 2 ժամ թրմել 200 մլ եռման ջրում, քամել և խմել ամեն օր: Եզան լեզվի տերևներ օգտագործելու դեպքում անհրաժեշտ է խմել օրը 3 ամգամ ուտելուց առաջ մեկ ճաշի գդալ, իսկ սամիթի սերմերի դեպքում՝ խմել միանգամից և ամբողջությամբ:

Գնալ զուգարան միայն հրամանով

Բացի բուն հիվանդության բուժումից, հիվանդին սովորաբար նշանակում են նաև հատուկ բուժում հակախոլիներգիկ միջոցներով (антихолинергические препараты), սակայն, առանց հատուկ վարքային թերապիայի, բոլոր ջանքերն ապարդյուն կլինեն: Գոյություն ունի այս խնդիրը լուծող հատուկ բուժիչ ֆիզկուլտուրա, որը մարզում է կոնքի ստորին հատվածի և միզապարկի պատերի մկանները: Ամենաարդյունավետ վարժություններից մեկը, որն անհրաժեշտ է կատարել օրվա ընթացքում մի քանի անգամ, պարբերաբար կոնքի մկանների լարումն ու թուլացումն է: Այդ մկանները զգալու համար, անհրաժեշտ է միզելու ընթացքում մի քանի վայրկյան դադարեցնել այդ գործընթացը, այնուհետև կրկին շարունակել: Այս մարզումները շատ արդյունավետ են կենսաբանական հակադարձ կապի սկզբունքով համակարգչային սարքավորման օգնությամբ անելու դեպքում: Բուժման կուրսը բաղկացած է 30 րոպե տևողությամբ 15-20 սեանսից:

Հիվանդներին նաև սովորեցնում են զուգարան գնալ ժամ առ ժամ. սկզբում ամեն ժամ, իսկ հետո՝ աստիճանաբար` դադարները հասցնելով մինչև 3 ժամի, նույնիսկ եթե ցանկությունն ավելի շուտ է ի հայտ գալիս: Բացի այդ, անհրաժեշտ է հրաժարվել վատ սովորություններից, ինչպիսիք են՝ ապահովության համար տնից դուրս գալիս կամ որևէ բան խմելուց առաջ միզելը: Այս ամենի արդյունքում հնարավոր է դառնում աստիճանաբար վերականգնել այս կարևոր ֆիզիոլոգիական գործընթացը վերահսկելու կարողությունը: