Ճերմակ կյանք. ամեն ինչ ալբինոսների մասին

Ալբինոսներն իրենց գունատ մաշկով, սպիտակ մազերով ու թարթիչներով, բաց երկնագույն աչքերով ու ցայտուն կարմրությամբ աչքի են ընկնում առաջին իսկ հայացքից:

Սա բնածին հիվանդություն է, որը պայմանավորված է մելանինի՝ մաշկի, մազերի ու թարթիչների գույնի համար պատասխանատու պիգմենտի պակասով կամ բացակայությամբ: Նրա պակասի դեպքում մաշկը ենթարկվում է արևի ուժեղ ազդեցության, ինչը հանգեցնում է այրվածքների: Սա է պատճառը, որ ալբինոսներին խորհուրդ է տրվում հնարավորինս քիչ գտնվել արևի ճառագայթների ներքո:

Վիճակագրության համաձայն՝ այս հիվանդությամբ տառապում է 100000-ից 5-ը: Սա գենետիկ ու անբուժելի հիվանդություն է, որը բաժանվում է 10 խմբի: Դրանցից ամենատարածվածները 1-ին ու 2-րդ խմբերն են:

1-ին խմբի ալբինոսները տարբերվում են սպիտակ մազերով ու մաշկով: Մեծ է նաև մաշկի քաղցկեղի առաջացման հավանականությունը: Բացի այդ, նրանց մոտ բիբի պիգմենտի բացակայության, եղջերաթաղանթի ու տեսապակու ձևի խանգարման հետևանքով նկատվում է նաև վատ տեսողություն, ուստի նրանք հաճախ են կկոցում աչքերը և խուսափում են արևի լույսից:

2-րդ խմբի ալբինոսների մաշկը դեղնավուն է, սակայն ծերանալու հետ մեկտեղ այն գունատվում է: Նրանց իմունիտետը թույլ է, և նրանք չեն հանդուրժում արևի լույսը, ինչը մեծ անհանգստություններ է առաջացնում:

Բացի վատ տեսողությունից, նրանք նաև ունենում են հոտառության խանգարումներ: Բացի այդ, նրանք լինում են ցածրահասակ և ունենում են խնդիրներ կապված արյան մակարդելիության հետ: Հիվանդության ծանր դեպքերում կարող են նաև նկատվել շլություն, կարճատեսություն և նույնիսկ կուրություն:

Ցավոք, նման մարդիկ իրենց արտաքինի պատճառով դժվար են ադապտացվում հասարակության մեջ: Դեռ վաղուց մարդիկ կարծում էին, որ ալբինոսներն օժտված են գերբնական ուժով, կարողանում են կարդալ մարդկանց մտքերը և խմում են արյուն: Որոշ ժամանակ նրանց նույնիսկ ձգտում էին ոչնչացնել: Սակայն ալբինոսները հասարակ մարդիկ են հասարակ մարդկային խնդիրներով: Իրենց յուրահատուկ արտաքինի շնորհիվ՝ նրանց հաճախ հրավիրում են ամսագրերի շապիկների համար մոդել աշխատելու: Ալբինոսները շատ բարի մարդիկ են, չնայած երբեմն իրենց զգում են լքված ու միայնակ: Հուսանք, որ հասարակությունը կսկսի ընդունել նրանց այնպիսին, ինչպիսին որ կան՝ դատելով միայն մարդկային արժեքներով, այլ ոչ թե արտաքին տեսքով:

Նյութի աղբյուրը՝ secreti.net