Ի՞նչ վտանգներ են սպառնում ամռանը ասթմայով հիվանդներին

Մարդիկ սովորաբար հետևում են իրենց ընդունած սննդին ու հեղուկներին, սակայն չեն հետևում իրենց շնչած «օդին»: Ստորև ներկայացնում ենք հիմնական «ամառային» գրգռիչները, որոնք վնասում են թոքերը և դրանցից պաշտպանվելու միջոցները:

Հալոգենիզացված քացախաթթու

5-բալլանի սանդղակի համաձայն՝ այս նյութի վտանգի աստիճանը գնահատվում է 1 բալլ: Այս նյութն առաջանում է լողավազանների վարակազերծման համար օգտագործվող քլորի և շրջակա միջավայրն ախտոտող նյութերի ռեակցիայի արդյունքում: Մասնագետները պնդում են, որ այս քիմիական միացությունը բարձրացնում է քաղցկեղի առաջացման վտանգը: Առաջին անգամ այս թթուն հայտնաբերել են իսպանացի գիտնականները լողավազանները սպասարկող մարդկանց օրգանիզմում (չնայած, որ այդ մարդիկ երբեք լողավազանի ջրի մեջ չեն եղել): Միակ դրական կողմն այն է, որ այս վտանգավոր թթուն բավական արագ է դուրս բերվում մարդկանց օրգանիզմից:

Օրգանիզմը պաշտպանելու համար անհրաժեշտ է չչարաշահել ախտահանիչ միջոցների օգտագործումը: Ամեն ինչ պետք է լինի առանց ավելորդության: Լողավազան այցելելուց առաջ անհրաժեշտ է լոգանք ընդունել՝ մաշկի վրայից աղտոտիչները մաքրելու համար: Բացի այդ, լողալիս ոչ մի դեպքում չի կարելի բացել բերանը՝ պատահաբար ջուր կուլ չտալու համար:

Ծաղկափոշի

5-բալլանի սանդղակի համաձայն՝ այս նյութի վտանգի աստիճանը գնահատվում է 3 բալլ: Համաձայն Ասթմայի և ալերգիայի ամերիկյան ֆոնդի տվյալների՝ յուրաքանչյուր երրորդը սեզոնային ալերգիաների ժամանակ ունենում է մի շարք ախտանշաններ, ինչպիսիք են՝ այտուցվածությունը, արցունքահոսությունը կամ կոկորդի գրգռվածությունը:

Այդ ախտանշաններից խուսափելու համար անհրաժեշտ է իմանալ, որ օդում ծաղկափոշու կուտակումների ամենաակտիվ շրջանը առավոտյան 5:00-ից մինչև կեսօր ընկած ժամանակահատվածն է: Ծաղկափոշուց ալերգիա ունենալու դեպքում անհրաժեշտ է փողոց դուրս գալ կեսօրից կամ անձրևից հետո: Բացի այդ, կարելի է նաև ընդունել ալերգիայի դեմ երկարատև ազդեցության դեղամիջոցներ:

Բորբոսասունկ

5-բալլանի սանդղակի համաձայն՝ այս գրգռիչի վտանգի աստիճանը գնահատվում է 3 բալլ: Ամառվա կեսից թափված տերևների և փտող կոճղերի վրա ի հայտ են գալիս բորբոսի սպորներ: Լուիզիանայի Թուլեյնի համալսարանի գիտնականների հավաստմամբ՝ յուրաքանչյուր 10-րդը բորբոսից ալերգիա ունի: Թափված տերևները մաքրելուց հետո առաջացած հազը, քթից արտադրությունն ու աչքերի քորը ալերգիայի հիմնական ախտանշաններն են:

Պաշտպանվելու համար անհրաժեշտ է ամռանն ու աշնանը հնարավորինս խուսափել անձրևից հետո քամոտ եղանակին փողոց դուրս գալուց: Եթե հնարավոր չի դրանից խուսափել կամ անհրաժեշտ է այգում աշխատել, ապա հարկ է դիմակով կամ թաշկինակով փակել բերանն ու քիթը:

Օզոն

5-բալլանի սանդղակի համաձայն՝ այս նյութի վտանգի աստիճանը գնահատվում է 5 բալլ:

Օզոնի մոլեկուլը բաղկացած է թթվածնի 3 ատոմից: Բացի այդ, օզոնը ախտոտիչ է, օդի տոքսիկ խառնուրդ, որը կարող է դառնալ բորբոքային գործընթացի պատճառ և նվազեցնել թոքերի ծավալը: Թոքաբանների ամերիկյան ասոցիացիայի տրամադրած տվյալների համաձայն՝ ԱՄՆ-ի բնակիչներից 10-ից 4-ը բնակվում են օզոնով հարուստ անբարենպաստ տարածքում: Ամենավտանգավոր վայրերը արևոտ ու շոգ օրերին մեգապոլիսներն են:

Ալերգիկ ռեակցիաները կանխելու համար՝ մինչ տնից դուրս գալն անհրաժեշտ է ստուգել եղանակի տեսությունը, որտեղ լինում է նաև օզոնի կենտրոնացման մասին տեղեկատվություն: Եթե մթնոլորտում օզոնի մակարդակը չափազանց բարձր է, ապա խորհուրդ չի տրվում բացօդյա տարածքում սպորտով կամ որևէ այլ ֆիզիկական ակտիվությամբ զբաղվել, քանի որ այդ դեպքում մարդը ստիպված է լինում խորն ու հաճախ շնչել: Ցանկալի է այդ վարժանքներն անել երեկոյան, երբ օզոնի մակարդակը կտրուկ նվազում է:

Խորովածի ծուխը

5-բալլանի սանդղակի համաձայն՝ այս ծխի վտանգի աստիճանը գնահատվում է 3 բալլ:

Այրվող գազը, ածուխն ու պատրաստվող սննդի հոտերը միախառնվելով ստեղծում են ախտոտող մասնիկների «ամպ», որը ներթափանցում է թոքեր և խորացնում ասթմայի և ալերգիաների ախտանշանները: Սուրրեյի համալսարանի գիտնկանները պարզել են, որ խորոված պատրաստելիս 4,5 կգ ածուխ այրելու արդյունքում օդն ախտոտվում է այնպես, ինչպես կախտոտվի արտաճանապարհային մեքենան 4,5 կմ վարելու դեպքում:

Ալերգիայի առաջացումը կանխելու համար անհրաժեշտ է հնարավորինս հեռացնել մսի ճարպը և խուսափել ծխից՝ հատկապես միսը շրջելիս:

Նյութի աղբյուրը՝ med2.ru