Ինչպես խուսափել «Ճանապարհորդի դիարեա»-ից

Մարդու աղեստամոքսային տրակտը բնակեցված է բազմապիսի և բազմաքանակ մանրէներով, որոնք տարբեր կերպ կարող են ազդել առողջության վրա՝ չեզոք, վնասակար, օգտակար՝ օգնելով մարսողությանը: Աղիներում բնակվող մանրէների կազմը կարող է փոփոխվել ներքին և արտաքին գործոնների ազդեցության ներքո, օրինակ՝ սննդակարգի: Մարդու օրգանիզմի համար իրավիճակի, կենցաղային պայմանների, սննդակարգի, ջրի կտրուկ փոփոխությունները հանգեցնում են մանրէային կազմի փոփոխության, ինչը կարող է այսպես կոչված «ճանապարհորդի դիարեա» առաջացման պատճառ հանդիսանալ:

Դիարեայի առաջանալու վտանգը հատկապես մեծ է թույլ զարգացած, հիգիենայի ցածր մակարդակով հետամնաց երկրներում: Հենց այս երկրներում են առավել հաճախ հանդիպում աղիքային վարակիչ հիվանդությունները:

«Ճանապարհորդի դիարեա»-ից խուսափելու համար պետք է հետևել մի շարք պարզ կանոնների.

• Անծանոթ վայրում ջրամատակարարման ծորակի ջուրը օգտագործելուց առաջ եռացնել, քանի որ եռման ջերմաստիճանում մանրէների մեծ մասը ոչնչանում է: Խմել միայն շշալցված ջուր:

• Ներկայումս լայնորեն կիրառվող կենցաղային զտիչներով (ֆիլտրեր) մշակված ջրի անվտանգությունն ապացուցված չէ, սակայն գերադասելի է խմել այդ ջուրը և ոչ թե հում:

Աղիների նորմալ գործունեության վրա ազդում է ոչ միայն դրանց մանրէային կազմը, այլև ամենօրյա սննդակարգը: Սննդակարգի կտրուկ փոփոխությունը կարող է հանգեցնել ոչ միայն լուծի, այլև ստամոքսի բորբոքման, խոցային հիվանդության, աղիների խցանումների և այլն:

Նշվածներից խուսափելու համար ճանապարհորդներին խորհուրդ է տրվում.

• Զգույշ լինել կաթ և կաթնամթերք օգտագործելիս, քանի որ դրանք հիանալի միջավայր են մանրէների աճի և բազմացման համար, հատկապես տաք և խոնավ պայմաններում:

• Բանջարեղենը և միրգը ուտելուց առաջ պետք է լավ լվանալ:

• Պետք է խուսափել կենդանական ծագման հում մթերքից: Այդ մթեքները կարող են ոչ միայն մի շարք վարակիչ հիվանդությունների պատճառ դառնալ, այլ նաև որոշ կենդանիներ թունավոր են և սննդում օգտագործելուց առաջ պահանջվում է հատուկ մշակում:

• Մի՛ գնեք փողոցում վաճառվող սնունդ, հատկապես շուկաներում, քանի որ այդտեղ չկան սննդամթերքի պատրաստման և պահպանման համապատասխան պայմաններ:

• Եթե դուք ունեք աղեստամոքսային համակարգի որևէ քրոնիկական հիվանդություն, ապա ճամփորդելուց առաջ խորհրդակցե՛ք բժշկի հետ, հետաքրքրվե՛ք այդ երկրում տիրող համաճարակային իրավիճակից: