Ինչ անել վարիկոզը բուժելու և կանխարգելելու համար

Երակների վարիկոզ լայնացումը շատ տհաճ հիվանդություն է, որն ավելի շատ նկատվում է կանանց շրջանում: Այս փաստը պայմանավորված է նրանով, որ կանայք, իրենց մասնագիտական առանձնահատկություններից ելնելով, ավելի հաճախ են կանգնած աշխատանք կատարում (վաճառողներ, ուսուցչուհիներ և այլն), քան տղամարդիկ:

Բացի այդ, հղիության ընթացքում ոտքերը հաճախ են այտուցվում, ինչը վարիկոզի առաջացման առաջնային պատճառներից է: Բացի այն, որ այս հիվանդությամբ շատ դժվար է կանգնելն ու քայլելը, լայնացած երակներով ոտքերը նաև շատ տգեղ են դիտվում և մարդը ստիպված է լինում շոգ եղանակին ամեն կերպ ծածկել ոտքերը:

Ինչ անել վարիկոզը բուժելու և կանխարգելելու համար

1.         Բժիշկները խորհուրդ են տալիս վարիկոզի կանխարգելման համար պարբերաբար զբաղվել ակտիվ սպորտաձևերով (լողալ, հեծանիվ վարել): Նույնիսկ հղիների համար բժիշկները կարող են կազմել վարժությունների հատուկ համալիր, որը չի վնասի պտղի և մոր առողջությանը:

2.         Եթե երկար նույն դիրքում կանգնելուց ոտքերը հոգնում են, ապա կարելի է նպաստել արյան շրջանառությանը: Դրա համար կարելի է պարբերաբար կանգնել ոտնաթաթերի վրա և պարբերաբար հենվել ոտքերից մեկի վրա:

3.         Աշխատանքից հետո շատ օգտակար է ոտքերը սեղանին դրած հանգստանալը, քանի որ դա բարելավում է արյան շրջանառությունը ոտքերում և հանգստացնում է դրանք: Այս դիրքում հարկավոր է մնալ օրական առնվազն 5-10 րոպե:

4.         Շատ օգտակար է նաև պարբերաբար կոնտրաստային ցնցուղ ընդունելը, քանի որ ջերմաստիճանի կտրուկ փոփոխությունը նպաստում է անոթային մկանների ամրապնդմանը:

5.         Բացի այդ, անհրաժեշտ է սննդակարգի մեջ ներառել նաև հնարավորինս շատ ցիտրուսային մրգեր, կիվի, պղպեղ, կաղամբ և մաղադանոս: Այս մթերքները հարուստ են վիտամին C-ով, որը ամրապնդում է երակները:

Ինչից է հարկավոր խուսափել վարիկոզի ժամանակ

1.      Վարիկոզի դեպքում հարկավոր է հրաժարվել բարձրակրունկ կոշիկներից, տաք վաննաներից և արևի տակ երկար ժամանակ անցկացնելուց, քանի որ այդ ամենը ծանրաբեռնում են անոթները:

2.      Բացի այդ, պետք չէ զբաղվել ծանրաբեռնող սպորտաձևերով: Ֆուտբոլը, վոլեյբոլը, բասկետբելը կամ մեծ թենիսն այս հիվանդության դեպքում հակացուցված են, քանի որ կտրուկ շարժումների պատճառով մեծ է  վնասվածքներ ստանալու հավանականությունը:

3.      Եվ իհարկե անհրաժեշտ է հատուկ ուշադրություն դարձնել սննդակարգին, քանի որ ճարպոտ,  կալորիաներով  հարուստ սնունդը նպաստում է խոլեստերինի կուտակմանը, ինչը շատ վատ է անդրադառնում անոթների վրա:

Նյութի աղբյուրը՝ trental.ru